FOAI SILI ACE HARDWARE SILI MA LE $8,000 I LE CANCER COALITION

O le foa’i taua tele sa fa’atino e le Neil’s Ace Home Center i Malaeimi, lea sa latou taua’ao aloa’ia ai le $8,426.66 le tinoitupe e fesoasoani i le American Samoa Community Cancer Coalition (ASCCC) e fa’ao’o atu i nisi ua talosagaina se fesoasoani tupe mo i latou e taumafai ai mo togafitiga, ina ua mae’a fa’amaonia e foma’i ia i latou ua maua i lea ma’i fita.

O sui o le Neil’s Ace Home Center na latou taua’aoina lea foa’i o Nadine Taufa’asau, o se tasi o le pulega,  fa’apea ma Teniseli Ma’ae, o le pule o le Fola fa’atasi ai ma nisi o kesia a le Ace. Peita’i o le itu i le ASCCC, sa o’o fa’apitoa atu ai le susuga Taotasi Archie Soliai ma Morris Scanlan Jr e talia fa’aaloalo lea foa’i.

Sa mua’i saunoa Ma’ae e fa’ailo le foa’i ma taua’aoina atu eTaufa’asau o le pulega aoao a le Ace lea tupe fa’ameaalofa sa foa’i ane e tagata faigaluega, fa’atasi ai ma le anoanoa’i o latou tagata fa’atau, i sui o le ASCCC.

O le tala o le foa’i, sa amata tu’ufa’atasia lenei mai ia Novema 24, se’ia o’o mai ia Tesema 24 o le afiafi o le Kerisimasi. Na maua le aotelega o foa’i a tagata fa’atau i le ACE ma ona tagata faigaluega e $4,213.33 ona fa’aluaina lea e le Neil’s Ace Home Center ma maua ai le aotelega ua taua’aoina e $8,426.66.

E ese mai nei ala o fa’asalalauga, ua fa’apipi’ia fo’i e le Ace ma le aufaigaluega suafa o i latou na foa’i ma le aofa’iga, ua aotelega ai lea foa’i tele. Ua fa’alealea ia suafa i totonu o le faleoloa, e fa’ailoa ai le agaga fa’afetai o i latou na fa’atau, le aufaigaluega, sa taua ia i latou lea agaga alofa e afua ai nei foa’i.

Mai le agaga o le fa’afetai, ua fa’ailoa mai e Taufa’asau le fa’afetai a le pulega ma le aufaigaluega i le mamalu lautele o le atunu’u o lo’o fa’atau i le latou faleoloa, ma ua avea ma pa’aga mamae i lenei foa’i. O se tasi lea o mau o le fa’ailoga o le latou 30 tausaga.

Na tali fa’afetai ia Taotasi i lenei kamupani mo le foa’i, ua avea ma so latou sao e fa’ao’o atu i le mamalu o le atunu’u ua maua i le Kanesa ma o lo’o talosaga ane mo se fesoasoani tupe e fa’atino ai togafitiga ia toe maua se mafutaga umi ma latou aiga pele.

FOAI TUPE MO LE LEOLEO NA LAVEA I LE PULU FANA

O le foa’i lona lua o le aso ananafi, mai le Hospital Womens Auxillary e $5,000 ua foa’i atu mo le ‘Malu o le Malo’, le ali’i leoleo ia Time Loia, sa lavea i le fa’alavelave na tupu i Lepuapua, ma ua si’i atu nei i fafo lona manu’aga mo togafitiga.

“O le talosaga sa fa’auia ane i le falema’i, ona e masi’i le ali’i leoleo ma le faletua ina ia fa’aauau siakiga ma toe tapena ai mo taotoga pe afai e alagatatau mo le toe atoatoa o le fofoga o le ali’i leoleo,” o se tala lea a sui o le Auxiliary.

Ona o le Women’s Auxillary e matele ina latou foa’i mo ni mea e fa’aleleia ai le tautua lautele i le falema’i, peita’i, ua talafeagai ai lea fo’i foa’i ma se taumafaiga e fesoasoani mo lea tagata faigaleuga a le Malo, sa lavea a’o faia ona faiva.”

Mo lea fa’amoemoe, sa auai ane ai le fa’atina o le atunu’u, o le sui fa’aaloalogia o le Komiti Fa’afoe a le Auxillary, na te taua’aoina aloaia lea lava foa’i. Na auai fo’i sui iloga o le Auxillary, le peresetene ia Betty Ah Soon, ma le Failautusi/Teutupe Eseta Sataua, Pauline Young, Helga Lefiti, Gretchen Makaiwi i lea lava fa’atasiga.

Na tali fa’afetai le ali’i leoleo ua fa’amanu’alia, “Ou te fa’afetai tele i o’u tina matutua, mo lenei foa’i, ou te lagona le fa’atauva’a, aua o le a ea so’u aoga mo outou, peita’i, o lo outou faitama, ua fa’aalia nei, fa’afetai tele lava. Ou te fa’aaogaina tatau lenei seleni, pe toe maua so’u manuia e tautua ai le atunu’u ma outou o’u tina matutua.”

Sa fa’apea fo’i ona faliu le faletua o le ali’i leoleo Ruby Yandall-Loia, “Ou te fa’afetai ia te outou, ae maise o le fa’afetai i le Atua aua ua outou alofagia le ma’ua si’igama’i ma le tama o le aiga, fa’afetai lava alofa faitama, atonu e aoga le tama o le aiga mo outou ma le atunu’u pe afai ae toe fa’afo’i le malosi ia te ia. Fa’afetai tele le agalelei.”

Sa tu’ua e i la’ua le atunu’u i le malaga fa’apitoa a le Hawaiian Air anapo.