AUA LE FAALAPISI MA TAUMAFA AVA MOLISI I PAKA FA’ASAO

O lo o fautua mai le Paka Fa’asao o Amerika Samoa i le mamalu o le atunu’u ina ia fesoasoani mai i le fa’amamaina o nofoaga o le paka mai le lapisi ma isi otaota.

I se fa’amatalaga mai pepa tusitusia a le Paka Fa’asao ua fa’ailoa fa’apitoa mai e matai o nu’u ma alalafaga o lo o i totonu o le paka, e manaomia ona usitaia e le mamalu lautele o le atunu’u tulafono o le paka e fa’asaina ai tafaoga o lo o aofia ai le taumafaina o le ava malosi i le Mafa i Fagasa, le fale Samoa i le Tuasivi o Sauma ma le alasopo e lata ane i Vatia.

E fautua atu i tagata asiasi mai ina ia nofo fa’aaloalo pe a feiloai ma isi tagata asiasi ina ia saogalemu tafaoga i totonu o le paka fa’asao. E fa’afetai atu ona o le fesoasoani mai o le atunu’u aua le usitaia o lenei fa’asilasilaga.

O le Paka Fa’asao o Amerika Samoa e puipui i ‘aau amu, vaomatua, pe’a, o le aganu’u fa’asamoa, ma o lo o taumafai ina ia fa’atumauina le fiafia ma le fia malamalama o tupulaga o nei ona po ma le lumanai i nei tulaga eseese.

Mo nisi fa’amatalaga e fa’atatau i le paka ma ona tulafono, valaau mai i le 633-7082.

PRECIOUS ATAFUA ILOG I LE VOLIPOLO I SEATTLE

O le tama'ita'i o Precious Atafua o Nuuuli, lea ua fa'ailoa mai le malosi o lona tau'au i ta'amilosaga volipolo i se a'oga maualuluga i Seattle ma o lana 'au lea e ta'alo ai, ua avea le siamupini o le ta'amilosaga volipolo a le 3A Statewide i le amataga o le masina lenei.

Na amata mai a'oga a Preciousi i le Manulele Tausala ma o'o ina ulufale i le A'oga Maualuga a Tafuna i le vasega 9 ma le 10 ona fa'ato'a malaga ai lea o lona aiga atoa i Seattle lea ua fa'aauau ai lana ta'alo volipolo.

O Precious o se tama'ita'i ta'alo i le volipolo a Tafuna i le JV ma le Varsity a tama'ita'i a'o i ai iinei.

O Auburn Riverside High e le o se a'oga ua leva, o se a'oga o lea fa'ato'a atoa le 10 tausaga, peita'i, ua vave tele lo latou alia'i i lenei fa'agatama, o se tala tusia lea e le nusipepa o le Seattle Times, lea foi na lipotia faapea e matua malosi na'ua le tau'au o Precious i le volipolo, ae fa'amoemoe tele ia Carson Heilborn, i lana setiga o le polo mo se tu'i mata'utia.

I le ta'aloga faitaulia lava lea siamupini ai, e 33 tu'i na setia e Carson ma na lelei na sipaika e Atafua.

O le tala mai, e 16 tu'i na le mafai ona poloka a Atafua i le ta'aloga faitaulia o le sailiga siamupini ma Columbia River High.O le maka ua si'itia ai Atafua o le MVP o lea ta'aloga faitaulia i Seattle.

I le aotelega o le taumafaiga a le au a Precious ma Carson, sa fa'ailoa mai ai, e 36 manumalo a lea 'au volipolo ae leai se pala'ai ia latou ta'aloga uma lava i le liki volipolo lea.

E na'o le tasi lava le taimi na faia'ina ai le 'au lea i le latou seti na ta'a'alo ai ma Mercer Island High, ae sa manumalo lava i le ta'aloga atoa i le seti mulimuli ma ua le afaina ai le latou taumafai i lenei tausaga.

I se fa'amatalaga a Precious sa ia faapea ai, "O le volipolo o se ta'aloga e ta'a'alo uma ai tamaiti i Amerika Samoa e o'o i tagata matutua, e le tatau ona e fa'apea ane e te sau mai Amerika Samoa ae e te le iloa ona ta'alo volipolo. E maua loa se polo fa'atutu la'au ae fai ai le voli, tusa lava pe leai se upega!"