$3,000 Maua Sailiga ASCRF - Kolisi Tu’ufa’atasi

Mai le Koneseti o le Aso Fa’afetai a le ASCRF - a le Kolisi Tu’ufa’atasi sa fa’atautaia, ua latou aoina ai le $3,000. ina ia tu’ufa’atasia ai ni fesoasoani tupe e taua’aoina i fanau a’oga i le Kolisi e le agava’a i le Bell Grant po’o le polokalama a le Financial Aid, e totogia ai latou mataupu tau’ave i a’oa’oga.

Ua mae’a fo’i ona latou fa’afetai fa’apitoa mai ia i latou na tofu sao, pe na foa’i fo’i mo le latou fa’amoemoe, ae peita’i, e maualuga pea le agaga fa’afetai i le mamalu lautele sa latou auai i lea fa’amoemoe, ma sa gafatia ai e i latou ona aoina lea seleni tele.

Ua fa’ailoa fo’i e Matesina Willis o le ASCC ma le ASCRF, “O lo ua fiafia le matou sosaiete a tamaiti a’oga tuai a le Kolisi i lea matou sailiga, ma o le a le muta ai le taumafaiga ina ia feololo atili le tupe mo lea fa’amoemoe lelei. O le tupe lea e fesoasoani ile totogia o kosi a nai fanau ia e poloka lava latou taumafai ona o le taugata o mataupu o tau’avea.”

Tumau le Malosi Au Volipolo Varsity a Tama - THS

Ua tula’i mai le taumafai a Tafuna Varsity Ali’i i le tulaga muamua, e le’i i ai lava se faia’ina ae ua 10 malo. Peita’i e to’alua ta’aloga fa’atulagaina mo i latou o totoe nei. I le aso Faraile na te’a nei, sa fetaui ai Tafuna ma Kanana Fou, e faia lea i le Faleta’alo o Fagaitua, ma e le’i maua le iuga o lea ta’aloga i le taimi o lenei lomiga.

O le isi a latou ta’aloga ua fa’atulaga mo le aso Gafua i le 4:00 i le afiafi lea e ta’a’alo ai ma Samoana High. Afai ae gafatia e i latou ona manumalo, ona maua lea o le latou matati’a i lenei tausaga, e leai se faia’ina.

I le taimi nei, o ‘au o lo’o tula’i mai i luga o Tafuna High, Leone, Fagaitua ma Nuuuli VocTech ae tulaga lima ai Samoana, lea e tauau latou te mafaia le tulaga fa mo le sailiga siamupini.

O le aso Lulu lea ua saunia ai a’oga maualuluga e maua le to’afa pito i luga e sailia ai le siamupini ma e soso’o lava nei ta’aloga, ae le’i mautu mai le faleta’alo mo lea fa’amoemoe.

O le aso Faraile, Tesema 12 o le a faia ai loa le sailiga siamupini ma le aso Faraile 19 Tesema, e faia ai le ta’aloga a Sisifo ma Sasa’e e fa’amae’a ai le liki lea.

O lo’o tatala lava nei ta’aloga uma i matua ma aiga, ina ia auai ane e sapaia le taumafaiga a le fanau i a latou ta’aloga fita o le a alofaiva i ai i le vaiaso fou.

To’atele e le’i maua se Avanoa i Foma’i Mata:

Ua fa’ailoa mai e le susuga Vaito’a Hans Langkilde o le Kalapu a le Liona i Pago Pago nei, “E le o faigofie le lagona alofa na’ua ia i latou uma e le o maua ni avanoa e va’aia ai Foma’i Mata na malaga mai fafo mo talavai mata a le Liona i lenei tausaga. O se mea e fa’anoanoa ai, ona e le o lava le taimi ua fa’atulaga mo foma’i nei e va’aia ai le mamalu lautele o le atunu’u o lo’o mo’omia pea lenei auaunaga.”

“Ua masani le atunu’u i talavai a le Kalapu a le Liona, e maua fua lava mata tioata faitau tusi po’o va’aiga. Ae o lenei tausaga, ua o atu nai tagata, ae ua le maua se avanoa ona ua ta mau lava le aofa’iga o tagata e va’aia foma’i mata i le na’o le 60 i le aso e tasi, pe sili teisi fo’i.” O le isi lea fa’amatalaga aloaia a Langkilde.

Ona o le fa’asalalauga i nusipepa sa matele ina faia a’o le’i autova’a mai foma’i, ua fa’apea fo’i ona taofia lea faiga, aua e tumutumu mai le mamalu o le atunu’u, ae le lava avanoa ua fa’avasega mai mo i latou uma.

“Ua taumafai se faiga ina ia le so’ona nofoa le atunu’u, ma fiu e tatali se avanoa, ae ua faia lava ia i latou ua silafia ona o tala’ave, ae ua tau feololo ai le tumutumu mai o le mamalu lautele, ae ua fai fo’i ma mea ua pagatia lota mafaufau alofa, e i ai nisi e le’i o’o i ai le auaunaga, ae sili atu lo latou mana’omia nai lo nisi ua maua avanoa i lenei o’o mai o foma’i.” O a Langkilde lava lea.