FA’AMOLIA ONA FA’AMAMA LE UAFU

Ua fa’amalosia nei e le ASEPA ma le Coast Guard le Matagaluega o Uafu ma le Malae Vaalele ina ia fa’amama le uafu tele mai lapisi o va’a magoto lea o lo’o i ai pea, ma ua avea ma fa’auilavea i le taulaga.

I se fa’amatalaga a  Wallace Thompson, o le kapiteni o le MV Sili, sa ia fa’ailoa ai, “I le taimi nei, ua fa’amalosia mai e le EPA ma le Coast Guard le gaoioi loa o le Pulega o le Uafu ma Taulaga e fa’amama ese uma le lapisi o lo’o magoto i le taulaga. E le o toe i ai se isi mea e ao ina faia e i matou, ae o le usita’ia o tulafono a le malo tele.”

Na fesiligia le ali’i kapiteni e tusa ai o le “Lili’aifao” o se va’a fagota e silia ma le 60 futu le umi, ua toeititi magoto uma lona tino i le sami.

Na fa’ailoa mai e Thompson, o le “Lili’aifao, o lo ua mae’a fa’atulaga le lifia a’e i luga mai le mea o magoto ai, fa’apea fo’i ma isi va’a na magoto muamua e i ai le Tatoso muamua i le tausaga 1980. O lea galuega ua fuafua e fa’asalalauina mo tauofoga  a ni kamupani...po’o le isi lua vaiaso o i luma ua tatau ona lomia lea i le nusipepa.”

E ese mai lea, o lo ua mae’a fa’atau ese atu nisi o va’a tuai e aofia ai le “Manu’atele” ua fa’atau ese e le kamupani Scrap Metal i lona tau e $800,000 ma o le a latou fa’aleaogaina lea va’a.

O le va’a o le “Cornerwind” ua mae’a fa’atauina e se kamupani Korea, ma ua le toe avea nei ma ni aseta a le malo.

FA’AFIAFIAGA KERISIMASI A LE ASCC & MCDONALD'S

O le afiafi nei e amatalia ai fa’afiafiaga o le Kerisimasi e le Vaega a le Fine Arts a le Kolisi Tu’ufa’atasi, lea e faia i le latou Lecture Hall, ma o se fa’aaliga lea e fa’afeiloa’i aloa’ia ai le isi a la’ua pa’aga o le a latou galulue fa’atasi ai i lea itu o A’oa’oga fa’a-Atisi, le susuga Poe Mageo.

O le autu o le fa’afiafiaga, “Amatalia Le Kerisimasi” ma ua fa’aautu uma i ai fa’aaliga ma pesega matagofie o le a fa’atino e le fanau a’oga a le Kolisi Tu’ufa’atasi

O ituaiga o pese fatu mai Samoa, Egelani ma Amerika mo faafiafiaga, ma ua fa’atulaga e amatalia tonu lava lenei fa’aaliga matagofie i le 6:00 i le afiafi.

O le fa’afiafiaga fa’apitoa o le Kerisimasi ua saunia e le McDonalds o le a sosoo ai i le afiafi o le Aso Faraile, mai le itula e 4:00 i le afiafi se’ia o’o i le itula e 7:00 i le malae i Fagatogo. O le a faalauiloa ai mai ai fo’i ma le sui ua mauaina le fa’ailoga fa’apitoa o le tauvaga tusi “My Chrsitmas Wish” i lea lava afiafi.

Ua vala’auina fo’i le mamalu lautele ina o’o ane e maimoaina nei fa’afiafiaga o le tapena e le vasega Atisi a le Kolisi, fa’apea fo’i le aso Faraile i Fagatogo mo le tapenaga a le aufaigaluega a le McDonalds ma lana taupulega lea ua manatu e fa’amanuia vave atu ai le Kerisimasi o lenei tasuaga i aiga uma o Amerika Samoa.