FONOTAGA MAMALLU LAUTELE SIITAGA PILI VAI & VAI LAFOA’I

UA mae’a fa’asalalauina fa’alaua’itele le fuafuaga a le ASPA ina ia fetufa’i taofi ma le atunu’u e tusa ai o le si’itaga o pili totogi mo le suavai mama, vai lafoa’i ma le lapisi lafoa’i.

Peita’i o le a fa’apea fo’i ona fa’aitiitia pili eletise mo le vasega o aiga o lo’o aofia i le “Vaega E” i le fa’atulagaga o Aiga o fa’aaogaina le eletise.

O le isi mataupu taua tele, o le a fa’ailoa mai ai e le ASPA le latou fuafuaga ta’oto e ao ina totogia e i latou o le a latou fa’aaogaina Solar Photovoltaic Panels mo le sapalai o le eletise ae fa’auia i le mita eletise a le ASPA.

Pe afai e i ai sou taofi e fia fa’aalia aloaia i le ASPA ma lea mataupu taua, e mafai ona e fa’ao’o se tusi i le ofisa autu o le ASPA, e fa’atuatusi lelei ia: ASPA c/o Utu Abe Malae, Tafuna. Po’o le meli fo’i i le pusa meli: P.O. Box PPB, !st Airport Rd, Pago Pago, AS 96799.

Peita’i, o lou taofi e fia fa’aalia i le fonotaga o le a usuia lea i le aso 17 Tesema, 2014 i le Fale Veterans Memorial Center - Tafuna i le itula e 10:00 am se’ia paia le 12:00 pm.

GALULUE MALOSI AUFAI GALUEGA A LE STARKIST SAMOA

I le fa’amatalaga a le ali’i Pule Sili o le StarKist Samoa, Andrew Choe, ua ia fa’aalia ai, “Ua matou va’aia le galulue malosi tele o le aufaigaluega a le Star Kist Samoa, o le ala lea o le tulaga lelei fo’i o a latou fefa’ataua’iga.” O le aufaigaluega, e tusa ma le 2,000.

O Choe, ua amatalia nei i lona tofiga fou ole CEO po’o le Pule sili o le Star Kist Co., sa ia asiasi mai ma taga’i toto’a i le fa’agaoioiga o le Star Kist Samoa i’inei, ma sa i ai se vaitaimi o lana asiasiga sa ia fesiligia ai tagata faigaluega i o latou manatu fa’aalia ma lagona e fa’aleo e tusa ai o le latou galuega ma le Kamupani o galulue punoua’i ai.

Ua mautu le iloa e Choe, o tagata faigaluega a le Star Kist Samoa e matua galulue malosi ma le fa’amaoni i tiute, o se mea fo’i lea ua iloga ai le manuia o fefa’ataua’iga a lea pisinisi ma le va i fafo.

“Ua tele se suiga ua mae’a faia i le Star Kist i nai masina talu ona fa’atautaia mai e le pulega fou, peita’i, ua matou fa’amae’aina galuega e sili atu nai le aofa’i mana’omia i taimi uma, ona o le lelei o le aufaigaluega o fa’atinoa tiute,” o se isi lea saunoagqa a Choe.

Ua fa’ailoa mai ua fai sina leva o fa’atautaia lava galuega a le Star Kist i le ono aso o vaiaso ta’itasi, peita’i, ina ua fesiligia Choe e tusa ai o nisi mea e fa’aleleia ai ni penefiti mo tagata faigaluega, ae sa ia fa’ailoa mai, “O le afuaga lea o lo’o aumaia o Linda Gilbert, o ia lea o le pule o tagata faigaluega i le Star Kist Co. ina ia galue fa’atasi ma lenei ofisa iinei, ia mafai ona tu’ufa’atasia nisi ala o penefiti mo tagata faigaluega, ma toe taga’i toto’a i suiga e ao ina faia e fa’aleleia ai atili ai nofoaga o lo’o galulue ai le to’atele o le aufaigaluega.”

E tusa ai fo’i ma se lagona fa’aalia o le sui pule o le Kamupani Fa’afo’i Palepua, sa ia fa’ailoa mai, “O le taimi nei o lo’o taumafai i matou nei le pulega, e toe afuafua ni ala lelei e fesoasoani atili i tagata faigaluega, ma e mautinoa lava e tele na’ua mea e ao ina fa’aleleia i totonu o lenei falefaigaluega talu mai le tele o tasaga ua te’a.”

Ua le’i tele na’ua ni tausaga talu ona fa’atau e le Dongwon le Kamupani a le Star Kist, e matele fo’i ona auina atu e le Star Kist tagata i luga o tofiga o le pulega i fafo i isi o latou lala e fa’amasani i ala o lo’o fa’atino ai latou fo’i galuega, ma ua fa’apea fo’i ona aumaia latou sui mai fafo e fetufa’i mai o latou tomai mo tatou iinei.

Ina ua fesiligia Choe pe tumau pea lea faiga, ae ua tali mai o ia “Ioe, e faia pea lava lena feso’ota’iga o tomai, ma o lo’o fa’aauau pea lava lena faiga e o’o mai i le taimi nei.”

“O lo’o matou avea ni sui mai i’inei i Korea, ae o nisi i Equador i lala lava o le Dongwon.”

Peita’i ina ua fesiligia o ia, pe tusa o le a le umi e tumau ai le Star Kist iinei, ae ua ia fa’ailoa mai, “Malosi tele le aufaigaluega, to’a’aga ma faigaluega lelei ma le fa’amaoni, i le taimi nei, e nonofo pea i matou.”

ASHAA VOLIPOLO - TOE A’AAUAU

Na fa’aletonu le tele o le soso’oga o ta’aloga Volipolo a A’oga Maualuga lea e fa’atautaia e le ASHSAA, ina ua o’o fo’i i le taimi lautogia mo le ta’aloga faitaulia a Tafuna ma Faga’itua a ali’i, ae toe tolopoina fo’i, ma ua lua ai ta’aloga faitauli le va o ia ‘au malolosi e lua.

Ua faaalia e faia uma nei ta’aloga i le aso malolo, Aso Faraile 26 Novema, ma sa fa’atautaia lea i le faleta’alo o Kanana Fou High.

O le aofai o ta’aloga na faatautaia i lea aso e 14, mo le Varsity ma le JV,  peita’i e o’o ane i le afiafi ua toetoe ta le 4:00 ae faia loa le fa’ai’uga e tatau neti e lua e fa’atuataia ai ta’aloga o totoe ia maua le taimi mo ta’aloga uma.

I le fetauiga lea, ua tula’i mai ai Tafuna High Varsity, e le’i i ai lava se faia’ina ae o Fagaitua e soso’o ai, ua lua faia’ina, ae 5 manumalo.

I le Junior Varsity fo’i o loo lalamua mai ai fo’i le Laumua o le Toa i le latou ‘au a tama, ma o lo’o malosi tele fo’i nai lo isi ‘au o lo’o aofia ai. Soso’o mai ai le Nuuuli Voc Tech i le 4 manumalo ae lua faia’ina peita’i.