TUMU LISI E SIAKI MATA - FOMA’I A LE LIONA

I le taeao o le aso Lulu na te’a nei, sa le toe mafai ai ona fa’aulu se igoa o se tasi i le lisi ua mae’a tamau mo le siakiga o mata po’o va’aiga e foma’i mata na fa’ato’ai mai e le polokalama a le Lion’s Club o Pago Pago.

O nei foma’i mata sa malaga fa’apitoa mai i le aso Faraile o le lua vaiaso ua te’a, ona fa’atasi lea ma le Kalapu a le Liona ma amata ai latou talavai mo tagata lautele ua mana’omia latou va’aiga. O le tautua masani lea a le Kalapu a le Liona, ma sa masani lava ona maua mata tioata e ave fua, ae le tau siakia ou fofoga mo sau va’aiga, peita’i, o lenei asiasiga a le foma’i mata mai fafo, ua suia nei, ua faia lau siakiga ona fa’ato’a taua’aoina mai lea o lau mata tioata fua.

Mai le ali’i Peresetene o le Lions a Pago Pago, Tony Langkilde, sa ia fa’ailoa mai ai, “E na’o le ta’i 60 lava tagata lisia o latou suafa i aso ta’itasi o talavai e pei ona fa’atautaia mai ai, e le mafai ona silia, ona o le umi ona va’aia fa’alelei o mata ma faia lelei su’ega o fofoga, ia le sasi se va’aiga e taua’aoina atu mo le tagata.”

Na faia lava nei sailiga i le potu o le Surgical Ward a le LBJ i Faga’alu, ma e to’atele fo’i i latou ua fa’amanuiaina i lenei asiasiga a foma’i mata a le Lions Club i lenei tausaga.

SAMAGA O LE LAGI MALOFIE - TAMAITA’I

I le afiafi o le aso Lulu na fa’atumulia ai le Laoa o Taveuveu ma Talauega i Nua ma Se’etaga i le pa’ia o aiga, i latou sa tapua’ia faiva o le susuga le Matuaofaiva Suluape na matua vala’aulia fa’apitoa mo le fa’amoemoe ia lae’ia e tamaita’i o lea auaiga le la’ei Samoa moni o le Malu a tama’ita’i.

Ua atoa le lua vaiaso na tataina ai nei alo tama’ita’i, ma ua to’avalu lelei i latou ua fa’amae’aina, lea na sama latou malu i lea afiafi fiafia mo aiga na lua. “O fanau uma nei a fanau a Taveuveu ma Talauega, e ese’ese lava suafa o tama’ita’i ae o tupuaga lava nei aiga na lua,” o se tala aloaia lea a A’ano Ale, lea na fa’ato’a to’ai taunu’u mai Ausetalia ma ona alo tama’ita’i e to’alua, ma amata loa ona tata i lea avanoa lelei.

O i latou ua mae’a ona sama latou malu e aofia ai: Jacklyn Tulimalefo’i Savusa-Tilo; Deidre Lea Tilo - Penitusi; Faith Taifalioa’ana Ale; Claremont Fuesaina Ale, Darlene Audrey Nusipepa Tilo; Doreena Fuarosa Delisha Tilo, Cherine Tilo ma Sade Tilo.

I sana upu fa’amalo, sa ia fa’apea ai, “O lou loto tele ua le mutu ai lau malu, ae ua atoa lelei. Ua e le tu’u i le tiga ma le tigaina, ae ua manatu ina ia mae’a lelei lou la’ei. Ia fa’aauau ai ona e loto tele e fa’atino fo’i tiute e ao ina e fa’atino mo lou aiga i so’o se mea e manatu lou aiga e te faia, nofo sauni ma tapena lou talavou mo ou tiute.”

O fa’aaloaloga mo le Matuaofaiva ma lana ‘au tata sa soso’o ai ma sa iloga fo’i ona mafuli aiga e fa’ailo le agaga o le faitama ma le fiafia aua ua mae’a faiva ua a’e manumalo fo’i e faiva aua ua vaaia ata o taulelei i le galuega fa’atino i tausala o aiga.

E le gata i fa’aaloaloga mo le agaiotupu ae ua faliu fo’i aiga ma fa’asopoia le Fa’afeagaiga taulagi sa fofogaina le sauniga fa’amananuia i lea afiafi taua, fa’apea ma afioaga o aiga sa tapua’ia faiva ae o latou alo tama’ita’i ua lae’ia nei lagi malofie.