TALA i VAIFANUA

AUAI ASOSI A’AU I TAUVAGA I SAMOA

 

Ua fa’ailoa mai, e le Peresetene o le American Samoa Aquatic Association, Zero I’aulualo, “O lenei fo’i tausaga o le a fa’atasi atu ai fanau o lo’o a’otauina i fa’agatama o le “tu’uga a’au” i le tauvaga o le a faia i Samoa e fa’aigoaina o le “Samoa Swim Series” mai ia Iulai 31 se’ia o’o ia Aukuso 2, 2014.

 

O lenei tuuga e auai mai ai ni sui mai Ausetalia, Niu Sila, Iunaite Setete o Amerika fa’apea ma i tatou nei, ma o le avanoa lelei lea, e fa’aleleia atili ai tomai tauva o alo o le atunu’u.

 

O lea tu’uga, o le aso muamua e faia ai tu’uaga e 3.8 kilomita le mamao, e lua tu’uga ta’i 4kilomita i le aso lona lua ma le aso lona tolu e lua fo’i tu’uga ta’i 3.5kilomita e faia ai.

 

“O le taimi nei, e le o toe fa’avaivai lava le una’ia malosi o tatou fanau o lo’o a’oa’oina i lea fo’i fa’agatama, ina ia lelei a latou taumafaiga pe afai e auina atu. E le o mafai ona fa’ailoa atu ni igoa o le fanau e  malaga, ua fai si vave o le taimi nei, ina ne’i toe le gafatia e nisi o le fanau ona malaga i lea tauvaga fa’avaomalo mulimuli ane. Peita’i, o lo’o lava le taimi e fa’aauau ai pea latou a’oga ina ua malaga nisi ae ua fili fa’apitoa mai lava tatou sui pito i agava’a.” O se tala lea a Iaulualo.

 

Ua ia fa’ailoa mai fo’i, atonu e i ai nisi tu’uga a’au e faia lava i’inei, e fa’amautu ai sui e auina atu, ma e mo’omia lava ona fa’asagatonu lelei le fa’amuamua a le tama ma le teine a’au i koleniga o lo’o faia e tapena ai ni sui sili ona agava’a mo lea tu’uga.

 

Ua toe fa’ailoa mai fo’i, “O le taimi nei, e mafai lava ona e o’o mai e a’oa’oina oe i le a’au, atonu o lo’o i ai nisi sui e saoasaoa lava i le a’au ae le o omai e tauva ma a’otauina mo se tatou ‘au ta’a’alo agava’a mo Samoa.”

 

“O matou e i ai lava i le Matafaga i Utulei i aso Gafua, Aso Lulu ma aso Faraile e afua mai le 1:00 i le aoauli. Peita’i o le taimi nei ua kolenia fa’apitoa sui mo tu’uga i Samoa, ae le o a’oa’oina le a’au.” O le tala ata lea a I’aulualo.

 

MATAGOFIE SAO O AMALU’IA & FA’ILOLO

 

O se va’aiga uiga ese le fa’afiafia loto e maimoaina fa’afiafiaga a autalavou mai Amalui’a ma le Metotisi a Fa’ilolo i le afiafi o le aso Lua. O ia autalavou sa tu’u o latou sao ina ia faia i le aoauli po’o le itula e 1:00 ma sa va’aia, e tusa po’o le a le vevela o le la, toe leai nisi e to’atele ona o atu e maimoaina nei fa’afiafiaga matagofie, ae sa le taofia ai le fa’ataunu’uina o latou sao matagofie.

 

Na tatala malae Amalu’ia, i lena aoauli i le latou toniga matagofie ‘ie uliuli ae fa’afefiloi ai le solosolo lanumeamata, ma sa amata i a latou tapenaga o fa’afiafiaga a atumotu eseese o le Pasefika, ae taualuga i fa’afiafiaga fa’asamoa i ana siva, sasa ma le taualuga a tama’ita’i talavou, ae fuataimi mai fo’i le atali’i pe na’o le 6 tausaga le matua.

 

I le sao o Fa’ilolo na toe va’aia ai ni tamaiti sili ona laiti, ae ua fa’ailoa mai o le A’oga Aso Sa lea ma o i latou fo’i sa numera tasi i le pese sa tauva ai le Sinoti. Oka ua iloga mai le laiti o nei autalavou, ae o le matati’a ua fa’ao’o i ai o latou iloa i le aganu’u e ala i pesega ma siva, ua maualuga lea.

 

Ina ua mae’a latou fa’afiafiaga o pese eseese e tolu, ae fa’ai’u loa i le latou tala fa’atino, “Pili ma ona tofiga, ua totofi ai nei Samoa!” O se mea uiga ese le matagofie ma ua fa’amatala mai ai fo’i le ala o le tamaoaiga sa tausia ai itu eseese o Samoa, e afua mai tofiga a Pili i lana fanau tama e to’atolu, ae to’afa loa i lona afafine, sa ia tu’uina i ai pa’ia o “Aiga i le Tai!”

 

O le taualuga o latou fa’afiafiaga, sa peseina ai loa e i latou o le latou pese sa maua ai e i latou le tulaga muamua i le latou sinoti, ma taualuga fo’i e le tama’ita’i sa avea ma afafine o Pili, Taialofa Lale Letufuga, o le alo o le fa’afeagaiga taulagi i le afio’aga.

Comment Here