Tala i Vaifanua

MAUA SUI O A’OGA AUVA’A HOKULE’A

 

E to’alua sui o a’oga maualuluga a le teritori ua ausia agava’a e mafai ai ona auai o nisi o le ‘auva’a a le “Hokule’a,” le va’a folau a Hawaii, lea sa avea fo’i le tatou Faipule i le Konekeresi, Faleomavaega Eni ma se tasi o ana auva’a i tausaga ua te’a. O i la’ua ua mauaina nei avanoa matagofie o le tama’ita’i ia Hope Autele o le Aoga Maualuga a Manu’a ma le ali’i o O’Reily Siona Le’au o le Aoga Maualuga a Faga’itua.

 

Ua fa’ailoa mai, o nei sui sa filifilia mai le to’a 30 o e uma na talosaga mo lea avanoa mai a’oga maualuluga uma o le teritori. E to’a 13 i latou na talosaga mai Manu’a ma le to’a 17 mai Tutuila nei.

 

O i laua ua filifiliga o le a malaga i Hawaii ina ia a’oa’o fa’apitoa ai i ala e folau ai tagata o atumotu i aso ua te’a, ma e i ai a la’ua folasaga e fa’aalia i le Youth Ocean Summit i le masina fou. E lua vaiaso e faia ai le a’oga folau i Hawaii ia Iuni 2014.

 

GALUEGA FA’AMAMA A LE MALO

 

O le aso Faraile ma le aso To’ana’i ua te’a sa fa’amama ai e ofisa ma matagaluega o le malo nofoaga eseese i le teritori mo tapenaga e talimalo ai i le Sisigafu’a o lenei tausaga.

 

E valu sone sa fa’atautaia ai lea galuega fa’amama e afua mai le galuega lea i Lupelele i Iliili se’ia o’o i Satala. Ua fa’alualuagia le fa’amama lea i galuega fa’amatagofie, ina ia faia le mea sili e fa’amatagofie ai autafa o alatele ae maise afio’aga o le taulaga lea e fa’atino ai fa’afiafiaga ma polokalama fa’asolo o le sisigafu’a.

 

Ma o le aoauli nei se’ia o’o i le aso Lulu e fa’atautaia ai fa’afiafiaga e tapena i ai le Arts Council ma le Matagaluega o Talavou ma Tama’ita’i, lea e fa’atino uma lava i le Malae o Su’igaula o le Atuvasa i Utulei.

 

O le ‘auga o faigamea uma lava i so’o se Sisigafu’a o tausaga ta’itasi, o le filigamaea i le tai, lea e fa’ataunu’u i le aoauli o le aso Lulu.

 

VASEGA FOU, “TALI MALO LELEI”

 

Ua toe talia nei nisi e fia talosaga mo se avanoa e a’oa’o fa’apitoa ai i le Kosi Talimalo Lelei a le Matagaluega o Talavou ma Tama’ita’i. Ua fa’ailoa mai, “E aoga tele lenei tomai, aua ua ‘auga uma mea ua fa’atinoina e le Malo, ina ia atina’e ‘au’aunaga feso’ota’i ma le taliga o turisi e asiasi mai i le atunu’u.”

 

O lo ua fa’ailoa mai e amatalia le a’oa’oga lea i le aso 25 Aperila ae o aso Gafua ma aso Faraile e faia ai vasega mai le itula e 8:00 - 4:00 ile afiafi. E ta’i 30 sui i le vasega e tasi, ma e mafai ona tusia lou suafa pe a e vili ane i le telefoni 633-2835 i so’o se itula faigaluega.

Comment Here