Tala i Vaifanua

Tuai Maua Lafoga a Nisi o le Atunu’u

 

O se taumafaiga ina ia mautinoa ua totogia mae’a lelei pili a le mamalu lautele o lo’o i ai i le Vaega o Fa’amasinoga, ua fa’ailoa mai ai, o lo’o ua saunia lelei se lisi o sui uma o i ai pili i le fa’amasinoga, e tatau ona fa’ao’o i le Ofisa o le Teutupe a le tatou Malo.

 

“O lafoga uma lava a sui e le’i mae’a latou tupe o sala i totonu o le fa’amasinoga, e fa’aitiitia pe fa’amae’a lelei fo’i i a latou lafoga (tax refund). Ua tu’uina lea galuega ina ia fa’atautaia e le Teutupe a le Malo, lea e i ai lona malosi’aga e mafai ai ona faia lea tulaga i lafoga a so’o se tagata faigaluega a le Malo po’o kamupani i totonu o le tatou malo,” o se faaaliga lea ma i le vaega o fa’amasinoga.

 

O nei sala tupe o lo’o ua fa’atulaga i le fa’amasinoga, e afua mai sala i soligatulafono i le fa’afoeina o ta’avale i luga o alatele, po’o sala tupe fo’i o lo’o fa’atulaga i nisi o solitulafono sa a’afia ai nisi o lo’o maua a latou lafoga mai le Ofisa o Lafoga a le tatou malo.

 

Ua le gata la i nei solitulafono, ae ua fa’ailoa fo’i ma sui o lo’o talosagaina pepa nofo mau o nei sui ua solitulafono ma ua fa’ae’e i ai ni sala tupe e le fa’amasinoga, ina ia o’o ane i le Ofisa o Fa’amasinoga i Fagatogo e va’ai toto’a pe le o se tasi o lo’o e talosagaina pepa, o i ai sana sala tupe e le o totogia, e ono se’ia ai lau siaki lafoga o lenei tausaga ua tuana’i.

 

Ua fa’ailoa mai, afai e i ai ni au tagata o lo’o talosaga, ae ua taliu i atunu’u na o mai ai, ia fa’aaoga lenei vaitaimi e siakia ai, pe le o i ai se sala tupe o totoe e le’i mae’a a lea sui i le fa’amasinoga, ina ne’i afaina lau siaki lafoga, pe a mae’a ona faila lau lafoga 2013.

 

O itula e tatala ai le fa’amasinoga e amata mai le 7:30 i le taeao se’ia fa’ato’a tapunia i le itula e 4:00 ile afiafi.

 

Siitia Ofisa o Tautua mo Fanauiti a le DHSS

 

Ua fa’alauiloa mai le amatalia o “Tautua Eseese mo Fanauiti” a le Matagaluega o Alamanuia mo Tagata Lautele (DHSS) i lona nofoaga fou i le amataga o le tausaga 2014.  O lea ofisa sa fa’atautaia mai a latou tautua eseese mo le fanau i le potu i le fogafale lua o le Lumana’i Building i Fagatogo, lea e i ai le Falemeli i lona fogafale muamua.

 

Peita’i, ua fa’ailoa mai, o le a si’itia atu i le fale o pisinisi a le Tedi Fagatogo Square, ma o le a tatala ai ana tautua i lea nofoaga fou i le aso 6 Ianuari, 2014. Peita’i i le taimi nei, ua tapunia tautua a lea ofisa e amata mai le aso 30 Tesema 2013 se’ia o’o i le aso 03 Ianuari, 2014.

 

O itula masani lava o le a tatalaina ai le ofisa mo le tautuaina o alo o le atunuu, 8:00 i le taeao se’ia pa’ia le itula e 4:00 i le afiafi, amata atu ia Ianuary 6, 2014. Pe afai e i ai se fa’afesili i lea fo’i suiga, fa’amolemole vala’au mai i le numera telefoni 633-1571.

 

Mo’omia ona Faia Tui Puipuia o le “Flu”

 

Ua fautuaina tagata uma o le militeri, “Ia mautinoa ua faia o outou tui puipuia o le Influenza!” Peita’i, e le o se mea leaga fo’i le fautuaina ai o le mamalu lautele i lea lava tulaga, ua iloga mai le vave suia o le tau i lenei vaitaimi, ua so’ona vevela ma ua vave fo’i pa’u mai o uaga i le laueleele, ma o nei fesuia’iga fa’afuase’i o le tau, e ono lamatia ai nisi i lea fa’ama’i.

 

“Ia mautinoa fo’i e le mamalu lautele, e ui lava ina umi vaitaimi o le tatou soifuaga i o tatou atunu’u o maua lava i le flu, ae afai ae le togafitia lelei ma ia te’a ese mai lou tino lea ma’i, e ono maua ai oe i le pneumonia, po’o le flu gau i le ta’ua ai e le mamalu lautele.”

 

O le phenomena (po’o le limonia) fo’i, ua to’atele lava nisi o lo ua maumau ai o latou soifua ona o le fa’atamala i le togafitia o le flu, a’o fa’afaigofie, tautuana, fesiligia le tatou Matagaluega o le Soifua Maloloina mo talavai a le fanau ma e matutua fo’i i tui puipuia mo le Flu, e amata ai lenei tausaga 2014.

Comment Here