TALA i VAIFANUA

LE’I A’AFIA MANU’ATELE I LE FA’AMA’I MATA

 

“Se’i tatou va’ai po’o le a se umi?” O le tala lea e masani ona tausua ai nisi, peita’i o le taimi nei, ua mataituina nei e le Matagaluega o Soifua Maloloina ma le Matagaluega o A’oga pe maua nisi o le fanau a’oga ma faia’oga i le fa’ama’i mata, atoa ai ma le mamalu lautele.

 

“O lea lava e saogalemu i matou i’inei, ma ua fa’ailoa [e le Mataglauega o Aoga] ina ia fa’aauau pea ona faia a matou a’oga, aua le taofia fua, aua e leai nisi ua maua i le ma’i mata o pepesi nei i Tutuila.” O se tala lea a se tasi o fai a’oga  i le aoga maualuga a Manu’a,  ina ua fa’afeso’ota’i atu i le telefoni ananafi.

 

Na vala’au fo’i i le a’oga tulaga mumua a Fitiuta, ma tali mai fo’i se tasi o faia’oga sa ia talia maia le vala’au, “E le o tu’ua matou i’inei, o lo’o faia lava matou a’oga e pei ona masani ai, aua o lo’o saogalemu lava matou i le fa’ama’i o pagatia ai outou i’ina.”

 

O le mea moni, ua amata ona le fia manana’o i latou o alaala i Manu’a e toe so’ona o atu nisi mai Tutuila i le taimi nei, ona o le ma’i mata i alu se tasi ma avatu.

 

O le tapunia la o a’oga mo le vaiaso atoa  lenei, ua na o aoga i Tutuila ma Aunu’u.

 

FOA’I ASOSI VOLIPOLO MO SAMOANA

 

O le aso Lua na fa’ao’o ane ai e le Asosi Volipolo a Amerika Samoa (ASVA) ni paelo vali tetele ma ona totoga uma e fa’aaoga i le toe valia o le Fale Ta’alo a Samoana High, o se latou ala matagofie lea e fa’ailoa ai lo latou agaga fa’afetai, ona sa latou fa’aaogaina lea fale ta’alo mo le ta’amilosaga volipolo na fa’ato’a mae’a atu nei.

 

“E le’i iloa e i matou o le a faia lenei foa’i e le ASVA, peita’i, ua fa’ate’ia i matou uma i le o’o mai o sui ma fa’ao’o mai lea foa’i taua. I le matou itu, i faia’oga o ta’aloga i Samoana ma le fanau a’oga, o le fa’afetai ua toe fa’ao’o atu, aua o lo’o totogia lava le pili e $500 e le Asosi mo latou ta’amilosaga e fa’atino i le fale ta’alo nei.” O se tala lea a le susuga Sila Sila, o le faia’oga o ta’aloga i Samoana High ma o ia fo’i e va’aia le Fale Ta’alo lea, e tusa ai ma lona tiute fa’atino mai le DOE.

 

Sa auai foi ma Selutoga Fuiava o le faia’oga o Ta’aloga ma le Soifua Maloloina i Samoana fa’apea ma le to’atele o fanau a’oga, sa auai ane e vali le tele o nofoa mo e maimoa fa’atasi ai ma le fale ta’alo ina ua mae’a taua’aoina apavali e le Asosi Volipolo mo i latou.

 

O le peresetene o le Asosi Volipolo, Savaliga Afu sa ia fa’ailoa atu ia Sila Sila, “O le agaga ole fa’afetai, aua e saili lava nofoaga e faia ai ta’amilosaga volipolo, ae le tali ese lava le a’oga a Samoana i so’o se taimi o le mana’omia o lenei Asosi, fa’afetai fo’i mo lena tulaga.”

 

O lo ua fa’ailoa mai, o le fonotaga i lenei vaiaso, o le seti ai fo’i le taimi e fa’amuta ai le fa’auluina o ‘au volipolo uma e tauva mo le Ta’amilosaga Volipolo Fa’avaomalo mo le Sisigafu’a 2014. Ua fa’atulaga lea ta’amilosaga e faia na’o le lua pe tolu aso o le vaiaso tonu o le sisigafu’a.

Comment Here