TALA i VAIFANUA

TAPUNIA PEA A’OGA A LE MALO - FAMA’I MATA

 

Ua fa’ailoa mai le Fa'atonu Sili o A'oga, Vaitinasa Dr Salu Hunkin-Finau, ma ua fa'ailoa mai, "O le a tapunia pea a'oga a le fanau e pei ona sa i ai, ona ua iloga mai o lo'o to'atele lava le faitau aofai o faia'oga ma tamiti a'oga, o lo'o afaina pea i le fa'ama'i mata."

 

"Ona o le manatu ia matua fa'amama i tatou uma mai lea fa'ama'i mata, ua lapata'ia ai, ia fa'aauau le taofia o a'oga mo le vaiaso atoa lenei, ona o lo'o fa'ateteleina le pepesi pea o le fa'ama'i mata,” o Vaitinasa lea.

 

O faia'oga uma, pe afai o lo'o maloloina o outou fofoga, auai mai e faigaluega i nei aso o totoe o le vaiaso, peita'i, afai o afaina ou fofoga, fa'amolemole nonofo i aiga ma togafitia ai ia le pesia nisi ia te oe.

 

Ua le maua i le taimi nei, se fa'ai'uga mai a'oga tua a le atunu'u, peita'i, e ao ina vala'au sa'o i ofisa o nei a'oga.

 

Fa’aalia e le Matagaluega o le Soifua Maloloina i le amataga o le vaiaso, "E le o asiasi uma mai tagata ua afaina mata i le falema'i mo se fesoasoani atu mo le togafitiga o latou mata, ua na'o nisi lava ua afaina tele ma ua umi ona afaina mata, ua matauina ua asiasi mai mo se fautuaga a foma'i mo i latou."

 

I se fa’aaliga i le vaiaso ua te’a sa taua ai e le Matagaluega o Aoga, e tusa i le 2,300 tamaiti aoga ua aafia i le fa’ama’i mata, ae 130 faiaoga.

 

TUPE AURO MO ‘ESETAOLEALOFAMONI SAVINI’

 

O le fa’ai’uga o le semina i aso e fa sa fa’atautaia mo le aufaigaluega a le Matagaluega o Puipuiga Fa’alotoifale o Amerika Samoa (ASDHS) i le aso 8 o Mati, sa taua’aoina ai e se tasi o sui faia’oga o lea kosi, le Tupe Auro e fa’amau ai le galuega na fa’atino e Esetaolealofamoni Savusa-Savini, mo lea matagaluega.

 

O le susuga Jason Ashworth mai le US Air Force, o se tasi o Faia'oga o lea Kosi mo le US Homeland Security, sa ia taua'aoina lea pine fa'amau fa'ailoga mo Savusa-Savini.

 

Ina ua taua'aoina, sa fa'alauiloa mai le auga tonu o lea Tupe Auro, "O le pine lea e fa'amau fa'ailoga ai le auaunaga mae'ae'a a le faletua o Esetaolealofamoni Savusa-Savini, i ona tiute fa'atino e tau feso'ota'i ai ni kosi aoga tele i le Matagaluega o le Saogalemu Fa'alotoifale  a Amerika Samoa ae fesoasoani malosi mai i ai le Matagaluega o le Homeland Security a le Malo tele."

 

O le tiute lea ua pa'u tasi atu i Savusa-Savini, "O feso'ota'iga fa'alea'oa'oga e a'otauina ai sui eseese o le Matagaluega ma isi Ofisa eseese o le malo e ao ina galulue fa'atasi mo le puipuiga o le Saogalemu Fa'alotoifale o Amerika Samoa ma ona tagata mai fa'alavelave fa'afuase'i fa'anatura, pe fa'aosofia fo'i e faiga fa'aterarisi e afua i nisi tagata fai mai i lo tatou lotoifale."

 

Na fa'afetaia e Savusa-Savini lea fa'aeaga taua, ma ia fa'ailoa ai, "Atonu o se mea lava lea e faia e nei matagaluega o le Malo tele, pe a o'o ina matauina, ua aga'i i luma taumafaiga e tima'i o tatou sui e tomua mai i galuega fa'aola ma fa'asaogalemu o tatou tagata i taimi e pagatia ai i fa'alavelave eseese e tutupu i le atunu'u. Ae fa'afetai ua taulia mu ma ve'a i faigamea.”

 

Na molimauina lea tulaga e i latou uma e silia ma le 40 na maua o latou tusi pasi i le kosi, "Va'ava'ai Toto'a ma Lipotia Tagata Fa'atupu Fa'alavelave”.

Comment Here