Tala i Vaifanua

TA’AMILOSAGA VOLIPOLO O LE FU’A

 

Ua tau fa’ai’ui’u  le Liki Volipolo na fa’atautaia e amata tapena ai tama ta’a’alo i lea fa’agatama ina ia lava saunia i latou mo le Ta’amilosaga Fa’avaomalo o le tatou Sisigafu’a 2014, ae ua fa’ailoa mai, e tele ‘au mai Samoa ua sauni mai mo lea fa’amoemoe.

 

“O le liki lea e saili siamupini nei i le fa’ai’uga o le vaiaso, e iloa ai ‘au o lo’o matua lava tapena, ae o le fa’agatama latou ia e se’e lava le manumalo i so’o se ta’amilosaga. Peita’i, o le fuafuaga lava lea na mua’i pasia, e faia le Liki Volipolo tele lea, ae a o’o loa i le aso patino i le sisigafu’a ma ona taualumaga e fa’ailoga ai, ona faia lea o le ta’amilosaga fa’avaomalo, ina ia tapena mai ai Tonga, Samoa ma Fiti pe a fia o’o mai.” O se tala lea a le susuga le Failautusi o le Asosi Volipolo a Amerika Samoa, Jose Afu Muasau.

 

O le ta’amilosaga fa’avaomalo ua fa’atualga mo  Aperila 16 e o’o ia Aperila 18. O le totogi mo le ulufale e $200 ma le pili e fa’atautaia ai le liki e $50. O le fonotaga i le aso i le maota o Gaisoa, 5:00 i le afiafi e talanoaina ai uma nisi mea, ma fa’aulu ai suafa o ‘au volipolo e fia ‘auai.

 

ASO FA’AILO GALUEGA ESE’ESE

 

O le taeao ananafi, sa fa’atasia uma atu ai vasega o Pisinisi a A’oga Maualuluga o le teritori i le Vaega o Kosi Pisinisi a le Kolisi Tu’ufa’atasi ina ia latou fetufa’i i mataupu e ao ina tau’avea, fa’atautaiga o latou galuega fa’atino fa’apisinisi, ae o ituaiga la’ei ma le va’aiga lautele e ao ina ola ai le tagata faipisinisi i aso ta’itasi o lana taumafaiga.

 

O a’oga na auai: Nu’uuli Vocational High, Tafuna High School, Fagaitua High ma Iakina Academy. O le a’oga a Kanana Fou High, Samoana High ma Leone High, ua toe fa’aletonu le auai ai ona o le tapenaga o le Speech Festival lea e fa’atasia ai uma a’oga maualuluga i le aso Faraile nei, ma ua fete’ena’i ai le taimi ua fa’atautaia ai le Career Day a le ASCC ma latou tapenaga maumaua’i mo lea fa’amoemoe.

 

Na fa’ailoa mai, ua fa’ao’o mai ni latou fa’anoi, ona o nei tulaga e le ma’alofia na le auai ane ai nei a’oga i le taeao ananafi. I le polokalama fa’asolo, sa leai se sao lava e tasi o Faia’oga o le kosi e to’atolu e fa’atautaia i le latou polokalama fa’ataoto, peita’i, e faia uma lava e le Laulauatofi a le Vasega o Pisinisi a le Kolisi le latou fa’amoemoe.

 

“O lea faiga, e tapena ma fa’aaoga ai fo’i e i latou a’oa’oga fa’apitoa ua mae’a a’otauina ai i latou ma fa’ailoa mai ai ia i matou o faia’oga, po’o aoga a’oa’oga.” O se tala lea a Dr Fa’atoafe e tusa o lea tulaga.

 

O Paul Peko o le peresetene, sa avea ma sui e ta’ita’i le latou polokalame mo le aso fa’apitoa, ina ua mae’a sa i ai avanoa o sui o le Pulega a le Kolisi, lea sa o’o ane ai Miss Moananu, e avea ma sui o le Peresetene o le Kolisi e faia se upu fa’amalosi i le fanau o aofia. “Ia aoga lenei aso e fa’aleleia atili ai o outou iloa patino o kosi e tou te manana’o e a’oa’o fa’apitoa ai outou pe a outou ulufale mai i le tatou Kolisi. Ua lava ma totoe le tapenaga a le Kolisi e aoao ai outou uma ia manuia o outou lumana’i.”

 

O le avanoa o le fa’aululuga o kosi pisinisi i le Kolisi, Dr Faofua Fa’atoafe sa soso’o ai, ina ia tima’i le fanau, i ituaiga a’oa’oga, ma mataupu e tau’avea i le kosi o pisinisi, ae maise o le aotelega o le tagata pisinisi, mai se va’aiga a le lautele ia te ia i taimi uma.

 

Na faia fo’i vasega e tolu na fesuia’i ai le fanau i ali’i ma tama’ita’i faia’oga e to’atolu mo kosi fa’apisinisi i le Kolisi. I le mae’a ai o nei vasega sa toe potopoto i latou uma na aofia, ma toe alu ai se latou asiasiga i le Kolisi Atoa e fa’amasani ai le fanau i mea o i ai lea ofisa ma le ofisa e tautuaina ai i latou.

Comment Here