Tala i Vaifanua

MALAGA TA’AMILO FA’AILI AIR FORCE

 

O le Fa’aili a le Air Force lea sa malaga ta’amilo mai mo le 4 aso i le teritori ua toe taliu atu nei i Honolulu lea e fa’amautu ai, ma le agaga ua matua fa’agae’etia lava ona e matagofie tele Amerika Samoa i le latou fo’i maimoa ma le latou fo’i malaga ta’amilo ai.

 

“E i ai taimi matou te asiasi ta’amilo ai i Singapore, Thailand, Niu Sila, Ausetalia, Tahiti ma isi atumotu o le pasefika, aua o la matou lea galuega e fa’atino, ina ia fa’atupu le va ma feso’ota’iga lelei o Amerika ma isi atunu’u matou te asiasi i ai.” O se tala lea a Noel, o le au fa’aili.

 

O le igoa o lea fa’aili “Small Kine Air Force Band” ma e fa’amautu lava i Hawaii ae o le isi vaega lua o le latou fa’aili tele, o lo’o fa’amautu lea i Iapani. O sui o lo’o auai i lea fa’aili o MSG Gary Noel, Tech.Sgt Michael Smith, SSG Troy Griffin, SSG Courtney Clifford, SSG Aaron Kusterer, Sr Airman Devin Rivas Martin, Srirman Brian Plank lea e ta bass. O i la’ua e pepese o le tama’ita’i e to’atasi o Courtney Clifford ma Devin Rivas Martin. O le ali’i Kalama o Troy Griffin, ae o le isi ta kitara o Aaron Kusterer ma Gary Noel.

 

Matagofie fo’i pesega sa fa’ai’u i ai le latou malaga ta’amilo, lea sa fa’atasi atu ai i le Maota o le Malo i Utulei, ma o i’ina sa o’o ane ai le Teutupe a le tatou malo, Dr. Falema’o ‘Phil’ Pili ma fa’aaoga fo’i se tasi o pese e siva ai, ae na uma lelei le fa’afiafiaga o lo’o fa’afofoga ma patipatia fo’i le sao o nei sui o le Air Force.

 

“E fou fo’i lenei lagona, le fa’alogologo i pesega matagofie ma le paleni fo’i o le taina o mea fa’aili, ae o lo’o faia galuega.” O se tala lea a se tasi o sui faigaluega i se tasi o Ofisa o le tatou Malo, ina ua fesiligia i sona lagona e tusa o le fa’aaliga.

 

E to’atele i latou na tu’ua galuega, ae maimoaina le sao o i latou nei, ma o se mea ua tatau fo’i ona faia, aua o se fa’aaloalo fo’i le latou agaga fia fa’asoa mai i lagona lelei o musika e o’o i le loto pe a e fa’afofoga lelei i upu o lo’o tu’ufa’atasia i se pese.

 

TUSI PASI MO LE ‘AU FAIFAIVA

 

O le aso Faraile ua te’a, na mae’a ai le kosi na fa’atautaia e le Matagaluega o Gataifale ma le Vaomatua e aoao ai le ‘au faifaiva o le atunu’u, ina ia iloa ona lipea afi o latou va’a fagota po’o Alia.

 

Sa maua tuai pasi o i latou na auai i lea kosi ma o tusi pasi, ua aoga lea mo fa’amaumauga o lenei fesoasoani taua, ma le isi, o le ulua’i vasega lea ua fa’atautaia ma ua agava’a mo nei fo’i fa’amanuiaga mai le Matagaluega. Ua soso’o fo’i lenei tufatufaga o manuia nei, ma le o’o atu o le matagaluega e faia lea lava a’oa’oga ma tufa fo’i nei lava fa’amanuiaga i le vasega o faifaiva i Manu’atele, ma e faia lea i le aso Lulu o lenei vaiaso.

 

O i latou ua umia nei tusi pasi: Komisi Sani, Togotogo Sotoa, Vitaliano Ioane, Taua Taua Jr, Fa’asali’i Iose, Ma’atulimanu Maea, Paepae Sini, Faialoa Tialavea Utumatu, Kitara Vaiau, Farani Makama, Katau Lin ma Nuuausala Suani.

 

Ua na’o maea sa taua’aoina i le faifaiva e tasi pe afai e tasi lona va’a, ae afai e lua va’a o le tautai ua mae’a laiseneina mo fagotaga, e fa’apena fo’i ona lua au maea. E pei ona fa’ailoa atu muamua, o le alagatupe mo lenei polokalama o lo’o fa’auia mai i se poloa’iga a Kovana Lolo Matalasi Moliga, ina ia fa’atulaga e le Matagaluega  se fesoasoani e toe fa’aosofia le fiafia o le ‘au faifaiva o le atunu’u e toe o e fagogota.

Comment Here