Tala i Vaifanua

SUIGA O LE ‘SEA HAWK’ FAUTASI

 

O le tala i le lomiga ananafi sa fa’ailoa ai, le suiga fou o igoa uma lava o Sa o le afio’aga o Nuuuli mai le “Satani” i le Manulele Tausala, ae ina ua maua fo’i se avanoa ma le susuga le Agaiotupu Maselino Ioane, sa ia fa’aalia ai ni mea sa ia suia mai le fausaga tuai o le “Sea Hawk” i le Sa ua i ai nei.

 

O le tasi o Sa o le Manulele Tausala, sa avea muamua ma fautasi o le “Sea Hawk”

 

“E 14 futu ua ‘ave’esea mai le va’a lea, peita’i, ua fa’aopoopo i ai le 4 laina nofoa ta’ilua i lona taumua, ma toe fa’apipi’i ona pine mo ona foe ua i ai nei.” O se tala lea a Ioane.

 

“E tusa ai ma le tino sa i ai o le va’a mai lona fausaga ai i Seattle,” ua fa’ailoa e Ioane, “Ua mae’a toe fa’amalo atoatoa le tino atoa o le va’a lea, ma ua agava’a fo’i mo le tai si’isi’i ma le louloua. O fausaga sa i ai e vaivai, e fetaui lava ma tai malu po’o folauga fo’i i luga o vaituloto.”

 

Ina ua saili le Le Lali e tusa o le igoa, “Sea Hawk” aua e le faigofie ona e fa’aigoaina ni mea i igoa ua mae’a maka fa’afetaua’iga e ni ‘au football a Amerika, pe aisea na sau ai le va’a ma lea igoa?

 

Sa tali le tama’ita’i foma’i, Dr Annie Fuavai, e tusa o lea tulaga, “E moni lelei, e tele se vaega tupe, ae maise o fetusia’iga ma fa’amaumauga fo’i a loia na saili i ai si tuagane fo’i i Seattle mo lea fa’amoemoe, ina ia fa’aigoa le Sa i le igoa lea ‘Sea Hawk’. Pe ana le uia nei ala uma fa’aletulafono, e le mafai ona aumaia le va’a ae ua mae’a tusia lona igoa lea!”

 

Ona o lea ua tu’uina ese le igoa, sa ia fa’ailoa mai, “Ua mae’a le galuega a Jack Fuavai ma le auuso i Seattle, o lea ua matu’u atu i le pulega a Ali’i ma Fa’asuaga o le afioaga o Nuuuli mo le fa’aauauina o lea tautua, ae ia mua le Sa lea, aua o lea e siamupini le Sea Hawk i le football a le NFL. O le lu’i lena ua i luga o le a’ai o finagalo fa’aalia!”

 

VAIASO O LE NUANUA

 

O le taeao ananafi sa fa’atasia uma ai lava ali’i ma tama’ita’i Foma’i i totonu o le atunu’u, i sa latou fonotaga fa’ale-galuega, ma ua fa’amalosia ai se latou ata tu’ufa’atasi ina ia pu’eina, e fa’amau fa’ailoga ai le latou “ulua’i masina” ua fa’ataua ai le latou auaunaga i totonu o Amerika Samoa.

 

Na fa’atulaga fo’i i latou uma ina ia ofu lanu ua mae’a atofaina e le komiti fa’afoe o le fa’apolokalamaina o le latou masina ma mea e fa’atino ai, ina ia taua ia i latou uma le galulue fa’atasi, usiusita’i i poloa’iga, ma ia iloa ona faia le galuega ma le ava i le ola o tagata lautele o lo’o latou togafitia.

 

O lanu sa tofia sui foma’i ta’itasi ia laeia, na tino mai lea tulaga i le aso ananafi, ma ua fa’atulaga fo’i i latou e tusa o lanu uma o le Nuanua. Ioe le Nuanua o lo ua fa’ailo ai le “Fa’amoemoe” i le Ese mai lea, ua fa’aula ma fai’aiga foma’i i vaega eseese o le falema’i tele ma falema’i i itumalo uma lava, e latou tausima’i ma e o latou galulue i lenei masina atoa.

 

Mai le vasega o nei foma’i uma ua laulaututu mo le latou ata, ua molita’i mai le latou fa’afetai tele!

Comment Here