Ads by Google Ads by Google

Tala i Vaifanua

FA’ATAUA AUAUNAGA A FOMA’I

 

O lo’o fa’aauau pea le poloa’iga fa’alaua’itele a le afioga i le Kovana Sili ina ia fa’ataua e i tatou auaunaga a ali’i ma tama’ita’i foma’i i totonu o le teritori.

 

E ese mai lea, ae ua sagai ane le Asosi a Foma’i, ma fa’ataua e i latou nai avanoa laiti e mafai ai ona faia a latou fa’atinoga o lea fo’i poloa’iga. “O le aso Lulu nei, e faia ai se matou fonotaga masani i le ‘Nurses Villa” ma ua fa’atulaga ina ia laei uma e i matou lanu ua atofa mo vaega eseese o le falema’i o lo’o faigaluega ai Foma’i ma tausima’i. Ua fa’aigoaina lea, o lanu o le Nuanua, lea e fa’aatagia ai le fa’amoemoe o so’o se tasi e ola pea,” o se fa’apupulaga lea a le tama’ita’i Pule i Foma’i Dr. Annie Te’o Fuavai.

 

Ma o le aso Faraile 29 Mati, 2014 ua fa’atulaga ai se siva tele e faia i le Lee Auditorium, ua fa’atautaia lea e le Komiti Fa’afoe a le LBJ ma le Fa’atonu o le Matagaluega o Soifua Maloloina, o se fiafia e fa’ailo ai le agaga fa’afetai o le Komiti ma le Fa’atonu i le auaunaga a foma’i uma o galulue i Amerika Samoa.

 

“Ona o le ulua’i tausaga lenei ua fa’ataua ai le auaunaga a foma’i i le teritori, sa faia ai fo’i le aso mo Foma’i ma latou aiga i le aso To’ona’i ua te’a nei, ma sa fa’atasia uma ai i le malae o Suigaula a le Atuvasa i Utulei mo le aso atoa. Sa ta’e’ele fiafia ma fai’aiga ai lava i’ina, ma sa silia ma le 200 sui na auai e aofia ai foma’i ma latou aiga, ae maise o uo mamae a i latou na vala’aulia,” o le saunoaga lea a Dr. Fuavai.

 

Ua fa’ailoa mai faapea, o  le aso Sa o lo’o muamua nei ua faatulaga o foma’i uma lava e tiute i le falema’i  i Faga’alu, o le a maua fua le latou malu i le taeao, ‘aiga o le aoauli, fa’apea ma le ‘aiga i le afiafi. Ua saunia lea fa’aeaga e le Pulega a le falema’i.

 

“O le ‘auga lava o le auaunaga, ia fa’asaoina le soifua o le mamalu o le atunu’u o mo’omia le soifua maloloina, peita’i, o le galuega fa’aola o lo’o i a’ao mamana o Iesu, pau le matou galuega, o le fa’auia o lana fa’aolataga e ala i o matou lima fa’atauva’a ma se tomai ua a’otauina ai, a’o le soifua fa’afualoa, e toina mai le Fa’aola o tagata uma lava,” o a Fuavai lea.

 

A’OGA KUKA MA TUI TEU

 

Ua toe amatalia le isi vasega fou mo i latou uma e fia auai i A’oa’oga o Kuka a le Matagaluega o Talavou, Tina ma Tamaita’i. O le aso ananafi lea na fa’atulaga e toe amatalia ai le vasega lea mo le isi valu vaiaso.

 

E le gata i lea, ae ua mae’a fa’ailoa atu fo’i e toe amatalia le isi kosi o le Tui Teu i le aso, 25 Mati 2014 ma e ma’ea i le 10 Aperila, 2014.

 

O le tomai tui teu, o se tasi lea o agava’a e mo’omia tele mo le isi kosi o lo’o fa’aauau nei, “Tali Malo Lelei.” O tomai nei e mo’omia ona agava’a ai oe i le galue ai i se faletalimalo pe amatalia fo’i sau oe pisinisi tumaoti, e aga’i atu i ai nisi e mo’omia ni teu fugala’au mo asiga i falema’i, taligamalo po’o teuga o falesa ma maota o aiga i fa’alavelave tetele a aiga potopoto.

 

Afai o lo’o mo’omia ona e ofi i le vasega tui teu o soso’o mai, o’o ane i le nofoaga “Lavea’i Lau Gagana Center - Malaeloa” Ausage Building mo sou avanoa a’o le’i amatalia lea vasega.