Ads by Google Ads by Google

Tala i Vaifanua

TINA FA’AU’U VASEGA TUI TEU

 

O le aso Tofi na te’a nei, sa fa’atautaia ai e le Matagaluega o Talavou, Tina ma Tamaitai le fa’au’uga mo tina e to’a 29 ua mae’a le 8 vaiaso o a’otauina i le taleni “Tui Teu.”

 

O lea a’oga sa a’oa’oina e Malia Masalosalo, ma ua lua ai lenei o tausaga o fa’atautaia lea vasega, ina ia fesoasoani i le vasega o tina, i le tele fo’i o tapenaga mo taligamalo, aso fa’apitoa o latou aiga, ofisa faigaluega ma ekalesia i le teuina o malumalu.

 

“O le tele o fugala’au mai o’u togala’au, sa matele ina o mai isi ma avatu i ai, ae ua maua nei lea tomai, o le a fa’aaoga tatau fua o la’u togala’au e tui ai teu mo lo’u fale, mo lo’u aiga i fa’alavelave aemaise lava la’u teuga falesa ma se teu mo le Faifeau.” O se tautinoga lea a Fa’avavau Fa’atau, ose tasi o tina faauu.

 

O se isi mea ua iloga i nei a’oga, ua le gata ina fa’aaoga fugala’au e masani ona fa’atulaga ai teu matagofie, ae ua fa’aaoga fo’i so’o se mea ua maua i le si’omaga. “Ia fa’aaogaina nei mea, e gaosia ai teu, pe afai e ausage se aiga, e leai ni togala’au, ae ua na’o lau o la’au ma nei mea o maua i o latou aiga.” O se fa’amatalaga lea a le tama’ita’i faia’oga.

 

O Makerita Laumatia sa faia le fa’afetai a le vasega, ma sa ia tima’i ai ia Malia Masalosalo, le faia’oga, ina ia to’aga pea e fa’asalafa lona silafia, e toe fa’ateleina ai e le Atua lona tomai.

 

O Rev. Maua Su sa ia ta’ita’ia le sauniga i le tatalo ma toe fa’ai’uina, ae o ia fo’i sa molita’ia mai se fe’au taua i le vasega fa’au’u, “O le Atua e malie ai lou loto i mea lelei! O nei sailiga uma tatou te auai i ai, o mea lelei, o galuega fo’i ia e ao ina tatou fa’afiafiaina ai lo tatou Matai, pe a mae’a ona tatou saili ma fa’amautu, e aoga i o tatou olaga ma nisi i le lumana’i.”

 

FA’AI’U TA’AMILOSAGA PI’IGA OCEANIA

 

Na toe fa’amanuiaina fo’i le taumafaiga a alo o Amerika Samoa sa tauva i Pi’iga Fa’avaomalo a le Oceania, lea na fa’aiu i le aso Faraile ua te’a. O le tala mai e leai se ‘auro na toe maua a i tatou i le vaega o Seniors, ae na’o le siliva e tasi ma pine apamemea e lua i le ituaiga pi’i o le Free Style.

 

Mai le vaega o Juniors sa maua ai Pine Auro e lua, 4 siliva ma le 9 apamemea. Peita’i mai le vaega o Cadets na fa’amanuiaina ai le tatou a’u pi’i i le Pine Auro e tasi, 5 siliva ma le 9 fo’i latou pine apamemea. O se taumafaiga sili lea ona matagofie ua faia e le tatou au pi’i, ma ua tatau fo’i ona ave le fa’afetai i le tatou Asosi o Pi’iga ma le malo, aua o se taligamalo matagofie ma ua tali fo’i le taumafaiga a le fanau i se tulaga ese i lenei tausaga.

 

Pe afai e tu’ufa’atasia uma pine auro mai le amataga se’ia o’o ina fa’ai’u i le aotelega o nei vaega uma e tolu, ona tula’i mai lea o Auro e 13, 35 Siliva ma le 43 Apamemea mo Amerika Samoa.