ASIASI VAEGA PISINISI ASCC NIU SILA & SAMOA

Ua taliu mai i fanua le malaga asiasi i pisinisi a le Vasega o mataupu Fa’a-Pisinisi a le Kolisi Tu’ufa’atasi, ASCC, sa tu’ua ai le atunu’u mai le aso 4 Mati, ae toe to’ai taunu’u mai i le aso Faraile na te’a nei.

Mai le 10 aso sa latou malaga fa’apitoa ai, na tu’uva’a sa’o lava i Niu Sila ma fa’aalu ai le lima aso o le latou malaga, sa nonofo fo’i i faletalimalo i Aukilani, ma fe’avea’ia i latou e pasi tetele a lea faletalimalo i so’o se nofoaga sa latou mua’i fa’atulaga e asia.

“O le fale ‘aisikulimi a le Tip Top ua mae’a matou asia, ma ua tu’u ai fo’i matou meaalofa, i le pulega lea, o mitiafu o le tatou Kolisi ma ipu inuti o lo’o tusia ai le igoa ASCC ma lona tuatusi i’inei,” o se fa’apupulaga lea a le faia’oga Dr Faofua Va’apu’u Fa’atoafe.

E tolu kamupani tetele sa latou asia, e aofia ai ma le latou malaga solo i va’a e maimoa i mea ua fausia, ituaiga fale ua fa’atutuina ai pisinisi, ae maise o tetele o falegaosioloa, e matua tulaga ese fo’i lea malo.

“E tele se eseesega o lo’o i ai falegaosioloa a Niu Sila ma Samoa, e matua leai se mea e fa’aletonu i le gaosiga, e o’o i le taimi e pa’u mai ai le oloa ua mae’a gaosia, e le tatau ona tuai lona taimi fa’atulaga, a tuai e le aoga lea oloa! O le tulaga lena i Niu Sila, ae o Samoa, e fa’aaoga mea ua tatou maua, ma e le tele se saogalemu o mataituina ai!” O se fa’amatalaga lea a se tasi o le vasega e tusa o se mea ua ia matauina mai i lenei malaga.

A’o le’i malaga lenei vaega o le fanau e to’aiva, sa latou mua’i faia se ‘aiga fa’amavae ma matua ma talosia le latou malaga ese atu. Peita’i ina ua fa’ato’ai mai i fanua, sa latou tafafao fa’atasi i le Country Club e sami ai le malaga manuia, ae toe faia le aiga e fa’afetai ai i le tapua’iga a matua, ma tufaina atu ai latou meaalofa mo i latou, mea sa latou saunia a’o malaga.

“O le fa’afetai e ave i le tina faia’oga, leai se mea o tupu i le fanau, ma ua maoa’e fo’i se iloa ua maua e le fanau i le saili i mea lelei e atina’e ai lo latou atamai i nei kosi o tau’avea i a’oga, ae sili le fa’afetai i le Atua ua toe to’ai taunu’u manuia mai i aiga.” O se saunoaga lea a se tasi o matua, Tavu’i o Pago Pago.

I le malaga i Samoa e fa pisinisi sa asia ma o’o fo’i i Salafai le aumalaga uma, ta’amilo i le motu o Upolu ma toe taliu mai ai. “O mea uma sa asia e le fanau, na fa’ataunu’uina uma lava le fuafuaga sa fa’ataoto mai le amataga, ma ua iloa lelei e i latou, fa’asoa le tupe, ia le so’ona fa’aalu fo’i, ae ia fuafua tatau e tusa o le paketi na atofa.” O se tala lea a le faia’oga.

TA’AMILOAGA PI’IGA OCEANIA

O le taeao o le aso Lulu na potopoto ai le mamalu o atunu’u eseese o lo’o molio’o mai o latou sui ta’a’alo, faia’oga ma fa’atonu i le Ta’amilosaga Pi’i a le Oceania lea e talimalo ai Amerika Samoa, ma e ma’ea i le aso lenei lea ta’amilosaga.

O le Matagaluega o Tupulaga, Tina ma Tamaita’i o lo’o so’oso’o tau’au ma le ASNOC fa’apea le Asosi o Pi’iga a Amerika Samoa mo lea fa’amoemoe. O atunu’u o lo’o auai i le ta’amilosaga e aofia ai Amerika Samoa, Ausetalia, NiuSila, Tonga, Palau, Guam, Solomona, CNMI, Atu Malesala, Nauru, Kiribati ma FSM po’o le atu Maikorenisia.

Ua va’aia e i ai atunu’u e ta’ito’atasi o latou sui o malaga mai, Tokelau, Solomona ma Tonga. O le o’o mai o i latou nei, e matua taua tele i le silasila a le tatou fo’i taligamalo, ma ua fa’ataua e i latou lenei avanoa lelei e fa’aleleia ai tomai o latou talavou i lea fa’agatama.

O saunoaga o le taeao sa fa’aauga lava i le fiafia ma le fa’afetai aua o nisi ua malaga mai, ua maua ai le avanoa muamua o Amerika Samoa e talimalo ai. O nisi o tala fiafia ua lagona, ua tumu lelei le faletalimalo o le Sadies i Fagatogo ma Utulei, ona ua nofoia ai au malaga e to’atele, aua e latalata i le Lee Auditoriu mo tauvaga.

O le aso muamua o le tauvaga sa maua e Amerika Samoa pine auro e lua, 8 siliva ma le 2 apamemea. O ia foi alo o le atunu’u o le a malaga i Saina mo le tauvaga ia Aukuso 16-24, 2014.