TAUSIA LOU SOIFUA PALENI -  TINO & MALOSI

Ua lava tapena nisi o sui iloga i le tulaga o “Fa’amalositino mo lou soifua paleni toe maloloina,” e ala i lou mamafa ma lou umi ina ia talafeagai i taimi uma ma le atoaga o lou malosi atoatoa.

“O le ki i lou soifua paleni lelei, o lou malosi atoatoa, ma lou mamafa ia paleni ma lou umi, e ao ina lava lau fa’amalositino, ia fa’aalu ese ai le afu mai mai le tino, o le suavai e tatau lava ona ‘ave’esea!” O se tala lea a le tama’ita’i o Ursular Te’o Martin i le taimi o lana a’oa’oga fa’apitoa mo le fanau a’oga i Tafuna High, a’o tima’i o ia i le fanau e to’a’aga e fa’aafu ma fa’amalositino e le so’ona mamafa ai o latou tino talavou.

Lea fo’i ua fa’ailoa atu e ia, “O le ituaiga tusi pasi sa ou maua, e mafai ai ona ou su’esu’e i lou tino, ma o’u fa’atulaga ai ni ituaiga o fa’amalositino ma le umi e te fa’amalositino ai, e tatau fo’i ona suia i si ituaiga, ae ua gafatia e lou tino ona feso’ota’i lelei ma lou malosi e fa’atino ai isi fa’amalositino e soso’o mai.”

Na fa’atino e Te’o Martin ma ana fesoasoani ni fa’amalositino e aoga mo vae, aoga mo le manava, toe aoga fo’i mo le fa’agasologa o lou toto ia fa’aleleia atili ai lou fatu. Na va’aia le fiafia i le fanau talavou i fa’amalositino e talafeagai ma vae, ae o’o loa i le manava lea e tatau ai ona lelei lau “sit ups” matua oti lava lea fa’amalositino.

O le fautuaga, o le aoga lea o le su’esu’e lelei o lou malosi, ma ituaiga fa’amalositino e amata ai lau taumafaiga, ina ia e le fa’ama’amulu i se mea e lelei mo lou soifua maloloina paleni.

Afai e faigata ona e o’o atu i le ASCC Land Grant Wellness Center i Malaeimi, va’ai pe maua sou avanoa i le “Tae Bo” lea e fa’atautaia i le Tauese Center i Utulei e le tofa Apulu Veronika Mortenson ma lana vaega. O le fa’amatalaga a le tama’ita’i, “O le fogava’a e tasi!” O lona uiga e tasi lava lo tatou fa’amoemoe ina ia fa’aleleia lo tatou soifua maloloina paleni, ae tutusa fo’i le fa’amalositino mo tagata uma, e laugatasia i le fa’amalositino e saili malosi o le tino paleni.

FA’AFETAIA KOLUSE MUMUA FOA’I ALE LAUTELE

E $28,180 le aofa’i atoa o le tupe ua tauaaoina e le Koluse Mumu i Amerika Samoa mai foai a le lautele e fesoasoani atu i le atunu’u o Filipaina lea sa a’afia tele o latou tagata i le Afa tele o Haiyan.

O le aofaiga o le foa’i sa taua’aoina atu e le Sosaiete a Tagata Filipino i Amerika Samoa e $17,000; ma le foai a tagata faigaluega a le malo o Amerika Samoa e $10,000 e ala mai lea i se lagolago sua a kovana Lolo Matalasi Moliga.

O le isi foai e $1,180 sa aoina mai i nisi o le atunu’u sa foai sa’o lava i le Koluse Mumu aua lenei fa’amoemoe.

“E avatu le fa’afetai tele a le matou komiti fa’afoe mo le Koluse Mumu ona o le foa’i sa taua’aoina ua taulimaina ma le fa’afetai, ma le agaga fa’agae’etia, e mautinoa o lenei seleni tele, o le a sili ona aoga moni lava mo i latou o lo ua pagatia i lenei fa’alavelave fa’anatura tele, le afa o Haiyan, i Filipaina,” o le saunoaga lea a Vaitoa Hans Langkilde, taitai fono o le Koluse Mumu i le terittori.

“O lau foa’i ma lou agaga fia fesoasoani, ua sili lea ona taua i lo so’o se mea ua tatou fia fa’ao’o atu mo i latou, e tausoa fa’atasi ai i o latou puapuga ua ola ai nei. Tau ina ia fa’aaogaina e i latou lenei tupe ma toe fa’aleleia ai lotoifale o latou aiga i le alofa ae molita’i atu ai fo’i se fe’au o le alofa i o latou tagata soifua. Fa’afetai tele! Salamat Po,” o upu fa’aopoopo ia a Vaitoa.