FUSUAGA: MALO NEI 'YAMANAKA' IA 'DARCHINYAN'

Ua malo nei le ali'i Iapani o Shinsuke Yamanaka i le ali'i Ausetalia o Vic Darchinyan i 'ai i le po o le aso Faraile.

I le fusuaga na matua'i malo ai lava Yamanaka i 'ai i le ali'i lea e sau mai i Ausetalia o Darhinyan lea na ia lu'iina le fusi i le lona puipuiina muamua lava o lana fusi.

Na 'au'au fa'atasi ali'i fa'amasano e tu'u atu le malo ia Yamanaka ina ua uma le fusuaga, 117-111, 116-112, 116-112, ua avea lea ma mea ua i ai le lekoki i le 16-0-2 11KO, ae o le Ausetalia ua se'e atu nai lona rekoki, 37-5-1 17KO.

Fai mai Yamanaka, "O le ma fusu'aga na tu'u sa'o lava i le mea na ou mana'o i ai. I le tele o le ma fusu'aga, na ou iloa na lavea lelei le ali'i Ausetalia i le tele o taimi, a'o o le malosi lava lea na tu mai i o'u luma i le tele o taimi."

O le puipuiga muamua lea o lana fusi, lea na malo mai ai i lana lu'iina o le tama Mexico e suafa ia Christian Esquivel i le fusi WBC i le paga mama o le Bantamweight i le tausaga lea ua te'a, ia Novema 2011.

I ta'amilosaga i le amataga o le fusuaga na vave ona ia osofa'i ai le Ausetalia, a'o le ta'amilosaga e 5 na vaaia ai le ta'e  o le mata o le Ausetalia ina maua lelei i lana agavale.

Na o'o fo'i i le ta'amilosaga lona 11, sa toe maua ai fo'i le Ausetalia lea e le Iapani, i le isi fo'i tu'i oti ae na sefe e le logo ina ua ta mai le logo.

I le po lava lea, na fetaui ai fo'i le isi siamupini o le Iapani i le paga Super feathweight  Takahiro Aoh, i le tonu lava lena na fa'amanatu ai lona aso fanau.

Sa fetaui ma le ali'i lea na lu'iina e sau mai Thailand o Terdsak Jandaeng, o lea na malo ai le tama Iapani i 'ai i le ali'i Thailand, na ua me'i atu nei lana rekoki i le 23-2-1 10KOs, ae me'i mai le rekoki a le ali'i faiaina lea i le 46-4-1 31KOs.

 SUPER 15:

Ua tele le faitioga a le fai nusipepa ma isi tagata i Aukilani i le faiaoga o le latou 'au lakapi o le Auckland's Blues, ma ua o'o lava i upega tafai'ilagi (internet) le le malilie o tagata o lea 'aii.

Ua o'o lava i le fa'ailoga lanu o latou fa'aupuga ua fai i le latou faiaoga o Pat Lam, ua lau le Samoa, ua fai mai e sese le tagata lea na malo i le sailiga o se faiaoga.

Ua tele lava tusitusiga e uiga i le leaga o le 'au o Aukilani, ao le mea e leaga ai, e le'o ta'aalo le faiaoga na'o le 'aoina o le 'au a'o tusitusiga lea ua fai e tagata ua tua'i lava na o le faiaoga o Pat Lam.

O le mea e leaga ai, ua tuai uma i le faiaoga, ma lau le pito Samoa o si tama faiaoga.

E leai ni tala na faia ia Pat Lam a'o faiaoga i le Auckland Blues i le NPC, sa fai mai muamua ua sa'o le pikiina o Pat Lam i le 'au a Aukilani i le Super 15.

A'o lea ua fai mai e sili ai ona aua le pikiina Pat Lam, ua alu solo i aupega-tafa'ilagi ua o'o lava e Peretania nisio tusitusiga e faitio i si tama faiaoga lea o Pat Lam.

Ua aliali lava i 'i le fa'ailoga lanu o tagata papalagi i atunu'u o le Pasefika, "Ua leva ona ou iloaina le mea nei o le fa'ailoga lanu o tagata papalagi i tagata mai i le Pasefika," o le fa'amatalaga lea o le ali'i ua leva ona ta'alo ai mo Aukilani o Papaali'i 'Fats' Fatialofa.

I lona fo'i ia vaitaimi o ta'alo, e 72 ta'aloga mai i le tausaga 1985-1993, i le 'au a Aukilani, ma o ia o le kapetenia le Manu Samoa i le Ipu o le Lalolagi i le tausaga 1991.

Na fa'aalia fo'i lona iloa le laua mafutaga ma Pat Lam, o le lelei ia o le mafutaga e talatalanoa i mea i metotia i le faia i le 'au a Aukilani, e fesoasoani fo'i i mea uma lava e manaomia e le uso ia Pat Lam.

"O le mea lava lea e iloa ai le lotovale o tagata palagi i tagata Pasefka, e tau mafai lava e tanumia i lalo le taleni ae maise ai lava le ta'aloga lea o le lakapi. Va'ai i isi ta'aloga ua siamupini lava tagata Pasefika e so'o se ta'aloga lava o i ai nei, pei o fusu'aga, si'isi'iga uamea mamafa, i so'o ta'aloga lava e faia i'inei e Niiu Sila. A'o le mea la e leaga ai, o le tiga ona i ai tamaiti ua leva na tatau ona aumai i le 'au vaega,e muamua lava su'e mai se tagata papalagi po'o se Maori.

Vagana ua leai lava se tagata e mafaia le tama Samoa, Tonga, po'o se Fiti ia ona aumai loa lea o le tagata Pasefika, aua ua leai lava se tagata e mafaia nei tama o le Pasefika.".

O le faitioga ia o tagata Aukilani o lo'o faia nei i le 'au a Aukilani i le tausaga nei, ina ua 7 ta'aloga ae na'o le tasi le malo a le latou 'au.

Fa'aliliuina e Toleafoa Haserota Auva'a