Tala i Ta'aloga

VEVESI ALAN JONES MA ROBBIE DEANS

O se vevesi na tulai mai i le va o le alii faasalalau televise i Ausetalia o Alan Jones ma le faiaoga o le au lakapi a Ausetalia, le Wallabies ia Robbie Deans, na mafua mai ina ua faapea Jones i se tasi o ana ripoti, “o le au a Ausetalia e lelei uma tagata o loo taaalo ai, peitai e sese le faiaoga o loo taitaia le au.”

O le faasalalauga a Jones na faia lea i le taimi lenei ua alo atu ai Niu Sila ma Ausetalia i le la Ipu masani lea e faia i tausaga uma lava.

Na taua e Jones e faapea, e ofo lona loto ona o le toatele o tama tuai lakapi a Ausetalia o loo i ai, o nisi e lelei ma atamamai i le taaloga, ae le iloa pe aisea ua filifilia ai Dean mai Niu Sila e fai ma faiaoga o le Wallabies.

Sa ia taua foi, e moni lava ua leva ona avea Dean ma faiaoga i le lakapi, ae leai lava se au na iloga ona lelei i lalo o lana taitaiga. Fai mai le alii faasalalau lenei, ana le alu ese Dean ma le au a le Canterbury Crusaders lea ua leva ona avea ai o ia ma faiaoga, e le tulaga lelei le au lena a Niu Sila.

“E leai se isi au e mafai ona faafetoaia le tomai ma le lelei o alii nei o Quade Cooper ma Kurtley Beale pe ana faapea e oo mai lava i le taimi lenei o loo taaalo faatasi pea i le au,” o le tala lea a Jones.

Ua amata nei i le vaiaso lea te'a atu nei, le Rugby Championship e sui ai le Tri-Nations, i le va o Niu Sila, Ausetalia, Aferika i Saute ma Agentina, lea na malo ai Aferika i Saute ia Agentina i ai e 26-6, ae malo Niu Sila i le la ta'aloga ma Ausetalia i ai e 27-19.

O le vaiaso lenei, e toe ta'aalo ai Niu Sila ma Ausetalia i Aukilani, ae o Agentina ma Aferika i Saute i Agentina.

FAAILOA MAFUAAGA O LE MALIU O LE ALII FUSU O JOHNNY TAPIA

Santa Fe, New Mexico. (Reuters) - I suesuega sa faia i le maliu o le alii fusu logologoa o Johnny Tapia ua taua ai, na mafua ona maliu lenei alii fusu ona ua sese fualaau sa ia inuina.

O Tapia, 45 tausaga le matua na maua atu ua maliu i lona fale i Albuquerque i New Mexico. E faalima ona avea Tapia ma siamupini o le lalolagi i le aupaga sa fusu ai, e aofia ai le super flyweight, bantam weight ma le feather weight.

O talaaga o lenei alii ua taua ai e faapea, e maliu le tama o Tapia ae le’i fanau mai o ia, peitai ina ua 8 ona tausaga, sa tagatavaleina ai e se tagata lona tina, ona ola mai ai lava lea na o ia i lona olaga atoa, seia oo ina avea ma tama fusu tautaua i le lalolagi.

TAALO DWIGHT HOWARD I LE LAKERS

O le alii taalo i le taaloga o le Basketball i Amerika ia Dwight Howard ua faamaonia mai lona sauni atu e taalo mo le au a le Lakers i le taamilosaga a le NBA o le a faagasolo i ni nai aso e le o toe mamao.

E ui i le tele o taumafaiga e tau aveese atu isi tama a le Lakers ona o le taumafaiga lava ia maua mai nisi o tama lelei, peitai o lea ua faia le faaiuga a le pulega o le taaloga e taalo Howard mo le Lakers, ae alu le alii o Chris Paul i le Clippers.

Na taua e le sui tuai a le Lakers o Kope Bryant e faapea, poo ai lava e filifilia i le Lakers, o se tulaga lelei lena mo ia, pau lona faanaunauga, ia masani ma fealofani i soo se taimi e taaalo faatasi ai.

fa'aliliu e Toleafoa Haserota Auva'a

Comment Here