Ads by Google Ads by Google

TALA I TA'ALOGA

O LE A SE TALI A SBW I LE ALL BLACKS

E o'o mai i le taimi nei, o lo'o fa'atalitali pea tagata Niu Sila i se fa'amatalaga e tu'u sa'o i le fofoga o Sonny Bill Williams pe uma le Super 15, lea ua toe o se ana ona fa'amae'a lea. Aua ua toe maua mai fo'i le ofa o le Lakapi Liki lea e ave ma SBW pe'a afai o le a na ia taliaina le latou ofa, ae ua toe maua mai le ofa a Iapani ua toe sui fo'i le latou ofa, mo le sefulu lua masina e tu'u atuai le $3 miliona.

Ua amata ona feitai isi tagata Niu Sila i faiga a atunu'u nei ia a latou 'au lakapi, e i ai le Rooster mai Sydney, ma le 'au lea a Iapani. I le tele lava o 2nd 5/8 a le All Blacks sa i ai muamua, fa'atoa vaai lea lea i se tagata e matua lelei i le pasiina o le polo lakapi, pe o le 'off-loading' pe lima tasi, e mafai a na pasi le polo i so'o se itu lava, taumatau, agavale, pasi i luga po'o le tu'u mai fo'i i lalo.

Ina ua sau i le 'au a Waikato Chiefs, o lona faiaaoga lava na o Wayne Smith se feagai ma le taumafaiga o le 'off-loading' lea na sau SBW i le vaitaimi o ta'alo ai i le liki, lea na ofo uma ai tagata lakapi ia SBW. O le tau fa'asaosao lava lona taimi tonu e fai ai lona 'off-loading' lena na faia e si faiaoga Wayne Smith, ina ua maua loa la, pei lava ua maoa'e le iloa o Sonny Bill Williams i lona faia fo'i o lea ituaiga pasi.

E le'i i ai lava se isi pei o SBW e faia le mea tonu ua fa'aigoaina ai o ia, ona o le taimi muamua lenei ua vaai ai tagata i se 2nd a le All Blacks o ia faia ia gaioiga. O le mea lena ua mumusu ai tagata Niu Sila e toe alu ese SBW, e fai o le lelei o le ta'alo ae lelei foi le pu'e ma le puipui.

E le fa'apea lava ua sao ai se isi ia SBW pe a o'o i le taimi e puipui mai ai. O se tagata ua mata'utia lona lelei i itu uma, i taimi uma lava se'i o'o ina uma le taimi o le ta'aloga. Ua tauanau nei e tagata o le atunu'u ia faiaoga a le Chiefs o Dave Rennie ma le faiaoga lagolago o Wayne Smith ma le isi faiaoga a le All Blacks o Ian Foster, ia latou faia se mea e alu ai SBW pe'a uma le ta'amilosaga o le Super 15.

Aua na o le pau lena o tagata e malamala lelei i uiga o SBW, manatua fo'i na sau SBW i le lakapi Iuni ae o le konekarate sa ta'alo ai 'au liki i Ausetalia.

FUSUAGA: FAIAINA THOMPSON IA KLITSCHKO

I le fusuaga lea na faia i Switzerland i le po o le Aso To'anai, lea na puipui ai le fusi o le Heavyweight o le WBA, IBF, WBO a le ali'i siamupini o Wladimir Klistchko o Ukraine ia Tony Thompson o le USA. Na taofia le fusuaga i le ta'amilosaga ono ina ua vaai atu le laufali ua le mafai lava se mea e le Amerika ua tau tonu lava le taumatau a le siamupini.

O le fusuaga lea na faia i le po tonu na atoa ai le 68 tausaga a Emanuel Steward le faiaoga a Wladimir Klitschko, ma o lea ua atoa ai nei 58-3 (51KO) Klitscko, ae o lea la ua se'e mai le ali'i Amerika i le 36-3 (24 KO). I luma o le 22,000 afe tagata na o atu e maimoaina lenei fusuaga i le malae soka.

O lenei fusuaga na fa'alua ona pauua i lalo le Ukarine ma le Amerika i fusu pi'i o le Amerika, ae o'o loa i le ta'amilosaga lona lima, maua lelei ai e le Ukraine le Amerika ma faitau ai upu. O le ta'amilosaga e ono, na toe maua ai le 'auvae o le Amerika o Tony Thompson ma na alu fa'atevateva solo i le la fusuaga, ma na iloa atu e le laufoli ua tatau ona taofi le la fusuaga.

Fai mai Thompson, "E le te'ite'i siamupini lenei ali'i, e umi, toe lelei le vaai, ma toe sauniuni lava i taimi uma, ou te to atu lo'u pulou i le siamupini." O le tasi o le 'au-uso lenei e siamupini fo'i i le latou paga o le Heavyweight i le fusi o le WBC.

TOE MANUMALO MONITO DONAIRE IA JEFFREY MATHEBULA

O le ali'i siamupini o le WBO Monito Donaire ma le siamupini o le IBF o Jeffrey Mathebula mai Aferika i Saute lea na tau ave ifo uma o la fusi e fetauai ai i le po o le Aso To'anai i L.A.

Na matua'i fai nofo lava e Nonito Donaire ia le ali'i o Jeffrey Mathebula i lena po, e fai o le 'u'umi o ona lima ma le masau, ae umi sao i luga, ma na fiu ai le Aferika i Saute e tau fai sana sikaili i lena po.

E manumalo uma lava i ta'amilosaga le ali'i o Nonito i 'ai ma le vaai a ali'i fa'amasino, ma o lea ua ia umia uma foi o le le fusi IBF, ma le WBO i le latou 'au-paga o le Lightweight.

fa'aliliina: Toleafoa Haserota Auva'a