FA'ATALITALI NIU SILA I SE TALI A SBW

Ua fa'atalitali nei le Iuni lakapi a Niu Sila po'o fea o le a i'u i ai le faaiuga a le alii taalo o Sonny Bill Willlams (SBW) mo le tausaga lenei, pe o le a fa'aaoga lana konekarate lea na o mai ai le 'au lakapi liki o le Sydney Roosters mai i Ausetalia mo le tausaga e tasi, po'o lana konekarate lea na o mai ai sui o le Panasonic mai i Iapani e tau atu ia Setema e o'o atu ia Ianuari i le $1 miliona.

Atili ai fo'i i le latou faato'ilaloina o le au a Aialani i le latou ta'aloga mulimuli i le vaiaso na te'a nei, lea na matua iloa ai faiga a le alii o SBW i le tulaga o le second five eight, ma maua ai ana sikoa e lua faapea ai ma le mataina o lana taalo, ma manumalo ai Niu Sila i le 60-0 a Aialani.

O SBW ma Maa Nonu, o i laua ia ua matua iloa le lelei o a la taaalo i le laina i tua i le au a Niu Sila, e fai o le lelei i le faaaogaina o le polo ae o le puipui foi e matua lelei lava, ae sili ai i lo lena, o SBW, o ia foi o se alii fusu i totonu o Niu Sila.

O le alii o SBW lea ua 26 ona tausaga, o loo naunau le toatele o tagata Niu Sila ina ia nofomau pea i totonu o le atunuu ma taalo ai.

Na taua e le faiaoga o le au a Waikago Chiefs i sana tautalaga i le leitio a Niu Sila e faapea, "E lei mautinoa e ia peitai ua ia faalogo e toatele nisi o lana au o le a o atu i Europa i le tausaga fou mo a latou konekarate, ae le o mautinoa ia SBW.

O le ali'i o Dave Rennie sa mana'o i le ali'i o SBW e alu atu e ta'aalo i lana 'au lakapi, o ia lea na fesoasoani malosi ia SBW, i lona fa'aaogaina o le polo lakapi i lona tulaga, e 'ese lava le liki, e 'ese fo'i le lakapi Iuni i le tulaga lea o le laina i tua, aimaise lava le tulaga o le second 5/8.

Ia o lea ua lelei atoa ai le tama lenei SBW i le tulaga lea, le tulaga lea e taufao i le 'au Samoa, e amata mai lava ia Joe Stanley, Eroni Clark, Alama Ieremia, Frank Bunch, Tana Umaga, Sonny Bill Williams, Ma'a Nonu, fai a isi tagata e fa'atatau i le mana'omia o le 'au Samoa i le ituaiga tulaga lea, e fetaui lava i ai, o leai sou pito Samoa, "aua na'o tagata lava e ulu malo e alu i ai i lenei tulaga, pei o le 'au Samoa."

SIAMUPINI AFERIKA I SAUTE IPU U20

I le suega siamupini i ta'aloga i lola ifo o le 20 tausaga po'o Junior World Championship i Aferika i Saute, i le malae o Newlands Stadium i Cape Town, ma malo ai le 'au a Aferka i Saute ia Niu Sila, e 22-16.

E ta le afa, o loo 10 Niu Sila i le 9 a Aferika, ae i le afa mulimuli na vaaia ai le suiiga o le 'au a Aferika ina ua sui le malolosi o le latou laina i luma.

E lua latou sikoa a Niu Sila na maua i le afa mulimuli ma le latou kolopu mai le alii o Handre Pollard, e ui ina tutuli i tua mo le sefulu minute le pou a Baby Blacks ma le loka loka a Baby Boks, ina ua fufusu fo'i i le taimi o le ta'aloga, Ofa Tu'ugafai ma Pieter Steph.

O le fa ai lea o tausaga o siamupini Niu Sila, ae o lea ua taofi e Aferlka i Saute le latou siamupini lona lima lenei tausaga.

MALOLOPEZ IA ORTIZ, FUSI IBF

E fa'apea lava e filemu atu ma le fa'amaulalo e le uma ua fa'amaualugaina ina ua te'i ua fai mai lana faiaoga e 'togi le solo ua gau le auvae a le tatou tama o Ortiz, ua le toe mafai ona toe faia i ai se isi mea."

Ana o se ta'avale tutu'u e lelei, na ona se'i 'ese lava o le mea ua leaga, ae momomo atu i ai se mea fou, ona toe alu la'atoa lava lea, ae o le tagata ola, e fai le mafaufau ma le agaga, e iloa lelei fo'i le tiga e le isi taimi.

O Lopez ua tula'i mai nei ana fusu'aga i le (30-4, 18 KO) ma e leai se isi na peti e malo, o le fa'afuase'i o lenei manumalo ia Ortiz lea ua se'e atu nei i le (29-4-2).

O lene'i ali'i na faiaina fo'i i le ali'i siamupini lea o Mayweather i le tausaga lea ua te'a, ae o lea ua toe malo ai Lopez, lea na faia fo'i ia Fepuari lana fusuaga i Purto Rico e sui a'i le ali'i Lucas Matthysse.

O le fusuaga muamua lea o le fusi o le lalolagi a le ali'i fusuaga o Lopez - Ortiz, a ua leva ona fa'asasalau le isi fusuaga ma siamupini mai Mexico, i le fa'aiuga o le tausaga lenei.

Ia lea ua tafi 'ese lena fusu'aga ma le mafaufau o le Golden Boy Promotion, fai mai ai le ali'i o Richard Schaefer. 

Fa'aliliuina e Toleafoa Haserota Auva'a