Ads by Google Ads by Google

Tala i Ta'aloga.

FESILIGIA PEA FA'AIUGA FUSUAGA PACQUIAO MA BRADLEY

Ua manaomia nei e le Ofisa o le Loia Sili i le aai i Nevada le faaiuga o le fusuaga i le va o Timothy Bradley ma Manny Pacquiao, lea na faataunuuina i le aso Toona'i na te'a nei, lea na faiaina ai Manny i ai i le alii malosi lenei o Bradley, peitai e talitonu nisi e le sao lea faaiuga.

Fai mai le alii o Bob Arum lea e faalauiloaina fusuaga i le lalolagi, e tatau ona toe vaavaai le komiti o loo iloiloina faaiuga o fusuaga i lenei mataupu.

O le fusi o le WBO lea na mau i le alii o Manny ua seia ma umia e Bradley, e ui o lea faatoa toe faiaina Manny talu mai le 7 tausaga talu ai.

Na manumalo Bradley i 'ai, 115-113 i pepa a ali'i fa'amasino e to'alua a o le isi fa'amasino na manumalo ai Manny, ma o lea tulaga na taua ai e Arum sona popolega i ono avea lea faaiuga ma itu e le toe fiafia ai nisi e matamata i ni fusuaga.

Na taua foi e le peresetene o le WBO ia Francisco 'Paco' Valcarcel i sana tusi sa tuuina atu i le komiti, e tatau ona toe iloilo le faaiuga sa tuuina mai e alii faamasino.

Ina ua faalauiloa e le alii faasalalau ia Michael Buffer e i ai le faaiuga e eseese ai faamasino, sa manatu le toatele o le a ta'u mai nei le igoa o Manny, peitai na faateia ina ua faalauiloa mai le igoa o Bradley.

O le alii faamasino o Jerry Roth sa ia maua ai e 115-113 mo Manny ae o isi faamasino e toalua ia Duane Ford ma CJ Ross sa au i laua ia Bradley. O le faaiuga a le Associated Press e 117-111 mo Pacquiao.

Fai mai Arum, o le fa sefulu ai nei o tausaga o faia e le latou kamupani fa'atasi ai ma ni fusuaga pito i sili ona taua i le olaga lenei tulaga, e le gata i lea, o se tasi lenei o fusuaga ua sili ona le lelei lona faiga.

SONNY BILL WILLIAMS MA LE ALL BLACKS

Ua faalauiloa e le sui o le All Blacks a Niu Sila ia Sonny Bill Williams e faapea, e tele atu ana tapenaga i le taimi o le Ipu o le lalolagi nai lo le taimi lenei, peitai o popolega o le pulega a le All Blacks, o Sonny ua masani i le lakapi liki, ma e tele atu le taimi e tamoe ai o ia ma le polo mai le taimi na te pasiina ai.

Fai mai isi, e eseese le lakapi Iuni ma le lakapi Liki.

Ua amata nei ona fai le mea na fa'atonu atu ai ia e faiaoga o le Lakapi Iuni, ua tau tu'u 'ese ai e ia le ta'alo fa'alakapi Liki, ae alu lona mafaufau i le Lakapi Iuni.

Fai mai a ia, "Ua aoga le taimi lea na alu ai nei i Waikato Chiefs, i le fautuaga e fai mai so'o ai le latou faiaoga o Dave Rennie ma Wayne Smith. Fai mai laua, e 'ese lava le Lakapi Liki, 'ese Lakapi Iuni, o le tulaga lea e ta'alo ai, e vaai ia Ma'a Nonu e alu lava ma le polo se'i iloaga e toalua i le tolu tagata ua o mai e pu'e o ia, fa'ato'a toe aumai le polo i tua, e toe fa'asolo i le isi itu."

O le isi mea o lona vave pasiina lea o le polo, ae la e le'i pu'eina ia e se tasi, e moni lava e sao i isi taimi i vaitaimi na, a'o o le tele lava o taimi e lavea ai le tagata lea e alu atu le latou 'au.

Ia ua uma na vaitaimi ma na tausaga i le ali'i o SBW, o le tausaga lenei ua 'ese fo'i le iloa ma ta'alo ua i ai nei SBW, ua fa'amoemoe lava i le mea e mana'o ai le posi (boss) o le latou No. 10.

Fa'apena fo'i le ali'i lea o Conrad Smith, fai mai a ia, "Ua tele le suiga SBW, nai o lo'o tausga lea ua te'a, ua ta'alo fa'atagata matua i le lakapi Iuni, sa manaia lava ana pasi monomono (off load) ae tele lava ina lavea ai le tagata pe a le lelei le vaai.

Ae o le pu'e o le mea mautinoa lava lea e lelei tele ai SBW, o le 'defense' lava lana mea e le maua e se isi, a'o le vaitaimi lenei i le ta'alo a SBW ua lelei i so'o se tulaga.

Fa'aliuliu: Toleafoa Haserota Auva'a