Tala i Taaloga

SAUNI ALEX LEAPAI E FUSU I LE FUSI O LE LALOLAGI

 

O le aso 26 Aperila 2014 lea ua faatulaga e lu’i ai e le alo o Samoa ia Alex ‘Lion Heart’ Le’apai le fusi o le WBO o le aupaga mamafa (heavyweight), lea o lo o umia e le alii o Wladimir Klitschko o Ukraine.

 

O le alii o Wladimir o lo o ia umia fusi o le aupaga mamafa e aofia ai le IBF, WBO ma le IBO, ae o lona uso laititi o Vitali o lo o ia umia le fusi o le WBC ma le WBA, ma ua tele tausaga o avea le auuso lenei ma siamupini o le paga mamafa i le lalolagi, lea na la faatoa umia nei fusi ina ua malolo litaea le alii o Lennox Lewis sa tele fo’i tausaga o ia umia nei fusi.

 

O le avanoa e fusu ai Leapai i fusi nei o le aupaga mamafa, na maua ina ua ia faatoilaloina le alii Lusia o Denis Boytsov, i se fusuaga mataina sa faia i Siamani i le masina o Novema 2013.

 

O le fusuaga i le va o Boytsov ma Leapai, na filifilia lea e le alii Lusia ma le manatu, o lana fusuaga lea e tapena ai mo ia mo le lu’iina o le fusi o le lalolagi o lo o umia e Wladimir, ina ua faatulaga mai e le aupaga a le WBO, o Boytsov o lo o umia le tulaga muamua mo le lu’iina o le fusi o le WBO.

 

Ae o se itu na faateia ai le lalolagi aemaise ai le pulega a le alii o Boytsov ina ua faalua ona tau i lalo le papatua a Boytsov i faiga a Leapai, ma i’u ina manumalo ai Leapai i ‘ai ina ua maea taamilosaga e 12 o le la fusuaga sa faia.

 

Ina ua faiaina Boytsov i le la fusuaga ma Leapai, sa finauina ai loa e le pulega a Leapai le pulega a Wladimir, ua talafeagai le fusu o lenei alii i le fusi o le lalolagi aua o lea ua ia faato’ilaloina le tagata sa avea ma numera muamua i le aupaga o le WBO.

 

Ina ua maea ona iloilo e le pulega a Wladimir le fusuaga atoa a Leapai ma Boytsov, na malilie ai loa le pulega faapea ai ma le alii o Wladimir, ua onomea ma talafeagai le maua e Leapai o le avanoa na te lu’iina ai le fusi o le lalolagi, o ia fo’i o se tagata ua atoatoa uma i ai vaega mo lea faamoemoe.

 

O le masina na te’a nei na faamautuina ai loa feutanaiga mo lenei fusuaga, ma ua faamoemoe o le fusuaga e faia i Ausetalia, ma o se avanoa lelei fo’i lea mo le alii Samoa lenei na te faatoilaloina ai le siamupini o le lalolagi.

 

I tusitusiga mai Ausetalia ua taua ai e faapea, o le taimi lona lua lenei mai le silia i le 100 tausaga ua tuana’i ua mafai ai ona fusu se tagata fusu mai Ausetalia ma se siamupini o le lalolagi i le taaloga o le faipele.

 

O Le’apai o se alii Samoa o lo o aumau i Ausetalia, o lana galuega e ave kiliva e tausi ai lona to’alua ma lana fanau e to’aono, e pei ona taua i faamaumauga faatatau ia te ia i luga o aupega o fesootaiga, le initaneti.

 

O le alii fusu Ausetalia e igoa ia Tommy Burns, o le ulua’i Ausetalia lea na fusu i le fusi o le lalolagi i le 1907, ina ua ia lu’iina le fusi sa umia e se alii mai Kanata, ma o se tala faanoanoa, e na o le tasi le taamilosaga o lea fusuaga ae mae’a ina ua faiaina le alii Ausetalia, peitai o le tele o tusitusiga ua faia i Ausetalia i le taimi nei, ua taua ai le tele o le avanoa e ono mafai ai e Le’apai ona faato’ilalo ia Wladimir i le la fusuaga i le masina o Aperila.

 

O Le’apai e pei ona faatulaga mai i le aupaga mamafa a le lalolagi, o se tagata e malolosi ana tu’i, o se tagata fusu fo’i e lelei lana taalo toe malosi, ma ua valoia le tele o le avanoa e mafai ai ona ia manumalo i lenei fusuaga.

 

Na taua e Le’apai i le au tusitala i totonu o Ausetalia, o le masina fou o Fepuari o le a malaga ai i Samoa e saili se faamanuiaga mai lona aiga ma le atunuu, a’o lumana’i ai lana fusuaga i le masina o Aperila, ma ua faatulagaina, o se tasi lenei o fusuaga pito sili ona taugata mo le susuga a Le’apai, aua e faitau miliona le tupe e ono fusu ai o ia ma le alii o Wladimir.

 

O le taimi nei, ua umia nei e Leapai faamaumauga o le 30 fusuaga, 24 fusuaga sa manumalo ai i le tu’i oti, 4 fusuaga na faiaina ai, ma fusuaga e lua na tutusa ai.

 

faaliliu Ausage Fausia

Comment Here