FUSUAGA A SIAMUPINI PAGA O LE MIDDLE WEIGHT

Ua i ai se manatu ua tatau ona faia se taamilosaga a alii e toafa o lo o avea ma siamupini o le aupaga a le middleweight i le taimi nei, lea e pei ona i ai le ali’i o Gennady Golovkin lea o loo ia umia le le fusi a le WBA, o le Ausetalia lea o Daniel Geale lea o loo i ai le fusi o le IBF, ia ma Peter 'Kid Chocolate' Quillin lea o loo i ai le fusi o le WBO ia Sergio Martinez lea o loo i ai le fusi o le WBC.

Ua toe manao nei le middleweight i le latou taamilosaga lenei e faia la i siamupini uma o fusi lea e i ai nei, aua o lea e lelei e tofu lava le tama fusu ia ma le fusi, e le pei o si paga e toatasi le siamupini ae lua fusi o loo ia umia ina.

Na o le tagata lenei o Sergio Martinez ua atoa lana 38 tausaga ao isi 'au vaega la e le'i taitai ona atoa latou tausaga i le 30, ae fai mai Martinez, "E toeaina lava le pusi ma si ona fela'u, e le fai i tausaga le mea nei, pei o aoga e 6 loa tausaga e tatau ona e aoga, ao le mea e fai lava i le lelei ona e tolegi, tausi lelei lou tino ma e toaga e faia lou 'diet' ona e oo lava lea i le 50 tausaga o loo siamupini lava. Vaai foi i le fiu o le 'aulaiti lea e gasolo mai, e o mai ma ou faatutupaina ia toe o foi lea ma mata i le faiga a le tama matua."

O lea la ua mafaufau nei i se isi e faaatoaina le toafa lea pe fai e malilie e fai nei le taamilosaga aua e afaina le tulivae lea na taoto talu ai nei lava o Sergio Martinez, e faapea faatoa mafai lava ona toe fusu i le tausaga fou.

E tele siamupini lea e mafaufau i ai e faatumuina le isi avanoa lea, e i ai le alii o Julio Cesar Chavez Jr. lea foi na siamupini muamua, ia poo le alii foi lea Hassan N'Dam N'Jikam lea na se'i talu ai nei lana fusi ia Peter 'Kid Chocolate' Quillin o le fusi o le WBO.

O lena e toatele tagata lelei i lenei paga, ae ua tatau loa ona toe faasolo le faiga o lena taamilosaga, e sue ai se siamupini e tasi o lenei 'au paga.

O lona uiga la afai o le amataga i le tausaga nei, e fetaui le isi toalua o ai lava e manumalo ia ave i ai lana fusi i le o le manumalo ona toe toe faatalitali foi lea i le ono masina ona toe fetaui foi lea o le toalua lea e totoe.

O ai o le a manumalo, ia ave uma i ai fusi na, ona toe faatalitali foi lea i le isi tolu masina ona fetaui loa le ma Martinez e iloa ai le siamupin e toa tasi.

Ia ae kiki ai foi isi 'manager' e leai se mea o le fai ai faapea ia Sergio Martinez, e faatali la i le tausaga fou sei malosi mai ia Martinez ona fai lea faalelei o le latou taamilosaga lea.

AVEA NIU SILA MA TUPU I LE TAALOGA LAKAPI 7 LALOLAGI

O se tulaga uiga ese lea ua tulai mai i le taaloga lakapi taitoa 7 i le lalolagi, ina ua avea Niu Sila ma tupu o le taaloga lakapi, e le gata i le taamilosaga IRB o lo o faagasolo i tausaga taitasi, ae ua oo lava foi i le Ipu o le lalolagi na maea atu nei ua toe suipi ai foi Niu Sila.

Na taua e MacRae le peresetene o le Iuni Lakapi a Niu Sila lona fiafia tele ina ua ausia e le au lakapi taitoa 7 a Niu Sila lea matati’a maualuga i le taimi nei, ae na taua e le faiaoga o le au taitoa 7 a Niu Sila ia Gordon Tietjens e faapea, e le’i mama ia i latou ‘au uma sa latou tausinio i soo se taamilosaga, ona ua tulaga maoa’e le taaloga lakapi i soo se vaega o le lalolagi i le taimi nei.

Ia saunoa foi le faiaoga a teine, Sean Horan, "Oute faaopoopo atu i le tala o le susuga a Sir Gordon Tietjens, o le mea na e iloa ai au a Niu Sila, o le lagolago lava, poo a mea e faia mai e te tepa mai i lou itu agavale poo le itu taumatau o loo i ai lava le lagolago (supporting players) i taimi uma lava."

Ia fai mai foi le Peresitene Ian MacRae, "Ia toe o le Ipu o le Lalolagi lea e faia e Brazil, e manaia pe a tatau aumaia le Pine Auro lea e faailoa ai le pine auro muamua lea i le Olympics.

O le saunoaga la o le CEO o le NZRU o Steve Tew, "O le se taimi muamua lenei ua o mai uma ma 'au o se atunuu ni siamupini uma a le 7 o lea oute fai ai na sui o le atunuu, ua malo fai o le faiva malo tau, ua to atu lou pulou ia te outou."

Ona faaiu lea i le faamalo ia Tim Mikkelson ma Kayla McAlister ina ua maua tama taalo ma le teine taalo i lenei tausaga 2013, ae maua e Gillies Kaka ma Portia Woodman tama ma le teine taalo o le Ipu o le Lalolagi e le 7.

Ua atili ai le alualu i luma o le lakapi i Niu Sila, ae a na fai e toaaga le o amo le avega talo ma ni popo e fai ai le mea'ai i le afiafi, pe toaga foi e fai faiva e sue ai se mea 'ai o le aiga, ua leva lava ona tautau se'evae lakapi ae e sa'o ai le tala i le isi toeaina ma fai i le atalii.

"Ai e aumai ou se'evae lakapi e 'ai, ma o le isi mea, e le iloa poo ai lena e ona na se'evae ai foi ua e nana ina mai."

SILIA 100 TAUSAGA MATUA O LE TUUGA SOLOFANUA AMERIKA

O le taaloga o le tuuga Solofanua i totonu o le Iunaite Setete o Amerika, ua silia ma le tausaga lona matua talu ona faavae mai, lea e pei ona amata mai i Kentucky i le 1875 seia oo mai lava i le taimi nei.

E tolu tuuga solofanua e faia pe a oo ina faamanatau lenei taaloga i tausaga taitasi, o le tuuga e faia i Kentucky, o le isi i Belmont i Niu Ioka, ma le tuuga mulimuli e faia i Baltmore, ma afai e tasi lava le solofanua e mua i tuuga uma nei e tolu, ona faaigoa lea o le tagata ua manumalo o le Triple Crown, o tuuga taitasi nei e tailua vaiaso e va ai le isi tuuga mai le isi tuuga.

O le tausaga e 1978 na gata mai ai le tagata na manumalo uma i tuuga nei e tolu, lea e pei ona umia e le alii o Steve Cauthens na tietie i le manu e igoa o le Affirmed, peitai e oo mai lava i le taimi nei e lei toe mua lava se tagata i se tuuga faapena.

Ia ae o lea foi ua peti uma tagata e fiafia i lenei taaloga i le solofanua lea mua i le Kentucky Derby o Orb e fai mai e saosaoa i le tuuga lea ua uma.

A uma foi la lenei tausaga ua uma foi le aoga o le solofanua lena i le Triple Crown ia e sui foi solofanua e fai ai le sailiga i lea foi tausaga.

Fa’aliliuina: Toleafoa Haserota Auvaa