Ads by Google Ads by Google

TALA I TA’ALOGA

Ua 'ese lava le sefulu lea na ta ta muamua a tama o le Mosi'ula 'ese le sefulu lea na totoe, i le faiga a le talitua'a a Tama o le Mua'au.

Manaia le ta'aloga i le atunu'u na maimoa ai, i le tau fai tutusa uma 'au e lua, vagana ai o le tama lea o Luvino e 48 'ai, o le ta mua o le Tama o le Mua'au, lea na mafua ai le 'ese'esega o nei 'au e lua.

Tutusa fa'ate'a a nei 'au, i le tele o taimi e fiu ai i se tagata ta e to'atasi, a o le vave ona sui mai o isi fa'ate'a, o lena e maua ai se pe.

Tutusa talitua'a, e i ai polo e le misi ae i ai fo'i polo e sapo ma maua, ae fai o le lelei o le 'au polo mamao i le tele o sapo maoa'e na latou ta sapoina mai i luga o le auala.

Toe tutusa mulumu, vave toe matatiotio, pei ua e va'ai i lima o pusi ai moa i le vave o lima a nei mulumu.

Ae tasi le mea na toe 'ese'ese ai, o le taimi lea na toe 3 ai pe ae ua 99 'ai o le Mosi'ula na maua lelei ai e le tama lea o Logi lana pa'uuga, lea na vave uma ai loa le ta'aloga matagofie.

E fai fai te'i ua toe su'e nei 'au e lua i le su'ega siamupini pe a o'o atu i ai, i le manaia mai o le 'au a Mosi'ula ae o lo'o tumau pea le lelei o Tama o le Mua'au.

O le ta'aloga e finau pe ana leai le tama lea o Luvino, lea ua fiu ai fa'ate'a Mosi'ula, e o'o i sui te'a e fao le mea e ta pe ai, toe o isi taimi na misi ai i le talitua'a o le tolu o ana pe.

Toe maua mai loa e Logi lana pa'uuga i le afa mulimuli o lena na fa'ato'a maua ai le i'uga o le ta'aloga.

TA'ALOGA A TEINE: PAGO AETO (1-0) vs PISISAMI (0-2)

O fea o i ai fa'ate'a ia na siamupini ai Vaitogi i le tausaga e lua lea na te'a atu nei, po'o le mea ua o i fafo po'o fai ni to'alua, e fesoasoani i se teine o Verna ma Mana.

Ua 'ese lava lou va'ava'ai atu i teine o lea fo'i ua toe tau a'o mai i si teineiti laiti.

Tele lava le alofa atu i le tou 'au, ae a fai lava o lena e fai ma o i fafo, lelei pe a fai o la e o i Army, Marine, Navy po'o le Air Force, ae a fai e o e fai ivi i fafo, toe aumai i'inei e fai ai le 'au kirikiti o le nu'u.

E lelei ai teine o le nu'u lea o Pago Pago o lo'o to'atele teine o le faia mai le 'au kirikiti, toe pau lava le mea o le le 'fit' o le tele o teine nei.

Manaia lava le va'ai atu o lo'o tamo'emo'e mai e leai ma se sela, fa'atoa vaivai lava i le fale.

Manaia fa'ate'a fa'atoga a teine ia e to'alua a le Aeto, pe ana fai e malosi umi tau'au a nai tama'ita'i, semanu o le mea lelei lava ia la fa'ate'a.

Na ta ta muamua teine o le Aeto ma na manaia o latou 'ai, e maua o latou 'ai e 71, i le faiga a Losa 12, Lynn 13, Helen 8 ma Olive 6, ma le to'atele lava a maua e ta'i 1 e o'o lava i le ta'i -tolu 'ai.

O le isi 'au vaega lena e mumusu e ta ni a latou 'ai, pe ai o le alolofa i le leva o polo kirikiti ua ala aii ona taua i latou 'o i latou na ta le ea, po'o i latou na fuamoa'.

Ia tuli loa e teine o le 'Pisi', na manaia lava le aluga o 'ai ma le 'auvaega lea na tamua, fa'asolosolo mai ai lava e tua o le sefulu pe.

Na ona uma lava o nai teine ta lelei na, alu loa ma le solo pe, a le pe i le 'olo ua pe i le sapo.

Na fai atu ai lava lea o le latou 'futifutiga ulu' na mae'a ina uma mai pe a teine o le 'Pisi' ae maua loa o matou 'ai e 69, 19 pe, ma manumalo ai teine o le Aeto, e 'ai e 71 i 69 a le Pisisami.

Lenei ua tula'i mai, ua 1 malo, ma le ta'aloga e le'i fa'aumaina, ao le 'Pisi' e 0-2, lua a faiaina e le'i malo lava.

TAMA O LE MUA'AU (6-0) 100 'ai, 12 pe. vs MOSI'ULA (5-1) 101 'ai, 19 pe.

O le ta'aloga na fa'atumulia le paka lea i Vaovai Fagaalu i le to'atele o le atunu'u i le lolofi atu e fia maimoaina lenei ta'aloga manaia.

Le ta'aloga na matua finau uma tama ta'aalo i lenei ta'aloga, e fai o le talotalo nisi i le 'au o le Mua'au, ae o le tapua'iga foi a le itu i sasa'e ia, ia malo le Mosi'ula.

O le tama o Luvino lea na ia taina 'ai e 48, soso'o atu i ai ma Lafoga 11, Soli 10 ma Ray 7, semanu lava o 'ai na e maua i le tata a le Mua'au.

Ia ua fa'afetai ua avea fo'i lenei tausaga ma tausaga muamua ua le taina ai so'o ituaiga te'a e sau ia Luvino, ae ua fa'atalitali lelei lava i se te'a e lelei.

Ua uma lava ta'aloga o lenei liki e lelei mai lava le ta a le ali'i, e tele lava ina pe ifo ua maua 30 o ona 'ai pe sili atu fo'i i le 40 ma ona tupu.

Ia e fuafua la i ai i le 'au ta a le Mosi'ula, le 10 muamua lea na ta ta, o Loia 29, Patele o Asalemo 13, Duane 7, Ite 6, Malosi 8, ia ae ua sao fo'i le ta a tama ia o Mao, JR Sitau.

Na'o Vaitogi ma Lome ma si tama o Tasi o le sefulu mulimuli lea na taufaifefeu i le 'au o le Mua'au.

O le fa'atea lea o Logi o le Mua'au, e faifaiaga ai loa se tagata ta i le taina o ona 'ai, o lou fia fai 'ai lava o oe ia.

O tasi lenei o tagata te'a ua maitauina, a le o le ogatotonu o se ta'aloga e fa'ato'a lelei mai ai, a leai lena o le te'a muamua po'o le amataga o se ta'aloga ua lelei mai ai.

O le tasi lea o tagata e fai fuafua uma i ai, i le taimi lea ua lelei mai ai lana te'a, ia ua uma le ta'aloga ma lena 'au, ua maitauina e uma ane se ta'aloga, e 'olo silia e 6 - 8.

FETULELE (4-2) 100 'ai, 12 pe vs LUPELELE (2-3) 95 'ai, 19 pe.

Pei a na ou fai atu i le 'au lea o le Fetulele, fa'apea fo'i le tu'utu'u avanoa i ai o isi 'au i le tausaga lea ua te'a ma mea na va'ai ai le sau o le Fetulele ma siamupini.

O lea ua toe va'aia fo'i ua amata ona tolotolo lemu mai le Fetulele, o le fetu e fai mai isi, a o'o loa ina lele, ia ua le toe maua loa ae o le a lele ma lele ai lava.

Talofa e i si 'au o le Lupelele, tele lava mea e tatau ona fa'aleleia muamua, o le lava oni fa'ate'a e fai i ai filifiliga o le ali'i kapeteni.

E manaia lava le tagai atu loa le kapeteni i ta ua lelei tele mai, ona la'u atu lea o fa'ate'a e taua o 'faitoga-fiti' e tau su'e mai ai se pe, ae le sapo o le se'e.

Ua tatau ona amata ona tolegi tamaita'i laiti na e fiafia e fa'ate'a, ma o le mea e le fa'apea ua o'o i le vaitaimi o le kirikiti ona o lea e fai, e fai malie atu lava i le polo tennis.

Na e o'o mai le aso e fai ai aoga, ua lelei lou te'a ma le toaga lava e fai, e le afaina ai lou tauau e pei o fa'ate'a Samoa i aso la.

Tama na e savali mai i e luga le isi tauau ae lalo le isi tauau, e mafua ona le uma loa ta'aloga, ona fusi lea o le tauau i se solo ua uma ona fa'asusu mai i le vaimalulu.

Ia a leai lena ona ave ifo lea o se fagu Vailima lea o lo'o tufatufaina e le Oloa o Leala lea e i Tafuna e fai ai ai sau fa'amalosi tino i le aso.

O le fa'afetai e le uma lea mo lenei Kamupani o le GHC Oloa o le Leala, mo tautua o le faiva pea i tausaga taitasi, i le fa'asasaluina o Tala i Kirikiti.