MANINO MATA O LE LIKI O LE MOSO'OI

O le aso Toana'i na te'a nei sa su'e ai se 'au a le Papaseugogo mai Nua ma Se'etaga ma le 'au a le Tafuna Youth, poo le Sinapati pei, se 'au e alu i luga i le toatolu o le a latou su'eina le siamupini o le liki kirikiti o le Mosooi faatasi ai ma le Mosi'ula ma Tama o le Mua'au ma le 'au lea e o mai i Samoa o le Ainiusami.

O le toaono lea e o i lalo, o le a fai foi le latou taamilosaga e su'e ai le latou Ipu o le 'bottom six' poo le ono e i lalo.

Toe lua taaloga o le taamilosaga e totoe nei i le aso Lua ma le aso Tofi, ona amata ai lea i le aso Toanai ona fai le pau ma nofo i 'au nei i luga ma 'au maualalo nei.

O 'au nei ua faamanuia nei i le fa pito i luga, o le Mosi'ula mai Masefau, le siamupini o le tausaga ua te'a, o Tama o le Mu'aau lea na tulaga lua i le Moso'oi i le  2013.

Ae o lea ua ofi atu nei ma le 'au a le Tama o le Papasuegogo i le tausaga lenei ma le 'Ainiusami mai Lefaga.

E faapena foi le ono pito i lalo lea ua i ai nei Tama Samoa Moni i le A ma le B, faapea le 'au a le Autalavou o le Petesa Tai, o le 'au a tama mai i Fagaitua o le Tuna 'Ula, ma le Lupelele mai 'Ili'ili.

O le faiga la ua tasi i ai le finagalo o le komiti o le Moso'oi 2014, e pau lava na nofo, i le fa lea e pito i luga, o le faia a latou taamilosaga lona uiga e taitolu taaloga a le 'au e tasi. Ma o ina e iloa ai le siamupini.

O le ono pito i lalo e taalo le 4 & 5, taaalo le 6 & 7 taaalo le 8 & 9 a uma e tolu lava 'au e malo. Ma lona uiga o le fai le se'iga pepa, ona maua ai lea o 'au e taaalo.

Ae pai le isi toatasi, o le 'au la e malo o le su'e siamupini loa ma le 'au lea e laki i le seiga pepa i le amataga.

I taaloga na faia i le aso Toana'i i le va o Pavai'ai B ma le Lupelele, o se taaloga malie tele lenei taaloga, e le talia mamaina lava e le Tama Samoa Moni le Lupelele i ni vai.

TAMA SAMOA MONI B 90 'ai, LUPELELE 67 'ai.

E 90 'ai a le Tama Samoa Moni B na fiu tama o le Lupelele e tau tuli i le manaia mai o le talituaa ma faate'a i lena aso.

E ono sefulu fitu 67 'ai na maua e le Lupelele ma e toatele lava na sapoia a latou ta, e toe lelei mai loa ma faate'a e pei a o le toliina o le vi le 'au ta a le Lupelele.

Ia toe taumafai mai i le su'eina o le Ipu a le 'bottom six' lea e faapea e amata i le aso Toana'i nei.

PAPASEUGOGO 78 'ai, TAFUNA YOUTH 77 'ai

O le taaloga lua la lea na faatalitali uma ai tagata i le fia iloaina poo ai le 'au e alu i luga ao o ai e alu i lalo, e faatoa ta'i tolu faiaina a 'au nei e lua.

O se taaloga finau i le tele o taimi, taofi soo e kapeteni ona o le fia malamala i le mafuaga na te'i ua pe fua lana tama ta lea e i luga o le malae.

E fai o le finau soo o Filipo ma faamasino i le fia malamala lava i le mafuaga na tape ai fua le tama o le 'au Tafuna Youth. Ae fai foi o le fia malamala foi o le kapeteni a le Papaseugogo ia o Evegelia, i mea e tape fua ai e faamasino ia le 'au ta a le Papaseugogo.

Na muamua tata le 'au a Tafuna Youth maua ai 'ai e fitu 77 ma o tama na mauaina le 'ai silia mo Tafuna Youth o Malo e 19 ai ma Poe e 15 ‘ai.

Ina ua tuli e le Papaseugogo, o Vesi na ia mauaina 'ai e sefulu tolu, alu ifo Semu ia mauaina 'ai e sefulu ma le tasi, ae faauma e Sam na mauaina 'ai ina ua 17 o pe.

I le faaiuga o le taaloga e 17 pe a le Papaseugogo ae maua loa ‘ai e 77 ma le ‘ai faasili, atoa ai ‘ai e 78.

MOSI'ULA 101 'ai, PETESA TAI 75 'ai

I le taaloga lea, na na tata muamua Mosi'ula, ma na manaia lava le sau o le pe i le amataga, e 3 pe ae faatoa 16 'ai, ae amata loa ona misi atoa, e fai o polo pau'u ae o le maua o polo foi e o atu i tua.

Amata loa ona toe alu i luga 'ai a Masefau poo tama o le Mosi'ula.

Ae na manaia le tea a Pati lea mai Petesa-tai, ma si tama o Chris, ae o le pona ua faatamala le talituaa, ae semanu lava e manaia le lua taaloga.

Ia ma logoina e le laulau o le komiti ua 101 'ai ae 14 pe a le Moso'ula ona tuli foi lea e Petesa-tai. Ina ua te'a mai Vaitogi le faate'a a le Mosi'ula, ia o le te'a lena na faia le iuga a Petesa-tai.

I le faaiuga e na o le 75 ‘ai na maua e Petesa-tai i lena taaloga.