Ads by Google Ads by Google

Tala i Kirikiti

SILI ATU SIPILI TAAL MAUA I LE LIKI A TAMAITAI

 

O le mafuaaga lea e tumu ai taaloga a fafine, aua o le vaitaimi lenei e sui ai le faiga o mafutaga a ulugalii, ua sui sui tiute a tagata, ua tausi tamaiti tama ae kirikiti tina.

 

O le isi mea e tumu le malae kirikiti o nai tama-tausi tamaiti, e o mai i le malae tuu loa tamaiti e o i le atoa, ae usi le maimoa a le tausi tamaitiiti ia i le kirikiti, leitoa a fe'ei mai pu a taavale i taimi uma lava i tamaiti, ae o loo matamata tama i taaloga a tina.

 

I le aso Toanai, na vaaia ai le sapo manaia a le teine lea o Tina mai le 'au a le Faasaulala (1), i polo sapo ia na sapo i autafa o le fale a le Komiti.

 

O le aso Toanai foi lea na vaaia ai le teine o Dana e te'a i le 'au a le Tuna Ula, i le toe pe ae toe o le masaga foi lea e tata, lea na tutusa ai le latou taaloga ma Teine o le Lega.

 

Le taimi na sau e sauni e ta na fesili atu i ai Vui Eli Tagaloa sui o le komiti, pe fia ona tausaga, ae fai mai, "E sefulu ma le tolu." o lona uiga e vasega fitu (7).

 

 

 

NUUULI (2-5) 54 'ai, 19 pe VS ASAGA (4-4) 80 ,ai, 12 pe.

 

O le 'au lea o le Teine o le Asaga i le tausaga fou, laiti latou faate'a e laiti foi le toatele o le 'au, o la e lelei uma mai le latou 'au, ua na pau lava i le faatama aemaise lava o le talituaa na e alai ona faiaina.

 

Pau lea o le 'au na faiaina i le tulafono foi lea i le polo e fai le fatu, pe la na o nei 'au ma fatu polo, o polo na faatau mai i le faleoloa, sa tatau lava ona ave se avanoa se tasi i le latou 'au.

 

Le faigofie o le faaiuga, (1) tasi, lapata'i loa, (2) ave le malo i le isi 'au. (3) fai faalua loa a, faamalolo loa ma le liki. vaai lea i le faigofie o le mataupu.

 

E manaia pe afai e oo i le tausaga fou, ona tago loa lea o le Samoaa Affairs e faatau mai polo e 5,000 e faagasolo ai le liki a tama ma teine e le toe pisi ai, ma leai se gugulu ma se faitogafiti.

 

 

 

ALOIAFI (4-3) 49 'ai, 19 pe VS LUPELELE (5-2) 50 'ai, 17 pe.

 

Le taaloga na fefeu lava mai i le taaloga atoa se'i oo ina ua maea lelei le taaloga, i le taumafai lea o le Aloiafi e puipui mai a latou 'ai e 49, ae taumafai foi Teine o le 'Lupe' ia e tau faauma le taaloga.

 

E i ai le taimi e pe ai, ona alualu a te'i foi ua le maua se pe le maua foi se 'ai, ua augata Diana, Lemoe Saolotoga e te'a e le maua se olo, ae faapena foi i teine ta latou ia.

 

Te'i foi a i le ola mai o le taaloga, ua nonofo foi le tapuaiga e lua ma fai le faiva o le tapuaiga, ua pa'o le kalone sisiva le 'au fai lape ia aua nei maua se 'ai i le ta a se teine, a'o le tapuaiga a le itu-ta la e faanonomanu e alu loa 'ai, ia talie ma patipati.

 

O le isi taimi ua sau le solo pe, a'o le isi taimi ua alu 'ai o le faaiuga la, na faifai a ua oo i le pe lona 13, ae toe 7 'ai o loo totoe, maua lelei isi pe e 2 na le tasi le 'ai le maua mai ai, na toe itiiti toe maua le se'e a le teine lea le ta.

 

I le 17 'pe ina ua misi le se'e a le teine ta lena, na toe faasaga a'e le 'au ta ma faauma loa ia 'ai, ma na maua ai le iuga o le taaloga malo Lupelele 50 'ai 17 pe, i le Aloiafi.

 

 

 

TEINE O LE LEGA (5-2) 3-3-1 VS TEINE O LE TUNA 'ULA 1-5-1.

 

Sa tata muamua Teine o le Tuna 'Ula, sa amata lava i le 5 'ai ae 4 pe, ona faapea lea o le tala a le komiti, e vave le taaloga lea i le alu o pe.

 

Ae tei ua vaai atu, ua amata ona sau i luma 'ai ma ua amata ona le toe tuu mamaina e Teine o le Tuna 'Ula ia Teine o le Lega, ua fai foi le loto ia a le Tuna 'Ula.

 

Tata tata, ua tete'i le 'au maimoa i le vave ona sui mai o ta a le Tuna Ula, e fai fai a oo lelei i le 70 'ai i le 19 pe, sa toe talie loa le komiti ma fai mai le latou tala, "E leai alii, ua amata ona fefeu ma lelei le 'au a le Tuna Ula."

 

Na tuli loa e Teine o le Lega, o le malie ia, na tutu le tamua e pe ifo le isi o le tamua, ua 20 'ai ae tasi le pe, toe sui foi tala a le komiti, "O i faapea lava ta ita ia e lelei ma i le te'a ma le tuaa a Fagaitua, ae o le la ua faatilotilo i ai e Ana ma le vaega."

 

Toe sui foi le taaloga, na pepe loa Lisa, Ana, toe pe atu ai ma Oloa, toe sui foi le tala a le komiti, "Sole e 'iu ina tutusa i te'a a nai teine laiti la le, o Dana ma le vaega o Elsie ma isi teine te'a….!!!!!."

 

O le iuga la na i ai, te'a mai lava e Dana le polo i le taimi lena ua tutusa le taaloga ae toe o le masaga, e le'i tele lava i se pito, patatu i le 'olo ma tutusa ai loa le taaloga.

 

O mai loa i le komiti fai atu i ai le komiti, "E su'e mai pe e tolu a le 'au, o lona uiga e fa teine ta o le 'au e tasi, e su'e ai le malo." ma sau mai loa le matai Poloa, le tofa ia Ma'ilealo Uso, ma fai atu loa i le mamalu o le komiti, "E le'i leva ona toe fai le taaloga lea na tutusa ai isi 'au e lua, a o le a le mea o le fai mai ai le latou faaiuga faapena, e le sa'o ia te 'au."

 

Ia sui loa le tala a le komit, "Tuu la seia iloa se aso e toe fai ai le tou taaloga, e logo atu le tou 'au." ia ua malilie uma ai 'au e lua.

 

 

 

FAASAULALA (A) (6-1) 59 'ai 16 pe VS NUUULI MYF (2-5) 57 'ai, 19 pe.

 

Le 'au sa amata mai i le faaletonu i a latou taaloga e lua, o le Faasaulala, ae ina ua sau sau lava, ua vaai atu i le liki o le 'au lea e afaina ai le 'au lea o le I'a Vai pe a latou fetaui, o le I'a Vai e le'i i ai lava se faiaina ae le'i fetaui ma le Faasaulala.

 

E le'i lelei faate'a i lena aso a Fia ma Meleane, e fiu e tau faasa'o atu o le te'a e tele lava ina misi ma le 'olo, ia o le faiga lena o se mea, le isi aso lelei, a'o le isi aso leaga.

 

Na tata muamua Nuuuli e 57 a latou 'ai i le ta a le tina lea o Sela ma La ma maua le 'ai silia i lena taaloga, ona o ifo loa lea o le Faasaulala e tuli, ia o le tuliga foi ma le lapiti, ua fiu le 'au ta a le Faasaulala e tuli pe 'ai a Nuuuli.

 

Pe a ana vave pe fai se togafiti i le tamaita'i o Makerika lea na maua 'ai e 20, se manu lava le Faasaulala (A) e faaletonu i le lea taaloga, manaia ia o polo ia sapo atu i talene o le fale o le komiti e le teine o Tina e lua, o sapo lena o le aso.

 

Malo le Faasaulala e 16 pe ae maua loa 'ai e 57 a MYF Nuuuli.