TU’UAIGA FAASAGA IA MULU MALUIA JR I LE TALEPE FALE & GAOI

E $15,000 le tupe ua maea ona faatulaga e le Faamasinoga Fa’aitumalo ona faatoa mafai lea ona tatala i tua le susuga ia Mulu Maluia Jr., lea o lo’o tuuaiga e le malo i moliaga mamafa e lua o le talepe fale i le tulaga muamua ma le gaoi.

O le amataga o le vaiaso ua te’a sa tula’i ai Maluia Jr., i luma o le afioga i le ali’i fa’amasinoga faaitumalo ia Elvis Patea mo le uluai iloiloga o lana mataupu.

I faamaumauga a le faamasinoga o lo’o taua ai faapea i le aso 20 o Tesema 2014, na lipotia ai e se i si ali’i i leoleo le tulaga o lona fale i Nu’uuli sa ulufale faamalosi i ai i totonu  ia Maluia Jr.

O lo’o tuuaia Maluia Jr., i lona ave faagaoi o se telefoni feave’ai ma se iPad mai totonu o le fale.

O lo’o taua foi i faamaumauga a le faamasinoga faapea a o moe le e ona le fale i le aso 19 o Tesema, i lo’o faia i autafa o lona fale se taaloga volipolo. O le e ona le fale o se tasi o faiaoga  o le Asosi Volipolo a Amerika Samoa.

O nisi o faamaumauga a le faamasinoga o lo’o taua ai ni tama e toalua na vaaia Maluia Jr., i autafa o le fale, lea na osofaia.  I se taimi i le vaveao o le aso 20 o Tesema sa taumafai ia tama e toalua ma le e ona le fale e pu’a Maluia Jr., ae na sola ese. O le taimi foi lea na latou lipotia ai lenei mataupu i le ofisa o leoleo ma tulai mai tuuaiga faasaga ia Maluia.

MOLIA TAMALOA FASI LONA TO’ALUA

O le vaiaso ua te’a sa tulai ai i luma o le afioga i le ali’i faamasino faaitumalo ia Elvis Pila Patea, se tamaloa o lo’o tuuaia i le faaoolima i lona to’alua. O lenei mataupu, e pei ona taua i faamaumauga a le faamasinoga, sa tulai mai i le masina o Tesema o le tausaga ua te’a.

Ona o tulaga i le puipuia o le na aafia o le a le faailoa ai e le Samoa News le suafa o le ua molia. Ae o lo’o taua e le malo i faamaumauga i luma o le faamasinoga faapea o le aso 26 o Tesema 2014 sa logoina ai e le fafaine ia leoleo mo se fesoasoani ina ua tu’i e le tamaloa ona foliga i luma o le laua fanau e to’atolu i le taeao o le Kerisiami (25 Tesema 2014).

O lo’o taua faapea o le fafine sa alu i le tifaga ma sana uo tama, ae ina ua toe foi atu i le fale, sa fesiligia o ia e le tamaloa pe aisea sa le tali ai lana telefoni feave’ai.

I le taimi lava lea, e pei ona taua i faamaumauga a le faamasinoga, sa tu’i ai loa e le tamaloa foliga o lona to’alua ma pa’u i lalo. Ona faasaga atu lea o le tamaloa ma kiki faalua le fafine.

Ina ua fesiligia le ua molia, sa ia faailoa i leoleo faapea sa ia masalomia o lona to’alua na alu i le tifaga ma se uo tama. Ae ina ua ia telefoni atu i ai, e le’i tali mai le fafine.

O faamaumauga a le faamasinoga o lo’o taua ai faapea sa tali ioe le ua molia i lona faaoolima i lona to’alua ina ua fesiligia e leoleo.