YAMASAKI BERNARD

Ua talia e le Fa’amasinoga Maualuga se talosaga a le malo ina ia solofua moliaga ma muta ai loa le mataupu faasaga ia Yamasaki Bernard, lea sa tuuaiga i lona fai aiga faamalosi i se tamaita’i i le 4 tausaga ua te’a.

I se talosaga tusitusia a le malo e ala mai i le tamaitai loia ia Jessica Bargmann, sa faailoa atu ai i le faamasinoga e faapea e i ai faamaumauga fou ua latou mauaina e le mafai ai ona faaauau lenei mataupu i se faamasinoga autu.  E le’i faailoa atili e le malo pe o a ia faamaumauga fou.

Talu ai ona o lea tulaga, ua talosagaina ai le faamasinoga ina ia solofua moliaga faasaga ia Bernard, e pei ona taua e Bargmann i lana tusitusiga i le faamasinoga. O le talosaga a le malo sa tuuina atu i le faamasinoga i le amataga o le masina ua te’a ma o le afioga i le faamasino sili lagolago ia Lyle Richmond sa ia talia le talosaga i le aso Faraile ua te’a ma solofua ai loa moliaga faasaga ia Bernard.

O le ali’i o Bernard, e mai le malo tutoatasi o Samoa ma e to’aono lana fanau, sa taofia pea i le toese i Tafuna talu mai le taimi na molia ai o ia i le tulafono, ona sa le mafai ona totogi le tupe e $100,000 sa faatulaga e le faamasinoga faatoa mafai lea ona tatala i tua.

Ona o lea ua solofua moliaga, ua toe tatala ai lea ali’i i tua talu mai le tausaga ua te’a sa taofia ai i le toese i Tafuna.

O tu’uaiga fa’asaga ia Bernard sa aofia ai le moliaga o le faiaiga fa’amalosi ma se tama’ita’i; faia o gaioiga fa’afeusuaiga mataga; tagofia o itutinosa o se tama’ita’i; ma le talepe fale i le tulaga muamua.

I faamaumauga a le faamasionga o lo’o taua ai faapea o le va o le aso 24 - 26 Tesema 2011 sa tula’i mai ai lenei faalavelave, ina ua ulufale fa’amalosi le ua molia i le fale o le tama’ita’i e 24 tausaga le matua na a’afia ma ia fa’amalosi o ia la te faiaiga, atoa ai fo’i ma lona tu’uina atu o se naifi i lona ua e fa’afefe ai o ia.

Na taua e le tama’ita’i na a’afia, o lenei gaioiga na tupu i le taimi sa la momoe fa’atasi ai ma lana tama e 3 tausaga le matua.

O le fa’alavelave lona lua na tula’i mai i le aso 25 Tesema 2011 ina ua alu atu le ua molia i le fale o le tama’ita’i na a’afia ma ia iloa ai o lo o loka, ona ia talepe lea o le loka o le fale ae ulufale fa’amalosi i totonu ma aga’i sa’o atu loa i le potu o le tama’ita’i na a’afia ma ia fa’aoolima i ai, mulimuli ane ona ia fa’amalosia lea o ia la te faiaiga.

O le fa’aiuga o gaioiga sa faia e le ua molia i le tama’ita’i na a’afia, na i’u ina ma’itaga ai o ia, ma ia fanauina ai se pepe i le aso 7 Setema 2012, e pei ona taua i fa’amaumauga a le fa’amasinoga.

MOLIA LEOLEO FA’AO’OLIMA I LONA TO’ALUA O LO’O MA’ITAGA

O le aso Gafua o le vaiaso lenei sa tulai ai i luma o le Fa’amasinoga Fa’aitumalo se ali’i leoleo mai le Ofisa o Leoleo ona o tu’uaiga i lona fa’ao’olima lea i lona to’alua, o lo’o tolu masina lona ma’itaga.

Ona o tulaga i le puipuia o le na aafia o le a le faailoa ai e le Samoa News le suafa o le leoleo, lea ua molia e le malo i moliaga mama e lua, e aofia ai le fa’aoolima tulaga tolu ma le  save’uina o le filemu i totonu o lona aiga.

I fa’amaumauga a le fa’amasinoga o lo’o taua ai faapea o lenei mataupu sa tulai mai i le aso 21 o Aperila 2015 ina ua faafeso’otai e le na aafia le ofisa o leoleo mo se fesoasoani ona ua fa’ao’olima lona to’alua ia te ia.

Taua e le fafine e faapea, i le taimi a’o tiute lona to’alua i lana sifi i le ofisa o leoleo i Tafuna, sa ia telefoni i ai e aumai se mea ai mo le la fanau.

Faailoa i fa’amaumauga a le faamasinoga e faapea, sa faaoga e le ua molia, se ta’avale leoleo e momoli ai le mea ai i lona fale. Ina ua ma’ea lea tulaga, sa toe savali loa le ua molia i le ta’avale leoleo, ae valaau atu i ai lona afafine mo se tupe. Sa toe foi le ua molia i lona fale, ae agai atu le fafine i le ta’avale leoleo.

O lo’o taua i faamaumauga a le faamasinoga e faapea sa vaaia e le fafine se telefoni feavea’i i totonu o le taavale leoleo. Sa tau aapa atu le fafine i le telefoni feavea’i, ae tu’i e le ua molia le ulu o le fafine ma taumafai e aveese le telefoni feaveai.

A’o tauivi i laua nei i le telefoni feavaeai, o lo’o taua i fa’amaumauga a le faamasinoga e faapea sa tulei e le ua molia le fafine, ma pa’u ai i lalo agai atu i se pa aute. I le taimi lea, e tolu masina o ma’itaga le fafine.

Sa logoina le ta’avale falema’i, ma taunu’u atu, ae sa le mana’o le fafine e ave ia i le falema’i  o le LBJ e faia suesuega, ae sa mana’o le fafine e fesoota’i le taitai o le ofisa o leoleo i Tafuna ina ia faila ai lana tagi faasaga i lona to’alua.

Taua foi i faamaumauga a le faamasinoga faapea sa ave le ua molia i le ofisa o leoleo e faatalanoa ai ma sa toe mafai ona fo’i i lona aiga i lea lava aso ina ua ma’ea fesili a leoleo.

E le o mautinoa i le taimi nei pe o afea e toa tulai ai le ua molia i luma o le fa’amasinoga mo se isi ana iloiloga.