TA’AMILOSAGA VOLIPOLO MO LE FU’A

O lo o fa’agasolo i le tarmi nei ta’aloga volipolo mo ta’amilosaga o le fu’a o lenei tausaga, lea fo’i na fa’atautaia i le aso Tofi o le vaiaso na te’a nei, ma maitauina ai le maoa’e o le ta’alo a le ali’i o Tusi Ma’ae, o ia fo’i lea sa ia maua le fa’ailoga o le tama taalo o lea afiafi.

Peita’i, i le latou ta’aloga ma tama mai sasa’e, e le’i maua se latou malo, na lua seti soso’o a Loco Motion. Soso’o mai le ta’aloga i le va o Mizuno Boys ma le Island Divas lea o lo’o Kapeteni ai Marro Fuimaono, na manumalo ai le Mizuno Boys ia latou ta’aloga e lua.

Fetaui le au malosi a le Side Out ma le Ghost Town Boys mai Futiga. ma sa toe faia’ina fo’i Futiga i ana ta’aloga e lua ma le Side Out. Soso’o atu i lea afiafi le ta’aloga a Ali’i mai Nuuuli ma le ‘au a le Island Divas, malo uma le Divas i a latou ta’aloga e lua.

O le ta’aloga na soso’o ai ma le fetauiga a le Fiafia ma le au a le All Sports, lea fo’i na malo ai le Fiafia Boys i a latou ta’aloga e lua. Ona toe soso’o lea ma le ta’aloga mulimuli na mafaia ona fa’atautaia i lea afiafi, o le fetauiga lea a le Side Out ma le Saumalu, ua fa’ailoa mai na malo uma ai le Side Out i a latou ta’aloga ia.

E ui ina sa fa’atulaga le isi ta’aloga mulimuli e fitu i ai ta’aloga sa tatau ona faia, peita’i, ua le lava le taimi ma ua tolopoina lea ta’aloga mo le aso Lua i ta’aloga fo’i e faia lava i lea faleta’alo a le Malisi i Malaeloa. Sa faia fo’i ta’aloga i le aso To’ona’i na te’a nei i le liki a tama’ita’i ma ali’i, ae o le a soso’o i le aso Lulu ma le aso Tofi fo’i o lenei vaiaso i Malaeloa lava!

SIAMUPINI EAST TAAMILOSAGA ALL STARS PASEKETIPOLO ALI’I

O le afiafi o le aso Tofi na fa’atautaia ai le ta’aloga a le All Stars i le Pasiketipolo Varsity Ali’i a le ASHSAA ma sa fa’ai’u ane i le manumalo o le East i ‘ai e 56-55 a le West. O le West All Stars sa aofia ai tama ta’a’alo mai Tafuna, Leone High ma le Malisi High, ae o le ‘au a Fagaitua, Samoana ma Nuuuli Voctech lea sa tu’ufa’atasia mai ai le East lea ua manumalo i lea fo’i sailiga siamupini.

O le ali’i ta’alo o Danny mai le Nuuuli Voctech na mauaina le ta’alo lelei o le ta’aloga ma le ali’i faia’oga lelei o le Sailiga Siamupini ua maua lea e le ali’i faia’oga o le East Basketball Team: Alvin Mamea.

Na tofusia fo’i le au ta’a’alo a le East ma le pine e fa’amau fa’ailoga ai lo latou manumalo i lenei tausaga, ma sa iloga mai e na’o le to’alima lava le vaega sa ta’a’alo o lea ‘au mai le amataga se’ia o’o mai i lona fa’ai’uga, ma sa leai se sipea mo i latou e tau malolo mai i ai!

Peita’i, e le’i fa’avaivai fo’i le sofa’i mai a le West All Stars ma toe vavalalata ai ‘ai sa i le 44-33 i le fa’ai’uga o le Kuata lona tolu.

Matagofie le fa’ai’uga o lea vaega o ta’aloga Pasiketipolo a tama, ae o lo’o fa’agasolo pea toega o le ta’amilosaga pasiketi a tama’ita’i a’oga, ma o le a fa’ai’uina i le vaiaso a sau i lona sailiga siamupini lea ua fa’atulaga mo le aso Faraile.