LIMA FOA’I MO E MANA’OMIA

Ua fa’aauau pea ona tu’ufa’atasia fa’amomoli o le alofa mai Sosaiete ma Fa’alapotopotoga ae maise o Ekalesia mo tatou uso o pagatia i Samoa, ona ua leai pe ua fa’aleagaina fale, leaga meatotino fa’atasi ai ma le maliliu ma leiloa tagata ona o le afa o Eveni i le fa’ai’uga o le 2012.

O le tapenaga mae’ae’a na saunia e le au Football a le Chargers o le American Youth Football Samoa -[ Asosi Ta’aloga Football i Samoa] ua tu’u fa’atasi ma le tapenaga a le Ekalesia a Iesu o le Au Pa’ia o Aso e Gata Ai - Pago Pago Malaeimi Stake.

“O le galuega alofa lenei, sa amata fuafua mai ina ia ave mo le nofoaga o tausia ai e mama’i ma matua matutua i Fatuoaiga, peita’i, ina ua sofa’i le tatou motu tuaoi i le malosi o le afa o Eveni, sa manatu loa, e ao ina fa’ao’o atu ia i latou uma ua a’afia o latou lotoifale ma tulaga masani o aiga ona o lea fa’alavelave fa’afuase’i fa’anatura.” O se tala mai lea a Misipeka.

O le suiga lelei ua faia, ona ua matua naunau atoa le Kalapu o Tama Ta’a’alo a le Chargers e tausoa le tiga o i ai uso uma i Samoa ona o afaina o lea afa malosi. Ua mae’a fa’atumu lelei le Pusa Oloa tele ma ua sauni nei e fa’ao’o atu i Samoa, ae o le aso Gafua na te’a nei, na fa’amuta ai le toe aoina o oloa mai le Kalapu fa’atasi ai ma le Ekalesia i Malaeimi.

Ua manatu o le isi toe o’o mai o le “MV Lady Naomi” o le a fa’ato’a fa’ao’o atu ai nei foa’i, ae o le agaga o i ai o le fanau uma o aofia i lea fa’amoemoe lelei, “Ina avatu ia le latou galuega lelei e talileleia mai e uso uma o pagatia i Samoa.”

I se manatu fa’aalia o Misipeka e tusa ai ma lona va’aia o le galulue fa’atasi o le fanau mo lea fa’amoemoe, sa ia fa’apea ai, “Ua ese le sogasoga o le fanau, ua tinou uma lava e fa’ao’o mai oloa, tu’ufa’atasia ma le fiafia, ma sa latou faia ma le agaga alofa, o se mea lelei lea mo le ‘au football fa’atasi ma le tutu fa’atasi e faia se galuega lelei! E o’o atu i le ta’a’alo fa’atasi, ua loto tasi fo’i i latou.”

 O lana toe upu mai e fa’apea, “Talosia ia vave ona fa’ao’o atu lenei galuega mai le fanau, ia aoga mo i latou o lo’o i ai le mana’omia i Samoa, o lona fa’amoemoega sili lava lea!”

Ua mae’a lena vaega o galuega fa’atino a le Chargers ae ua sauni ma koleni nei mo le latou ta’aloga e amatalia i le aso To’ona’i nei i le Veterans Memorial e amatalia ai le ta’amilosaga Football a le AYFS o le 2013, lea o le a latou fetaui ai ma le ‘au malosi a le Buccaneers mai Leone.

FA’AAOGA VETERANS STADIUM MO SAVALIGA MA FAAMALOSITINO

Ua amata le pulega fou ma ni suiga lelei mo le lautele. “E afua ia Ianuari 14, 2013 ona mafai ona fa’aaoga e le mamalu lautele le tatou Malae Ta’alo Veterans Memorial e savavali ma fa’amalositino ai, e aunoa ma se totogi!” O se tala mai lea a le sui ua tula’i nei e va’ava’aia le tumau le tatou malae ta’alo lea, Henry Tavake.

Ua fa’ailoa mai o itula e tatala ai lea malae i aso ta’itasi e afua i le 5:00am se’ia fa’ato’a tapunia i le 6:00 i le afiafi, ona e le manatu o ia e fa’aola moli mo savaliga a le mamalu lautele.

Peita’i, ina ua talanoa atu i le susuga Clayton Mahuka, lea e fa’atulaga le fa’aaogaina e lana Asosi Ta’aloga Afeleti o le Malae i Tafuna, ae sa ia fa’ailoa mai ai, “O le vaiaso atoa lea o le a sau e fa’aaogaina ai e la’u Asosi o Ta’aloga Afeleti le Malae i Tafuna mo koleniga fa’apitoa e fa’aleleia atili ai le tamo’e a le fanau ua aofia i lea fo’i fa’agatama.”

E ui ina e le’i taitai mai se ta’amilosaga fa’avaomalo e auina atu i ai le fanau, ae o lea ituaiga o fa’agatama, e ao ina tapena fanau ta’amomo’e i le tausaga atoa, ina ia lelei atili ai le latou taumafaiga pe a tauva fa’avaomalo mulimuli ane ai. O nei ta’amilosaga e aofia ai Ta’aloga a le Pasefika, Oceania ma le Olimipeka fo’i.

O le Asosi o Ta’aloga Afeleti lea ua fa’ailoa mai le latou igoa o le “Ohana Running Club” ma e ta’ita’ia e Clayton Mahuka. E le gata i lea, ae ua talosaga mai fo’i lea sui i matua ma talavou uma e lagona le fia tauva i lea fa’agatama, “Sau i le Malae ta’alo ma tusia ai lou igoa ma tatou koleni fa’atasi ai, o le aoga lea o le Malae tamoe fa’apitoa lea ua mae’a saunia e le Malo mo i tatou. O le isi mea, e leiloa po’o oe lea e i ai le agava’a sili mo lea fa’agatama, ma e te le iloa lea tulaga se’i vagana ua koleni fa’apitoa oe, ma e taumafai e te ausia se matati’a maualuga i lea fo’i fa’agatama.”

saunia; Leua Aiono Frost