FA’AULU TAGI FA’ASAGA I LE PERESETENE MA LE SUI PERESETENE O PALAU

Ua fa’aulu nei se tagi e fa’asaga i le peresetene o Palau, o Johnson Toribiong ma le sui peresetene, o Kerai Mariur.

E to’alima ni Senatoa na fa’auluina lenei tagi, ona o ni masalosaloga, i le fa’aaogaina o tupe a le malo Amerika, aua ni pagota mai i Guantanamo.

O lo o ta’ua i totonu o le tagi, le i ai o se masalosaloga, na fa’aaoga e Toribiong ia se tinoitupe e $500,000 (tupe Amerika), ma se fa’atonuga, e na’o le peresetene e mafai ona fa’ataga le fa’aaogaina o lea tupe.

Ua ta’ua fo’i i totonu o le tagi, le fa’aaogaina, pe a ma le $250,000, e totogi ai se kamupani ua ta’ua o le Toribiong Enterprises ma le tama’ita’i o Sandy Toribion, le to’alua o le uso a le ali’i peresetene, mo fale, fa’aleleia o fale ma meafale a le aiga o Uighur.

O nei galuega e le’i faia i se auala e faia ai ni tauofoga, e pei ona i ai tulafono a Palau.

FESILIGIA GALUEGA 50 MAI I LE PERESETENE O TAHITI

Ua i luma nei o le fa’amasinoga i Pape’ete, se tagi na fa’aulu e le komesina maualuga a Falani, o Richard Didier, lea o lo o tu’ua’ia le peresetene o Tahiti, i lona fa’afaigaluega o ni tagata se to’a 50, i ni auala solitulafono.

Na ta’ua e Didier, e tatau ona toe fa’ate’a nei tagata e to’a 50, lea na fa’afaigaluega e Oscar Temaru.  O galuega o lo o ta’ua, e aofia ai failautusi, failautusi fa’apitoa ma faufautua, ae o lo o taofi Didier, e le o fa’ataunu’uina a latou galuega.

O le lua vaiaso o loma nei, ua fa’amoemoe e maua ai se tali o lenei mata’upu. 

E tusa ai ma ni fa’asalalauga i luga o televise, o lo o ta’ua ai e fa’apea, na fa’aleaogaina fo’i e le fa’amasinoga ia ni galuega fa’apenei fo’i, mai i nofoaiga a ni isi o peresetene tuai.

LOKA NI TAMAITI NA FA’ATAU FUALA’AU FAASAINA I MAKETI A SAMOA

Ua fa’amalosia nei ia le va’ava’aia o fale fa’atali pasai i le maketi i Fugalei, talu ai le lokaina mai o ni tamaiti talavou se to’a 14, ina ua o latou fa’aaogaina lea nofoaga, e ulaula ai ma fa’atau atu fuala’au fa’asaina.

O se osofa’iga fa’afuase’i a leoleo, na maua ai le to’a 10 o le to’a 14 lea, ae o seisi osofa’iga fa’afuase’i a leoleo, na faia i se taimi mulimuli ane, na toe maua ai leisi to’afa.  Ma ua molia uma nei i latou i le tulafono.

Ua fa’aalia e le Komesina o Leoleo, le susuga Lilomaiava Fou Taioalo, le mamafa o leoleoga i nofoaga faitele, lea o lo o masalomia le fa’atauina ai o fuala’au fa’asaina, e pei o fale fa’atali pasi, flea maketi ma isi nofoaga.

Na ta’ua fo’i e Lilomaiava le iloiloina e leoleo o ripoti e fa’apea, o lo o fa’aaogaina fuala’au fa’asaina i le falepuipui i Tafaigata.

TO’ALIMA MALILIU I TOTONU O MAINA I PAPUA NIU KINI

E to’alima ni tagata ua maua o latou tino maliu i totonu o maina i Papua Niu Kini, ina ua mae’a ona fa’apa pa ai i totonu ni faga i’a.

Na ta’ua e le pulega o le maina, o Barrick Niugini Ltd., na fa’ato’a nofo malamalama i latou sa i luga, e tusa ai ma i latou ua maliliu i totonu o nei maina, ona o se ali’i na ‘etu mai i fafo, ua fa’amanu’alia, ina ua pa le fagai’a, ma ia fa’ailoa mai le i ai o ni isi i totonu.

Sa faia ni su’esu’ega ma maua ai ni tino maliu se lima.  Na ta’ua e le pule o le Barrick Niugini Ltd., o Greg Walker, o se fa’ata’ita’iga fa’anoanoa lenei i le le saogalemu o maina, mo tagata e le o fa’atagaina ona o i ai i lalo.

[radio new zealand international]