Ads by Google Ads by Google

Tala ‘oto’oto o le Pasefika

TELE FALE MA FA’ATO’AGA FA’ALEAGA I LE AFA O JASMINE

Na fa’amaonia mai e se sui o le Ofisa o Fa’alavelave Fa’afuasei i totonu o Vanuatu e fa’apea, e ui ina ua tele fale ma fa’ato’aga ua fa’aleaga ona o le afa o Jasmine, ae peita’i, e leai se ripoti o ni tagata maliliu ua maua atu.

O lo o fa’aauau pea ona fa’asalalau lapata’iga o le sou o le sami ma le maualuluga o galu.

TETE’E FOFOGA FETALAI A TONGA MOLIAGA I LONA FA’AAOGA O TUPE A LE MALO I LANA FA’AIPOIPOGA

Na fa’aalia e le Fofoga Fetalai a le malo o Tonga, o Lord Lasike, lona tete’e i tu’ua’iga e fa’apea, na ia fa’aaogaina tupe a le malo i lana fa’aipoipoga lea sa fai lata mai nei, i Las Vegas.

O le masina o Novema, na malaga ai le Fofoga Fetalai i Isaraelu, e ui ina o lo o fa’asaina o ia e le fa’amasinoga, ma fai ai lana fa’aipoipoga i Amerika.

Na saunoa Lord Lasike, sa fa’aaoga lava ana tupe i lana fa’aipoipoiga.

SAILI LEOLEO A LE ATU MARIANA MAFUA’AGA NA MALIU FASIA AI EMERITA ROMERO

Ua amata nei se su’esu’ega a leoleo o le Atu Mariana, e sa’ili le mafua’aga na maliu fasia ai le tama’ita’i o Emerita Relata Romero, lea na maua atu lona tino maliu i se fale tu’ufua, ma o lo o faia ai nei su’esu’ega a foma’i, e fa’amautu le mafua’aga na maliu ai.

Na fa’aalia e le sui o le radio new zealand le fa’ate’ia o tagata o le aiga o Romero ona o lenei fa’alavelave mata’utia, ma ua naunau ina ia maua mai se tali mai i leoleo, ina ia mafai ona faia i ai se fa’ai’uga fa’aletulafono.

Ae le gata i lea, o lo o to’atele e ua le mautonu ona o se tagata fasioti tagata o lo o i o latou ogatotonu.

MALIU SE LEOLEO INDONESIA I SE OSOFA’IGA I PAPUA

Ua fa’ailoa m ai le maliu o se leoleo Indonesia ina ua lavea i se pulufana, a’o tiute i tafatafa o le maina ‘Freeport’, lea e i vaega mauga i Papua.  O lo o ua masalomia e leoleo ia se fa’alapotopotoga ua ta’ua o “separatist”, i le fa’atupuina o lenei fa’afitauli.

E tusa ai ma se fa’aaliga a le Jakarta Post, ua ta’ua ai se saunoaga a le ta’ita’i leoleo o Papua, o B. L. Tobing, e fa’apea, ua mae’a ona filifilia ni leoleo e latou te sa’ili lea fa’alapotopotoga.

I le masina ua mavae, na maliliu ai ni tagata faigaluega o le maina lava lea, ina ua fanaina fo’i e se tagata, i le nofoaga lava e tasi lea ua maliu ai le leoleo.

Aumai: Radio New Zealand