Ads by Google Ads by Google

Tala ‘oto’oto mai Samoa

O se feau taua na tu’uina mai e Fa’amasino Mata Tuatagaloa i le Aso Tofi o le vaiaso ua mavae, ina ua ia lauina le fa’asalaga o Satini Sa’u Filemu, e le tatau ona fa’aaoga sese e ta’ita’i o latou tofiga.

O Satini Sa’u Filemu ua ta’usalaina i le fa’ao’olima ma lona palauvale i seisi leoleo ma ua fa’atonuina o ia e na te totogia se sala tupe e $550 po o le loka i le falepuipui mo le lua masina.

Na ioe le ali’i Satini i lona poina o se leoleo i le aso 6 o Iuni, 2011 ma e tusa ai ma fa’amaumauga a le ofisa a leoleo, na toe fa’ato’ese Satini Filemu i lea leoleo i le aso lava na tupu ai le fa’alavelave.

Na fa’amaonia fo’i e Satini Filemu lona palauvale i seisi leoleo e sili atu lona tofi ia te ia.  Na fa’aalia e Tuatagaloa le feagai o lenei ali’i leoleo ma fa’afaigata i le pulea o lona loto ita, aemaise o le ava fa’aaloalo i le va o ia ma isi tagata.

Na fa’aalia foi e le tama’ita’i fa’amasino e fa’apea, ua 23 tausaga o avea Satini Filemu ma leoleo ma o se ulua’i taimi lenei ua molia ai i se solitulafono.  Ma na fa’ailoa atu e le tama’ita’i fa’amasino i le ali’i Satini e fa’apea, ua toe ta’uvalea lava lana tautua, ona o ia lava.

Na fa’aalia fo’i e Tuatagaloa, ua amana’ia e le fa’amasinoga le tali ioe o le ali’i Satini i ona moliaga, e le gata i lea, o le i ai o le tina o le aiga i atunu’u i fafo, ma le leai o se tasi e fesoasoani i le tausiga o le la fanau.  Na fa’aalia e le ali’i Satini, ua mae’a ona toe fa’aleleia tulaga uma i le va o ia ma le leoleo na tupu ai le fa’alavelave.

FA’ATU’IESE PISINISI FALE MALIU I LE TOE TATALA FALE MALIU A LE FALEMA’I

Na fa’aalia e le pule o le fale maliu o Pau Sefo Pau, lea o lo o i Savai’i, lona tete’e i le toe tatalaina o le fale maliu i le falema’i i Tuasivi.  O le vaiaso ua mavae, na fa’aalia ai e le ta’ita’i o le Itu Tautua, le susuga Palusalue Faapo II, le tatau i le malo ona toe tatala le falemaliu i Tuasivi.

Na ta’ua e Palusalue, ua avea le tapunia o le fale maliu a Tuasivi ma avega mamafa i tagata o Savai’i.  Ae peita’i, ua u’una’ia e Pau ia Palusalue ina ia toe taga’i lelei i lenei mata’upu.

Na ta’ua e Pau, e le tele se tupe a aiga e alu i lenei tautua, ma e na te fa’amaonia lea tulaga, ona e na’o lona fale maliu o lo o i ai nei i Savai’i.  Na saunoa Pau, talu ona tatalaina lana pisinisi i le 1984, e na’o le $13 (tupe Samoa) o lo o totogi e tagata Savai’i e tu’u ai o latou tagata maliu i le fale maliu.

Na fa’aauau le fa’amatalaga a Pau e fa’apea, o le fale maliu i Tuasivi, na amata mai e $15 (tupe Samoa), le totogi i le po, ae e o’o mai i le taimi na tapunia ai, ua $35 i le po.

FONO TA’ITA’I O LE ATU POLENISIA I SAMOA MO LE FA’AVAEINA O SE IUNI

O le vaiaso nei ua fuafua e faia ai le ulua’i fono a le Iuni a Polenisia i Apia.  O se fa’alapotopotoga na fa’atula’i e le palemia o Samoa, le afioga Tuilaepa Sailele Malielegaoi, i le Fono Tele a ta’ita’i o le Pasefika sa faia i le masina o Setema.

Na ta’ua e Tuilaepa, o lenei Fono Tele, e mo tagata Polenisia ina ia mafai ona fa’avaeina se iuni, ma o le vaiaso nei o le a filifilia ai se Komiti e fa’afoeina lenei iuni.

Na ta’ua e le Komesina Maualuga a Niue i Niu Sila, o O’Love Jacobsen, lea o lo o avea ma sui o lona atunu’u i le Fono, o lo o i ai sona talitonuga o le a loto gatasi ta’ita’i o le atu Polenisia.

FA’AFOTUTUPU LE AFIOGA SAVEATAMA SEPP STEFFANY

O le amataga o le masina nei, na fa’ataunu’uina ai le fa’afotutupu o le afioga Saveatama Sepp Steffany, se tasi o faipisinisi i totonu o Amerika Samoa, i le afioaga o Siumu i Upolu.  O le afioga Saveatama o se alo i le aiga sa Malietoa Ganasavea.

Na aofia potopoto suli o Poualae, na aofia ai Leta’a, Fatumanavaopolu (Li’o) ma Lefau (Pupuali’i) i lenei fa’amoemoe, fa’apea ma matai o le afio’aga ma le itumalo, fa’apea le afioga Tu’uu Anasi’i, le Faipule o le itumalo.

Na amataina le polokalama i le sauniga lotu, ona soso’o ai lea ma le fa’apa’iaina o le nofo e fa’afeagaiga.  Ma sa fa’ataunu’u ai tulaga masani o le atunu’u.

O Saveatama o se alo e fa’asino ia Leta’a ma Tuiletufuga lea o lo o se’ei mai ai nei Leta’a Taunese ma Tuiletufuga Tuki o Apia.

(Source: Samoa Observer)