TUILAEPA: LE TATAU ONA TOTOGI FAIAOGA A’OGA FA’ATA’ITA’I

O le vaiaso ua mavae na fa’atula’i ai e le Palemia o Samoa, le afioga Tuilaepa Sa’ilele Malielegaoi, se manatu ina ia le totogia tautua a faiaoga o a’oga fa’ata’ita’i, e tali ai se fesili mai i le Faipule o Falealupo, le susuga A’e’au Peniamina Leavaise’eta, i le mafua’aga ua le totogia ai faiaoga o a’oga fa’ata’ita’i i totonu o lona itumalo.

Na ta’ua e A’e’au, le taua o nei a’oga ona o le ulua’i la’asaga lea o olaga fa’alea’oa’oga a fanau, ma e tatau i le malo ona lagolagoina taumafaiga pe tali i mana’oga a faiaoga.

Na fa’aalia fo’i e A’e’au i luma o le Palemene e fa’apea, o lo o ao tupe matua o lona itumalo, e totogi ai nei faiaoga.

Na saunoa Tuilaepa, o lo o lagolago le malo i galuega a faiaoga e ala i tupe ua tu’uina atu e fesoasoani i la latou galuega.  Ae na saunoa ai fo’i Tuilaepa, atonu e tatau ona galulue nei faiaoga e aunoa ma ni totogi.

Sa ta’ua e Tuilaepa, i o latou vaitaimi, e le totogia faletua o faifeau ia e faia a’oga fa’ata’ita’i.  Ae o nei vaitaimi, ua tele ma anoanoa’i a’oga fa’ata’ita’i ua fa’atu i totonu o nu’u ma afio’aga, ma e fiu lava le malo e fa’asoa atu tupe, ae e foliga mai e le lava lava.

FASI SE LEOLEO I LE AMIO LE TAUPULEA

O lo o faia nei e le ofisa a leoleo sa latou su’esu’ega, i se fa’alavelave na tula’i mai i Savaia i Lefaga i le amataga o le vaiaso ua tuana’i.

Na ta’ua e le sui Komesina o Leoleo, le susuga Leaupepe Fatu Pula, o le taeao o le Aso Lulu na o’o atu ai se tina faipisinisi e ona le fanua na tupu ai le fa’alavelave, e fa’aulu sana tagi e fa’asaga i le ali’i leoleo o lo o molia i lenei mata’upu.

Na saunoa Leaupepe, e tatau lava i leoleo ona nofo uta i a latou amioga, e tusa lava po o la’ei le togina, pe leai.

Na fa’amaonia e Le’aupepe, le fa’auluina e lenei ali’i leoleo, lea e galue i Faleata, ia sana tagi e fa’asaga ia i latou na fa’ao’olima ia te ia, ma fa’aleagaina lana ta’avale.  O lo o i ai se talitonuga, e tupu lenei fa’alavelave a’o fa’asuaava le ali’i leoleo, ma sa ia tagofia fo’i ia fuala’au fa’asaina, o le mariuana.

Sa fa’amatala e se tasi o le aiga o le tina faipisinisi, na taumafai le ali’i leoleo na a’afia i lenei fa’alavelave, e totogi ni ana fagu pia se lua ma se pepa sikaleti, i sana ATM.  Ma e fai le fa’atauga a le ali’i leoleo, ae o lo o i ai fa’atasi ma seisi tamaloa, ma sa la talosaga lo la fia ta’a’alo i le piliati a le aiga.

Ina ua fa’ailoa atu i le leoleo e leai se masini e mafai ona fa’aaoga ai lana ATM, na oso lea ali’i i le fa’ali’i ma fa’apea atu i le fa’atau oloa, e le o se pona lena o ia.  Ae ina ua fa’atonu e le fa’atauoloa nei ali’i e o ese ma le fanau, o i’ina na amata ai ona tau’ai e se tasi o i la’ua ia, ia le fale o le aiga.

Ae o le taimi lea o lo o faia se fiafia a le aiga ma na i’u lava ina o mai taulele’a o le aiga, ua fasi le ali’i leoleo.

Na o’o lava i le ta’avale a le ali’i leoleo lea na paka i luga o le fanua a le aiga, na tau’ai ma fa’aleaga, fa’atasi ai ma seisi ta’avale, o lo o talitonu, o le ta’avale a le uo a le leoleo.

Aumai: Samoa Observer