Ads by Google Ads by Google

Tala ‘oto’oto mai Samoa

LE TALAFEAGAI LE TO’ATELE O MATAI AE TASI LE SUAFA

Ua fa’aalia e le susuga Maulolo Le’aula Tavita Amosa, se sui faufautua i tulaga o tu ma aganu’u, o se tulaga le talafeagai ma fa’ato’ilalo aganu’u, ia le to’atele o matai e nonofo i le suafa e tasi.

Na fa’aalia e Maulolo, e le tatau ona tupu lenei tulaga, ona e ta’uleagaina ai aiga ma manatu maualalo ai tagata i le taua o suafa matai.

O le saunoaga a Maulolo, sa faia, ina ua mae’a ona salalau se tala lea na ta’ua ai e Dallas Fasi, lona mauaina o lona suafa matai mai i le aiga o lona tina i le 2005.  Ae na ta’ua e Fasi lona matamuli, pe a vala’au o ia e tagata i lona suafa matai, ona e o’o ia te ia le lagona, e le o agava’a mo lenei suafa.

Na ta’ua e Fasi, na mafua ona tu’uina atu ia te ia le suafa matai, ona o le le’i lava o taulele’a o lo latou aiga, o lea na filifili ai ulumatua ali’i o aiga i totonu o le nu’u, e nonofo i suafa matai.  O le tulaga lea, na ta’ua e Maulolo, e tatau lava ona manatu mamafa i ai tagata Samoa.

Na fa’aalia fo’i e Maulolo lona le fiafia i le fa’aaogaina e ni isi o aiga, ni tagata e fai ma sui mo i latou e tatau ona fai a latou nofo.  Sa ia ta’ua lona fa’atu’iese i le tapa e seisi o le ipu mo seisi tagata o lona aiga, ua le mafai ona auai i le saofa’i.

Na ta’ua e Maulolo le fa’agaloina e tagata Samoa vaega taua o se saofa’i, e pei o faiga lauga, lea e tolaulau mai ai i le matai fou ona tiute fa’alematai.  Sa fa’aalia e Maulolo, le suia o le taua o le matai, mo se fa’ata’ita’iga, o nei vaitaimi, ua le toe manatu mamafa tagata o le nu’u i se matai e nofo i totonu o le aiga ma tautua le aiga, ua talia lava e i latou matai e nonofo mai i atunu’u i fafo ma lafo mai tupe e fai ai mea a matai, o ituaiga matai ia ua ta’ua e Maulolo, o aitaumalele.

FAIA SU’ESU’EGA A LEOLEO I LE FA’AFITAULI I LE FANUA I VAILELE

Ua tula’i mai nei le ofisa a leoleo e taumafai e fa’ato’ato’a le mata’upu i fanua i Vailele, lea ua lagomau ai nei se tama o se aiga, e ui ina ua fa’atonuina i latou e le fa’amasinoga e tula’i ‘ese ma le fanua.

Na fa’aalia e le sui Komesina o Leoleo, le susuga Le’aupepe Fatu Pula, ona ua le usita’ia e le aiga ia le fa’atonuga a le fa’amasinoga ma le malo, o lea ua ta’oto atu ai nei i lo latou ofisa, mo le sailia o se vaifofo i lenei mata’upu.

Na ta’ua e Le’aupepe e fa’apea, o le a su’esu’e uma tagata o lo o a’afia i lenei mata’upu, e aofia ai ma le aiga o le susuga Savelio Namulau’ulu, lea ua faiilagi le folauga.

I le fa’atonuga a le fa’amasinoga, e pei ona talosagaina e le Ofisa a le Loia Sili, ua fa’atonuina ai le aiga o Savelio ina ia aua ne’i toe faia se galuega lava e tasi i luga o le fanua, ae ia o ese ma le fanua.  Ae peita’i, na fa’aalia le tete’e o le aiga, e ala i lo latou lagomau o le tino maliu o Savelio i luga o le fanua.

O lo o taofi le faletua o Savelio, o le fanua lenei, sa fa’ameaalofa atu e Malietoa Tanumafili II i lona to’alua, a’o soifua le Ao o le Malo, ona o le tautua a Savelio.

Na ta’ua e Sia Savelio namulauulu, o le a ia tumau lava i le taofi a lona toalua, aua o lo o ia iloa, sa tausia e lona toalua fa’amaumauga, i le maliliega i le va o lona toalua ma Malietoa.

Na fa’aalia e le sui pule sili o le Minisita o Puna’oa Faalenatura, le susuga Suluimalo Amataga Penaia, ua mae’a le latou vaega, ma ua i a’ao o leoleo lenei mataupu.  Na ta’ua e Suluimalo, ae e le’i faimalaga ese atu le pule o lo latou ofisa, sa o latou talanoaina le fa’ai’uga ina ia tapa i se fa’atonuga mai i le fa’amasinoga e ave’esea ai aiga mai i le fanua i Vailele.

Na saunoa Suluimalo, ua uma ona tu’uina atu ni fa’aaliga ma lapata’iga i nei aiga, ina ia tula’i ese mai i le fanua.

Aumai: Samoa Observer