Ads by Google Ads by Google

Tala ‘oto’oto mai Samoa

TINO MAI GALUEGA A PAGOTA I TAFA’IGATA

Ua i ai nei se fa’aopoopoga fou i fanua o lo o i ai le falepuipui a le malo i Tafa’igata, o se malumalu fou e $186,000 lona tau, ua suia ai nei le malumalu tuai O le Toefuata’iina.

Na saunoa le ali’i komesina o leoleo, le susuga Lilomaiava Fou Taioalo, o se tulaga e fa’agae’etia ai le loto ona o lenei galuega maoa’e ua faia e pagota.  O i latou uma na galulue i le fausia o lenei malumalu fou, sa le’i gata i pagota o lo o taofia nei i Tafa’igata, ae fa’apea fo’i ni isi ua mae’a ona tatala i tua, ae ua toe fo’i atu e galulue fa’atasi ma pagota ina ia mafai ona fa’ataunu’uina lenei fa’amoemoe.

O le fa’atupeina o lenei galuega, sa auala mai lea i sa’iliga tupe a pagota, na aofia ai ni a latou lipine pese sa fa’atauina atu, ma a latou fa’afiafiaga sa faia.

Na fa’aalia e le sui palemia, le susuga Tolofuaivalelei Falemoe Le’aitaua lona agaga fa’afetai i le malo, i le taliaina o se talosaga mai i pagota ina ia mafai ona tu’uina mai le fa’atagaga e latou te fausia ai lenei malumalu.

Na ia vi’ia fo’i le loto tetele o nei pagota ua mafai ai ona tino mai lenei fa’amoemoe.  Ae na saunoa le sui palemia i le si’itia o le tulaga o solitulafono i totonu o Samoa, ma sa ia fa’amanatuina atu i pagota tulaga mafatia ua o’o i ai o latou aiga ona o a latou solitulafono.

IOE LE FA’AMASINOGA O LO O ALAGATATAU LE NOFO I LE SUAFA MATAAFA

Ua maua mai nei le fa’ai’uga a le fa’amasinoga ma ua talia le nofo a le afioga Tupuola Lui Iosefo i le suafa Mata’afa i Amaile, Aleipata.

O le fa’ai’uga sa tu’uina mai e le sui peresetene o le Fa’amasinoga o Fanua ma Suafa, le susuga Misa Iuli Anae ma sa lagona le patipati o tagata sa i totonu o le potu fa’amasinoga, ina ua lauina mai le fa’ai’uga a le fa’amasinoga.

E to’atele nisi na fa’atalitali atu i fafo, ina ua fa’atumulia le potu fa’amasino ma ina ua ulufafo mai ma le manuia le afioga Mata’afa Lui, sa molimauina le loimata maligi ma le agaga fa’afetai ina ua i’u manuia ana taumafaiga.

Na fa’aalia e le afioga Mata’afa, ua o’o mai le taimi e fa’agalo ai mea ua tuana’i, ae aga’i i luma aua se manuia mo le aiga.

Na fa’aalia e Mata’afa Lui, o le mea muamua lava e tatau ona faia, o le fa’atasia lea o le aiga.  Sa ia ta’ua, na ia lagona lava le mea moni ma le tonu, ae peita’i, ua mafai ona fa’amautuina ina ua tu’uina mai le fa’ai’uga mai i le fa’amasinoga, aua e leai seisi e i luga atu o le tulafono.

Na fa’aalia le agaga fa’afetai o Mata’afa i lona aiga, o lana faafeagaiga, o lona nu’u ma le itumalo ma i latou uma sa lagolagosua i lana taumafaiga.

Aumai: Samoa Observer; fa’aliliu; A. Tuna