Ads by Google Ads by Google

Tala ‘oto’oto mai Samoa

AMATA FA’AMASINOGA TOLUONO FETI TOLUONO

O le amataga o le vaiaso, sa amataina ai le fa’amasinoga, i se tagi na fa’aulu e fa’asaga ia Toluono Feti Toluono, lea na avea ma Faipule o le itumalo o Palauli i Savaii, i lona fa’atauina o ni fanua a ni isi i se auala le fa’amaoni.

O le tasi o fanua na fa’atau e Toluono, o se fanua a se tina e suafa ia Theresa Stowers, ae o leisi, o le fanua a Rosita Bourke.  Na fa’ate’ia nei tina ina ua maua le fa’amatalaga ua fa’atauina a la fanua e Toluono, e aunoa ma so la iloa pe malilie fo’i i ai.

O lo o te’ena e Toluono, lea sa avea ma pule sili o le EPC, ia nei tu’ua’iga.  O le susuga i le ali’i loia ia Tole’afoa Solomona Toa’iloa, o lo o tula’i mo Toluono.  Ae o le sui Loia Sili ia Precious Chang, o lo o avea ma sui o le malo.  O le susuga i le alii fa’amasino ia Pierre Slicer, o lo o fa’afoeina lenei mata’upu.

Sa fa’amatala e Chang i luma o le fa’amasinoga e fa’apea, o Stowers ma Bourke, e fa’amautu i atunu’u i fafo.  O le tausaga e 2007 na fa’ato’a nofo malamalama ai Stowers, ua i lalo o le suafa o Toluono ia lona fanua.  Ae na fa’ato’a iloa e Bourke lea tulaga, i lona fanua, i le 2010.

Na ta’ua e fa’apea, sa fa’atauina atu Toluono nei fanua i se ulugali’i mo se tinoitupe e $47,000.  Na fa’afofoga foi le fa’amasinoga e fa’apea, o le 2002 na faia ai se faiga uo a Toluono ma Vasalisa Stowers, lea ua fa’asala i le falepuipui mo le lua tausaga, ona o lana vaega i lenei mata’upu.

Sa ta’ua e le malo, a’o faia le faigauo a Toluono ma Vasalisa, na fesiligia e Toluono ia Vasalisa e tusa ai ma le fanua a Stowers, o se tasi o le aiga o le to’alua muamua a Vasalisa.  Na ta’ua le o’o atu o Toluono ma Vasalisa i le Ofisa Lesitala i Apia, e su’e le lesitala o le fanua ma sa la maua ai fa’amaumauga o le fanua i lalo o le igoa o Terisa Taufau Stowers i Alafua.

O lo o ta’ua e fa’apea, na ave e Toluono ma Vasalisa ia nei fa’amaumauga mai i le ofisa lesitala ma i le aso 24 o Tesema, na o ai i la’ua nei i se ofisa loia ma o lo o tu’ua’ia ai le fa’atonuina e Toluono o Vasalisa, ina ia saini le igoa o le ana le fanua.

Ia Aokuso 10, 2007, o lo o tu’ua’ia ai le toe faia foi e le to’alua lea o le mea e tasi i pepa o le fanua a Rosita Burke.  Na fa’aalia e le loia a le malo i luma o le fa’amasinoga e fa’apea, o lo o fuafua le faia o se molimau a Vasalisa, e fa’asaga ia Toluono.

POLOKA TA’AVALE I SE FUSU’AGA

Na fai sina umi o poloka femalaga’iga a ta’avale i le maga fa i Apia, i le va o le SLAC ma le Lotemau, i se fusu’aga a ni ali’i se to’alua, lea na toeititi so’a ai leisi ali’i i se ta’avale.

Na o’o atu fusu’aga a nei ali’i i luma o le fale a le CSL ma ta’e ai le fa’amalama o le fale’olao ina ua u’una’i e leisi ali’i fusu, leisi ali’i, ma pa’u atu ai i le fa’amalama.

Na taumafai aveta’avale e taofi le fusu’aga a nei ali’i, e ala i le fa’a’e’e o pu a latou ta’avale, ae peita’i, na molimauina le leai o se kea a le to’alua i seisi ae avau a la fusu’aga.

O le taunu’u atu o leoleo na mafai ai loa ona vaovao le misa a le to’alua, ae o le taimi lea ua tamomo’e sikulaki o le CSL e tau pulu seisi misa a seisi to’alua i le isi itu o le faleoloa, lea na tau vaovao mai ai se tama’ita’i na oso ina ua feosofi isi ali’i e to’alua i le misa.

O tala a ni isi o le au maimoa, ia o le masani lava lea a nei ali’i e fai, o le fusu i le taulaga.

Source: Samoa Observer

FA’ATONU TV3 E TOTOGI TUPE O LE TAGI

Ua manumalo nei ia Tuala Joe Ponifasio, i lana tagi na fa’aulu i le fa’amasinoga, e fa’asaga i le ofisa televise a le TV3, ona o ni ripoti sa fa’alalau e lenei ofisa televise, ua ta’ua e Tuala, ua ta’uvalea ai lona igoa.

O le ripoti a le TV3 sa fa’asalalauina ae e le’i faia le palota lautele a le atunu’u ia Mati o le tausaga nei, lea sa avea ai Tuala ma se tasi o ana sui tauva mo le itu a le Tautua Samoa.  Na ta’ua i lea ripoti, le tu’ua’ia o Tuala i le fa’aaoga sese o ni tupe.

Ua fa’atonuina nei e le fa’amasinoga ia Atanoa Herbert Crichton, le pule o le TV3 ma le tusitala o Tutuila Farao, e totogia se tinoitupe e $60 afe (tupe Amerika) ia Tuala.

TOTOGI E SE LOIA SAMOA SALA TUPE I TU’UA’IGA O LE MULILUA

Na ta’ua e se tama’ita’i loia i Samoa lona totogia o se sala tupe, ina ua tu’ua’ia o ia i le mulilua.  Na ta’ua e lenei loia, ua mafua ona ia totogia lea tupe, ona o lona manatu alofa i lona aiga.  Sa ia ta’ua, na i ai sona manatu e o’o i luma o le fa’amasinoga lenei mata’upu, ina ua fa’asala o ia e matai o Leulumoega.

E pei ona ripotia mai e Leilani Momoisea a le RNZI, e fa’apea, na ta’ua e lenei tama’ita’i loia, le fa’ailoa atu e lona aiga ia te ia, le fa’asala o ia i le $500 (tupe Amerika), i se fono a le nu’u sa fai, ae e le’i auai ai o ia, ona o tu’ua’iga i le faia o se la faigauo ma se ali’i faipisinisi o lo o fai se to’alua.

Na ta’ua e lenei tama’ita’i loia lona fa’atu’i’ese i le fa’ai’uga ua faia e matai o le nu’u, ma e ui i lona fa’aaloalo i matai o le nu’u, ua 27 tausaga e le’i toe nofo i Leulumoega.  Ae peita’i, na ta’ua e lenei tama’ita’i, ua ia totogia le sala, ona o lo o iai pea lona aiga i totonu o le nu’u.

Na ta’ua e le tama’ita’i le mae’a o lenei mata’upu ae o lo o i ai ni fa’amatalaga e fa’apea, ua mafua ona fa’asala e le nu’u lenei tama’ita’i ona o le ta’uvalea o le suafa matai o lo o ia umia.  Ae peita’i, na ta’ua e le tama’ita’i, e leai sona suafa matai ona e le fa’atagaina e Leulumoega ia tama’ita’i ona umia ni suafa matai.

Source: Radio New Zealand