O le Aso Faraile o le vaiaso ua mavae na fa’amavae ai se pulea’oga o se tasi o a’oga a le Ekalesia Fa’apotopotoga Kerisiano i Samoa...

ona o ni fa’asea mai i ni isi o faiaoga i totonu o lea a’oga.

Na fa’aalia e le Ta’ita’ifono o le Komiti o A’oga a le EFKS, le susuga Rev. Palemia Tauiliili, o lo o ua fuafua nei se fonotaga ma le tama’ita’i, ae o le mafua’aga na fa’amavae ai, ona o tulaga i le soifua maloloina.

Ae peita’i na fa’amaonia mai e ni isi o faiaoga o lea aoga, lo latou fa’asea i le komiti e tusa ai o lenei puleaoga.  E le i fa’alautele e Rev. Tauiliili lana fa’amatalaga, sei vagana ai lona fa’apea mai, o faiga lava nei a faiaoga.

Na ta’ua e Rev. Tauiliili le fa’aalia e ni isi o faiaoga lo latou le fiafia i le puleaoga ona o ni fe’ese’esea’iga i taimi ua tuana’i ma na o latou fa’aalia lo latou manana’o i se puleaoga fou.

Na saunoa foi le ta’ita’ifono e fa’apea, o le masani lava nei o faiaoga, pe a fai se fa’ai’uga a le puleaoga e latou te le fiafia i ai.

U’UNA’IA LEOLEO E GALULUE FA’ATASI

Na ta’ua e le Komesina o Leoleo, le susuga Lilomaiava Fou Taulealo, i lana saunoaga i le tatalaga aloaia o ni a’oa’oga fa’apitoa mo leoleo ma sikulaki, lea sa faia i le ‘Bowling Gym’ i Tuana’imato i le fa’ai’uga o le vaiaso na se’i mavae atu, le taua o le galulue fa’atasi aua le atina’eina o le puipuiga o le saogalemu lautele o tagata o le atunu’u.

O nei a’oa’oga e fa’amoemoe e toe atina’e pe si’itia ai le tautua a leoleo, lea e aofia ai leoleo e to’a 15 mai i le Minisita o Femalagaiga i luga o Alatele fa’apea ma leoleo e to’a 18 mai i le Ofisa o Leoleo.

Na fa’aalia e Lilomaiava e fa’apea, e le mafai ona manuia lenei tautua pe afai e le galulue fa’atasi leoleo o ofisa e lua.  Na ia toe fa’amanino mai fo’i ia le tulafono lea e ma’oti mai ai le le mafai i leoleo i luga o le alatele ona lokaina se aveta’avale solitulafono, e na’o le tu’u i ai o le sala e totogi.

Na fa’aalia e le loia a le LTA, o Anoanoai Lafai e fa’apea, o lenei a’oa’oga, e ta’i kuata ma fa’ataunu’uina ina ia mafai ona nofo malamalama pea leoleo i le fa’atinoina o a latou tiute.  Sa ia ta’ua e fa’apea, o nei a’oa’oga sa masani ona gata i lo latou ofisa, ae peita’i, ua a’e se manatu ina ia auai ai ma leoleo mai i le ofisa a leoleo, ina ia mafai ona fa’amalosia fegalegalea’iga i le va o ofisa e lua ina ia mafai ona galulue fa’atasi aua se lelei ma le saogalemu o le atunu’u.

Na fa’aalia foi e Lafai lona lagolagoina o le manatu a le ali’i komesina, i le toe iloiloina lea o le tulafono i leisi sefulu tausaga o i luma, ina ia mafai ona toe fa’afouina ni isi o tulafono e fa’atatau i le alatele.

(Source: Samoa Observer)

AMATA ILOILOGA O LE SUAFA MATA’AFA

O le vaiaso nei ua fuafua e amata ai iloiloga i tagi ua faia fa’asaga i le nofo a le susuga Tupuola Lui Iosefo i le suafa matai o Mataafa, lea na faia i le masina o Me i le tausaga nei.

O lo o ua i ai foi se talosaga mai i le minisita o fa’amasinoga, o Fiame Naomi Mataafa, ina ia le ave’esea le suafa mai ia Tupuola, ona o se fa’ai’uga na autasi ai lo latou aiga, ina ia nofo Tupuola i le suafa.

Ae peitai, i se tagi ua fa’aulu e se tasi itu o le aiga, lea o lo o ta’ita’ia e Marina Schaffhausen, o lo o latou ta’ua ai le le’i logoina o lo latou itu e tusa ai ma lenei fa’ai’uga.

(Source: Radio New Zealand)