TOALUA NA MALILIU I LE ASO KERISIMASI

E toalua ni alii na maliliu i le Aso Kerisimasi ona o le tulaga lava i le tagofia o le ‘ava malosi.  O le tasi o nei alii na maliu ina ua so’a e le ta’avale sa malaga ai, ia se pou moli i Vaitele i le taeao o le Aso Kerisimasi, ae o leisi na maliu ina ua fasi faamo’amo’a e ni isi o le afioaga o Fasito’o-tai, lea ua molia ai ni alii se toalima mai i Fasito’o-tai.

Na faamaonia e le sui Komesina o Leoleo, le susuga Le’aupepe Fatu Pula, o alii po o tamaloloa na a’afia uma i fa’alavelave e lua, na fa’asuaava uma i latou.

Na ta’ua e Leaupepe, o le alii e 26 tausaga lea na maliu mai i Fasitoo-tai, sa ‘ona ma fealua’i i luga o le alatele a le nu’u ma fa’aumuumu ma lafo ni faamatalaga le talafeagai.  O le mafua’aga lea na fasi ai o ia e ni alii po o ni tamaloloa o le nuu, ma i’u ina maliu ai.

Ae i le faalavelave na tula’i mai i Vaitele, o ni alii se toalua na onana uma i la’ua, sa so’a e le la taavale ia se pou moli, ona o le saoasaoa tele o le  la taavale.  Na maliu leisi alii, e 20 tausaga mai i Sinamoga, ae o lo o taofia i le falemai ia le alii na faafoea le taavale, e mai i Moamoa.

Na ta’ua e Le’aupepe le tuga o manua a le alii avetaavale ma e le i mautinoa po o le a tonu le tulaga e o’o i ai.  Na fa’aalia e Leaupepe lona faanoanoa tele ona o nei ituaiga faafitauli, ae ua maea ona lapataia avetaavale ina ia alo ese mai i le tagofia o ava malolosi pe a faafoe taavale.

SO’A E SE PASI SE TAMAITITI 6 TAUSAGA

O se tamaititi e ono tausaga sa asiasi mai ma lona aiga mai i Ausetalia mo Aso Fiafia, na maliu i le Aso Tofi o le vaiaso ua tuana’i, ina ua so’a e se pasi i Faga i Savaii.

Na ta’ua e le sui Komesina o Leoleo, na so’a e le pasi lenei tamaititi, a’o ia taumafai e kolosi le alatele.  Ma ua molia nei le ave pasi i le aveta’avale le faautauta ua i’u ina maliu ai se tagata.

[www.samoaobserver.ws]

AMATA TAPUNIA NOFOAGA O SULUFAIGA

Ua fa’alauiloa mai e le Komiti o Faalavelave Faafuasei Faalenatura a Samoa, o le a amata tapunia nofoaga o sulufaiga i le vaiaso nei, ma o le a amata ona toe fo’i aiga i o latou maota ma laoa, ina ia amata ona toe fa’aleleia tulaga na fa’aleagaina i le afa o Evan.

Na fa’aalia e le Komiti, ua lava ma totoe sapalai ua tufatufaina i aiga i le tolu vaiaso talu ona te’a atu le afa o Evan; ma ua mana’omia ona toe faamamaina fale aoga, fale sa, ofisa ma nofoaga uma sa fa’aaogaina mo sulufaiga aua le sauni atu mo le tausaga aoga fou i le faaiuga o Ianuari.

O le aoauli o le Aso Toonai o le vaiaso nei, Ianuari 5, 2013, ua faatulagaina e tapunia aloaia ai nofoaga sa fa’aaogaina e aiga na faaleagaina o latou maota ma laoa i le afa o Evan.  Ae o le a galulue pea le aufaigaluega o Nofoaga Tutotonu mo Faalavelave Faafuasei (NEOC) aua ni faalavelave faafuasei e ono tula’i mai.

[RNZI]