TALITONU TA’ITA’I OFISA SOIFUA MALOLOINA, E LEAI SE MEA E FA’APOPOLE AI LE ATUNU’U

Ua fautuaina e le pulega a le Ofisa o le Soifua Maloloina, le leai o se mea e fa’apopoleina ai le mamalu o le atunu’u, ona o le siama lea e ta’ua o le MRSA (Methicilin Resistant Stapihylocccus Aureus).

E to’alua ni tamaiti na maliliu i le falema’i i Moto’otua i le masina ua mave, ina ua fa’amaonia le a’afia o i la’ua i le siama lea, ae peita’i, e le o fa’amaonia le mafua’aga moni na maliliu ai i la’ua.

Na fa’aalia e le pule sili o le Ofisa o le Soifua Maloloina, le susuga Leota Laki Sio, le leai o se mafua’aga e ono fa’apopoleina ai le atunu’u.  Na ia ta’ua e fa’apea, ua mafua ona fa’apopole ni isi o le atunu’u, ona o ni imeli o lo o ta’amilo i nisi o ta’ita’i o le atunu’u, ua ta’ua ai le mata’utia ma le ono maliu o se tagata, e a’afia i lea siama.

Na ta’ua e le ali’i foma’i ia Dr. Francis Maru, lea o lo o fa’auluulu i ai vaega o lo o siaki a fanau iti, le le mafai ona tineia o lenei siama i vaila’au o lo o i ai nei i totonu o le teritori.

FILIFILIA STEPHEN BETHAM E AVEA MA FAIAOGA O LE MANU SAMOA

Ua filifilia nei e le Iuni Lakapi a Samoa ia Stephen Betham e avea ma faiaoga sinia o le Manu Samoa.

I le amataga o le masina na fa’alauiloa ai e le iuni le avea o Betham ma faiaoga lagolago i le ali’i mai i Ausetalia, o Adrian Thompson.

Ae peita’i, e le’i mafai ona maua se maliliega i le va o Thompson ma le iuni, ona sa ta’ua e le iuni, e le’i mafai ona tali Thompson i se tasi o vaega o le konakarate, e tatau ai ona fa’amautu mai i Samoa.

Na te’ena e le failautusi o le iuni, o Ameperosa Roma, ia fa’amatalaga e fa’apea na sese le fa’afoega o lenei mata’upu.

Source: Radio New Zealand

FA’ALEAOGA TU’UA’IGA O LE SAINI PEPELO O SE IGOA

Ua fa’aleaoga e le Fa’amasinoga Fa’aitumalo ia ni tu’ua’iga e lua i le saini pepelo o se igoa o se isi tagata, na faia fa’asaga ia Lemalu Sina Retzlaff.

Na molia Lemalu i lona sainia o le igoa o lona tina, o Maraea Slade, ma na ta’ua e le loia a le malo, o Ken Komiti, ua fa’aleaoga nei tu’ua’iga ona o le leai o ni molimau e fa’amautuina ai nei moliaga.

Sa molia Lemalu i se fa’afitauli na tula’i mai i le va o le 27 o Mati ma Iuni 17, 2009.

Source: Samoa Observer