Ads by Google Ads by Google

Tala ‘oto’oto mai Samoa

LOKA I LE 6 TAUSAGA I LONA TAUMAFAI E FA’AMALOSI SE TEINEITITI

Ua ta’usalaina nei se tamaloa mai i Faleula i tu’ua’iga o le taumafai e fa’amalosi se teineititi, ma ua fa’asala ai o ia i le falepuipui mo le ono tausaga, e le ali’i fa’amasino, le susuga Patu Tiavasue Falefatu Sapolu.

Ua nofo malamalama le fa’amasinoga, sa faia e le aiga o Kalolo Tuifao, e 41 tausaga, ia se ifoga i le aiga o le tama’ita’i ua a’afia i lenei mata’upu.  Ae peita’i, o lo o fa’aauau pea ona finau Tuifao, e le moni nei tu’ua’iga.

Na ta’ua e le ali’i fa’amasino, e fa’ailoa mai i gaioiga a Tuifao, e le salamo.  Na ta’ua e le susuga Patu, talu mai na tupu lenei fa’alavelave, ua le mafai ona toe fo’i lenei tama’ita’i i le a’oga.  E tupu lenei fa’alavelave ae o lo o 16 tausaga o le tama’ita’i.

Na ta’ua foi’ e le ali’i fa’amasino, o gaioiga sa faia e Kalolo i le aso 21 o Iuni 2010, i Faleula, o ni gaioiga ua leva ona ia mafaufauina ma sa tonu ia te ia, o le a ia tata’ia le teineititi i se vaega tu’ufua i Faleula-uta, e la te fai’aiga, e tusa lava pe le loto i ai le tama’ita’i.

Na ta’ua e le fa’amasinoga, o le aso lea na tupu ai le faalavelave, na i ai Kalolo i Apia ma Vaitele ma sa inu ai ni ana fagu pia lapopo’a e tolu, ae e le’i toe fo’i i Faleula, ae o le taimi lena o lo o fa’atau tamato le tama’ita’i na a’afia.  Na fai atu Kalolo i le tama’ita’i, e na te fa’atauina uma tamato a lenei tama’ita’i, ae e tatau na la o i se faleoloa e aumai ai le tupe.

O i’ina na tupu ai le fa’alavelave, ma na va’ai e se fafine le tamo’e telenoa mai o se tama’ita’i, ae o lo o tagi fa’ataitai o.

FAIA SE LOTU AE LE’I TALEPEINA LE MAOTA FONO TUAI

O se faiga lotu fa’afuase’i, na fa’ataunu’uina i luma o le Maota Fono tuai i le Mulinu’u, a’o sauni atu le talepeina i lalo.  E silia ma le to’alimasefulu tagata sa i luma o le Maota Fono e fa’aalia lo latou tete’e i le fuafuaga a le malo, mo le talepeina i lalo o le Maota Fono.

Na u’ulima uma i latou sa i luma o le fale fono tuai ma o latou usuina le pese, “Na tofia e le Atua Samoa ina ia pulea e matai”.

Na fa’aalia e le Fofoga o le Maota o Sui, le susuga La’aulialemalietoa Leuatea Polataivao, i le mamalu na aofia potopoto i lea aso, ua alagatatau lea sauniga sa faia, e mafai ona fa’amanuia ma fa’amavae atu ai i le ‘Fale Fono.

O le susuga i le sui Fofoga Fetalai, ia Agafili Patisela Eteuati Tolova’a sa ta’ita’ia le sauniga, ae o le susuga Palusalue Fa’apo II, le ta’ita’i o le Itu Agai sa na ia fofogaina le tatalo fa’ai’u.

Na fa’aalia i le saunoaga a La’auli, e le o se fa’ai’uga faigofie lea ua talepe ai i lalo le Fale Fono.  Sa ia ta’ua e fa’apea, ua i ai se maliliega ma le palemia, le afioga Tuila’epa Sa’ilele Malielegaoi, e fa’atu se fale mata’aga i le nofoaga o i ai le fale fono.

Source: Samoa Observer

MALIU SE TAMALOA NA SO’A E SE SUI MINISITA

Ua fuafua nei le ofisa o leoleo, e molia le sui minisita o Tupe, i le aveta’avale le fa’autauta ua maliu ai se tagata, ina ua maliu se ali’i e 45 tausaga, i le vaiaso ua mavae, ona o le tuga o ona manu’a, ina ua so’a e le susuga Peseta Vaifou Tevaga, i se ta’avale.

Na ulua’i molia Peseta i le aveta’avale le fa’autauta i lona tulaga muamua, ina ua aveina atu le ua maliu, i le falema’i i Moto’otua, i le masina o Aokuso o le tausaga ua tuana’i.

E tupu lenei fa’alavelave o lo o fa’aaogaina e le sui minisita ia se ta’avale a le malo.

Ua mae’a ona fa’atulaga e le fa’amasinoga se iloiloga mo le sui minisita, i le masina o Iuni, aua ona moliaga muamua, ina ua te’ena e le sui minisita ia ona moliaga.

Source: Radio New Zealand