MALIU SE TAMAITITI NA LOKA I TOTONU O SE TA’AVALE

O lo o faia nei su’esu’ega a leoleo, i se fa’alavelave na tula’i mai, lea na maliu ai se e tamaititi e tolu tausaga, ina ua moe i totonu o le ta’avale e lona aiga, ae o lo o i luga uma fa’amalama.

Na saunoa le ali’i komesina o Leoleo, le susuga Lilomaiava Fou Toailoa, na moe si nei alualutoto i totonu o le ta’avale a lona aiga, a’o pisi tagata o le aiga i se latou fa’alavelave.  Na i’u ina mole lenei tamaititi i totonu o le ta’avale, ma maliu ai.

ILOILO LE MALO PE TATAU ONA TIPOTI SE GAOI

O lo o ua fuafua nei le malo o Samoa, ina ia tipoti le ali’i Pakisitani lea na pulea le Singapore Motors, o Arshed Fareed, ina ua ta’usalaina i ni tu’ua’iga i e silia ma le 20, i tulaga o le gaoi, ia Ianuari.

O le aso 12 o le masina nei, ua fuafua e lau ai le fa’asalaga a Fareed, ae na saunoa le ali’i palemia, le afioga Tuila’epa Sa’ilele Malielegaoi, ua fautuaina o ia, ina ia tipoti Fareed.

Na ta’ua e Tuila’epa, e mafai ona fa’asaoina tupe a le malo pe afai e fa’asala fa’afalepuipui lenei ali’i.

Ua mae’a ona tipoti e le malo se ali’i Aferika (Nigeria), i le tausaga ua mavae, ae o le mae’a lena ona manuia taumafaiga a  lea ali’i, i sana tagi na faia e fa’asaga i le Ofisa o Femalagaaiga ma le Ofisa o Leoleo.

E silia ma le $50 afe (tupe Amerika) na maua e William Okoro mai i lana tagi, ae le aofia ai tupe na fa’aalu e le malo e toe tipoti ai i lona atunu’u.

Na ta’ua e Tuilaepa, e le mana’o e toe tupu lenei tulaga, lea ua alu vale ai tupe a le atunu’u, ona o le le lelei o le fa’ataunu’uga o tiute a leoleo.

VAEA SAMOA ONA O FUAFUAGA INA IA TALEPE FALE FONO TUAI

O le vaiaso nei lea ua fuafua e talepe ai i lalo le fale Fono tuai lea o lo o i Mulinu’u, ona ua ta’ua e le malo, ua tuai toe le saogalemu.  Ae peita’i, ua u’una’ia e le Itu Agai ia tagata o le atunu’u, ina ia o latou tete’e i lea fa’ai’uga.

I se ripoti a sui o le RNZI, ua ta’ua ai e fa’apea, o le Aso Gafua lea na te’a atu nei, na fuafua e talepe ai le fale, ae peita’i na taofia e le Fofoga Fetalai o le Palemene, le susuga La’auli Polataivao, ia le galuega, ma fa’atulaga ai loa le aso e faia ai se iloiloga a le Palemene i lea mata’upu.

Ae peita’i, ina ua mae’a le saunoaga a le palemia, le afioga Tuilaepa Sa’ilele Malielegaoi, lea na ia ta’ua ai le le toe saogalemu o le fale fono tuai, ma ua tatau ona talepe i lalo, na fa’asaga atu le Fofoga Fetalai, ma taofi lea fuafuaga.

O le amataga o le tausaga na fa’aalia ai e La’auli, e mafai ona fa’aaoga le fale fono tuai ma se fale mata’aga.

Na saunoa le ta’ita’i o le Itu Agai, le susuga Palusalue Fa’apo II, o aso fa’anoanoa lenei ua o’o i ai Samoa.  Na ia ta’ua, o lenei fale fono, o le fatu lea, lea na fanau ai le tuto’atasi.