Tala ‘oto’oto mai Samoa
TOE FA’AOPOOPO LEISI FA VAIASO A SE PAGOTA NA SOLA
O le ali’i pagota e 21 tausaga o Daniel Vailopa, lea na sola mai i Tafaigata ae ua toeititi uma lona fa’asalaga, ua toe fa’aopoopo i ai e le ali’i fa’amasino o Mata Tuatagaloa, leisi fa vaiaso, i lona fa’asalaga.
E pei ona ta’ua i fa’amaumauga a le ofisa a leoleo, na sola ese mai i lona sela i le aso 10 o Tesema, 2011.
Sa fa’amatala e Vailopa i luma o le fa’amasinoga, na mafua ona ia sola ese mai i le falepuipui, ona sa fa’atonu o ia e pagota matutua e alu e aumai se tupe ma ni mea’ai, a leai, o le a fasi o ia.
Sa ta’ua e Vailopa i luma o le Fa’amasinoga, ona o lona fefe tele i pagota matutua, na ia sola ai loa ma toe fo’i i lona aiga, ma ia aumaia se tupe mai i lona tina. O lona tina na toe momolia maia ia Vailopa i le falepuipui.
E le’i talitonu le fa’amasinoga i fa’amatalaga a le ali’i pagota.
Na fa’aalia e Tuatagaloa ia Vailopa, e le o se taimi muamua lenei ua o’o atu ai i luma o le fa’amasinoga. Ae le gata i lea, ua ia toe solia le tulafono, ae o la e tuli sona fa’asalaga mo seisi ana solitulafono.
FA’ASALA TUPE IA NI TAGATA PALOTA
E to’atolu ni tagata palota na molia i ‘palota totogi’, i ni fa’afitauli na tutula’i mai i le Palota Lautele a Samoa lea sa faia i le 2011 ma ua fa’asalaina nei i latou e le Fa’amasinoga Fa’aitumalo. O Latuivai Lolesio ma Levi Fa’atauli Tauamo, ua fa’atonuina e la te totogia ni sala tupe e ta’i $100. Ae o Leiato Fineaso ua fa’atonu e na te totogia se sala tupe e $800.
Ua fa’atonuina i latou lea, ina ia vave totogi a latou sala, a leai, o le a lokaina i latou mo le ta’i tolu masina.
O i latou nei sa palota i le itumalo a le Anoama’a i Sasa’e. O le tama’ita’i loia o Rosella Papali’i na tula’i mo i latou nei, ae o Tanya To’ailoa na tula’i mo le malo. O Latuivai ma Levi na molia i ‘palota totogi’.
Ae mo Leiato, e pei ona ta’ua i luma o le fa’amasinoga, e fai sina mamafa o lona fa’asalaga, ona sa avea o ia ma se tasi o totino o le komiti lea na kemupeni mo le sui tauva, ma sa ia ofoina atu tupe mo tagata, mo a latou palota.
E i ai se tasi o tagata palota mai i le itumalo a Satupa’itea, o Tavu’i Iose Gray, ua sainia e le fa’amasinoga sona pepa saisai, ina ua le o’o atu i luma o le fa’amasinoga.
Aumai: Samoa Observer
ONO AVE’ESEA LE ASOSI O TA’ALOGA A SAMOA MAI TOTONU O LE OCEANIA MA LE IAAF
O lo o galulue so’otau’au nei ia le Asosi o Ta’aloga a Samoa ma se totino o le Asosi o Ta’aloga a le Oceania, o Yvonne Mullin, aua se taumafaiga ina ia toe si’itia tulaga o ta’aloga i totonu o le atunu’u, ona ua i ai se popolega, i le ono ave’esea le igoa o Samoa mai i totonu o le li’o o le fa’alapotopotoga o ta’aloga, e le gata i totonu o le Pasefika ae fa’apea fa’avaomalo.
Na fa’aalia e Mullin, o ia o le Fa’atonu Aoao o le Asosi o Ta’aloga a le Oceania, ua tele ina le ausia e Samoa ia tulaga o ta’aloga fa’avaomalo, ae o lo o i ai sona fa’amoemoega o le a mafai ona suia lea tulaga i se lelei.
Ona o fa’afitauli na tula’i mai i tulaga o ta’aloga a le atunu’u, na a’e ai se manatu i le afioga i le Palemia, e fa’avae se Komisi o Ta’aloga, lea o lo o fa’afoea e le Minisita o Ta’aloga, mo le atina’eina o ta’aloga i totonu o a’oga fa’apea ma le Asosi o Ta’aloga.
Aumai: Radio New Zealand