O le Aso Faraile o le vaiaso ua mavae, na maliu ai se tamaloa e 45 tausaga mai i Satapuala ma Tufutafoe, e suafa ia Malo Tuilaepa, ina ua tula’i mai se misa tele i totonu o le aiga o lona to’alua i Satapuala i lea lava afiafi.

Na fa’aalia e le sui komesina o leoleo, le susuga Leaupepe Fatu Pula, na maliu Tuilaepa i le falema’i i Moto’otua, i le aso  na soso’o ai, ona o le tuga o ona manu’a.

Na ta’ua e Le’aupepe, ua molia nei se isi tamaloa e 54 tausaga ma sona atali’i e 18 tausaga, mai i Satapuala, i le fasioti tagata.  O lo o i ai se talitonuga, e vavalalata le so’otaga o i la’ua ua molia ma le to’alua o Tuilaepa.

Ua lokaina i la’ua ua molia ma o le masina fou ua fuafua e tutula’i ai i luma o le Fa’amasinoga Maualuga.

LAVEA SE TEINEITITI I SE TA’AVALE, SOLA LE TA’AVALE

O lo o fa’ata’otolia i le maota gasegase a le malo i Moto’otua, ia se teineititi e 13 tausaga mai i Toamua, ona o se fa’alavelave tau ta’avale na a’afia ai.

Na fa’amatala e le tina o Uilau Viliamu, o Moira, na aga’i atu si ona alo tama’ita’i i le faleoloa, i luga o lana uila, ae so’a e se ta’avale (van) sa aga’i atu i le malae va’alele. 

Na fa’aalia e Moira lona agaga fa’afetai ona o lo o fa’asaoina le ola o si ona alo ae o lo o molia pea talosaga ina ia mafai ona toe fa’afo’i lona malosi atoatoa.

Na ta’ua e Moira, e le’i tu le ta’avale na lavea ai lana tama, ma na ta’ua e ni molimau, sa tumu le ta’avale i ni tamaloloa papalagi.

LEAI SE LAISENE AVETA’AVALE A LE AVE LOLI A LE IUNI LAKAPI A LE MANU SAMOA

I le tula’i ai o le ali’i o Paulo Petelo i luma o le Fa’amasinoga Fa’aitumalo, na ia ioe ai i lona moliaga o le leai o sana laisene i le taimi na ia fa’afoea ai le loli a le Iuni Lakapi a Samoa, lea na a’afia i se fa’alavelave i luga o le alatele.

Ae o lo o tete’e le ali’i 37 tausaga mai i Vaimoso, i isi ona moliaga, e aofia ai le aveta’avale fa’atamala, ua o’o ai ni manu’a i se tagata, atoa ai ma le moliaga o le ova o lana uta sa i tua o le loli, i le taimi na tupu ai le fa’alavelave.

O Petelo sa fa’afoea le loli lea na la’u mai ai le ‘au lakapi a le Samoa A, ina ua mae’a se latou toleniga.  O lenei fa’alavelave na tupu i Vaoala, ma sa manunu’a ai ni ali’i o le ‘au lakapi a le malo, e to’afa.

Ua toe tolopoina lenei mata’upu mo le aso 21 o Me, 2012, ma e iva ni molimau a le itu a leoleo ua fuafua e molimau i lea aso.

O lo o tatala pea i tua ia Petelo e fa’atali ai lona iloiloga ia Me.

FE’ESE’ESEA’I PITONU’U O LEVI MA ALAMUTU ONA O SE LATOU PULENU’U

O lo o ua vevesi nei ni pitonu’u o le afio’aga o Saleimoa, o Levi ma Alamutu, ona o se tasi e avea ma o latou pulenu’u.  Na fa’aalia e le pulenu’u o lo o umia nei le tofi, le susuga PIsapisao Alava’a, o lea ua o’o le fa’asologa i le pitonu’u o Levi, ona ua mae’a le tolu tausaga a Alamutu.

Na saunoa Pisapisao, ua toe manana’o Alamutu mo seisi a latou tausaga e tolu, ae peita’i, ua uma ona faia se maliliega i le va o pitonu’u, e fesuisuia’i pitonu’u i le ta’i tolu tausaga.  Ma na ta’ua e Pisapisao, o le mafua’aga lea na te’ena ai le talosaga a Alamutu, ina ia fa’aauau ona nofoia e lo latou pitonu’u ia le tofi.

Na fa’aauau le saunoaga a Pisapisao e fa’apea, e leai se fa’alupega o Alamutu, aua o le fa’alupega o le “Aiga e Tolu”, e fa’asino ia Levi.  Ma na ta’ua e Pisapisao, ua o latou o’o atu i luma o le Palemia mo sana fesoasoani i lenei mata’upu, ma o le mafua’aga lea ua tu’uina mai ai le avanoa ia Levi.

Na saunoa fo’i Pisapisao, afai ae tete’e Alamutu i le fa’ai’uga ua tu’uina mai, e mafai lava ona fai se latou pulenu’u, ina ia mafai ona fa’aauauina galuega tau atia’e o lo o faia i lo latou pitonu’u.

I le fa’atu’iese o le sui mai i Alamutu, le susuga Leituala Magagu, na ia saunoa ai e fa’apea, o le mea moni lava, o Alamutu o le ulu o le nu’u o Levi.  Na saunoa Leituala, ua tula’i mai le fa’afitauli ona o lo o manana’o ia Levi e tumau pea le tofi pulenu’u ia i latou, ae o lea na fai le maliliega e ta’i tolu tausaga ma sui le nofoaiga.

Ae na fa’aalia e le sui o le itumalo a Sagaga Le Falefa, ua tatau ona tofi le pitonu’u ma le latou pulenu’u.

Aumai: Samoa Observer