Ads by Google Ads by Google

Tala ‘oto’oto mai Pasefika

LOKA NI ALI’I SE TO’ALIMA I SAMOA TAUMAFAI E PASIA TULAFONO E FAATAGA AI MARIUANA

E to’alima ni ali’i mai Samoa ua loka ma molia ona o se laupapa fa’ailo (billboard) na o latou fa’atu i se nofoaga e fesaga’i ma le auala e ulufale atu i le malae vaalele i Faleolo.  O lenei laupapa o lo o tusia ai luga sa taumafaiga a nei ali’i ina ia mafai ona pasia se pili e fa’ataga ai ona tagofia ia maliuana.

Ua molia nei ali’i i lo latou faia o se tulaga e fa’alavelave ai i femalagaaiga i luga o le alatele faapea ma amioga le talafeagai i nofoaga faitele.

Ua fa’aalia e le ofisa a leoleo e fa’apea, na tapunia e nei ali’i le auala e aga’i atu i totonu o le malae vaalele, e ala i lo latou tu’uina o ni ma’a i luga o le auala ma na faatu foi le latou laupapa e fa’asaga aga’i i le malae vaalele.

Ina ua le mafai e leoleo o le malae vaalele ona tuliesea nei ali’i, na o latou logoina loa le ofisa o leoleo.  O i latou ua molia, e aofia ai Timoti Mamoe, Faafoi Solomona, Sapa Mapusone, Risati Tuato ma Falaimo Solomona.

MOLIA SE FOMA’I I LE FASIOTI TAGATA LE FUAFUAINA

Ua molia nei se foma’i Tahiti i moliaga o le fasioti tagata le fuafuaina, ona o le maliu o se ali’i fusu Niu Sila, i le tolu vaiaso ua tuana’i.

Na ta’ua le matapogia o le ali’i 30 tausaga, o Willman Rodriguez Gomez, i lana ulua’i fusuaga fa’apolofesa ma maliu ai i le falema’i i se taimi mulimuli ane.

Na ta’ua i fa’asalalauga a ofisa televise i Tahiti, o lo o molia le ali’i foma’i na i ai i le fusuaga, i lona le fesoasoani i se tagata manu’a.  Na ta’ua i le ripoti a le ofisa televise, le leai o se ‘first aid kit’ a le foma’i i le fusuaga, ina ua lavea i se tu’i oti a Karihi Tehei.

TOATOLU UA MALILIU I PAPUA ONA O LE FA’AMA’I O LE TALE VIVINI

E toatolu ni fanau iti mai i le a’ai o Jiwaka i totonu o Papua Niu Kini, ua maliliu ona o le fa’ama’i o le tale vivini.  Na ta’ua e David Karipu, e pei ona ripotia e le nusipepa o le ‘The National’, na maliliu nei fanau i le falemai.

Na ta’ua e Karipu, ona o le mamao o le falema’i, e toatele i latou e sulufa’i atu i le falema’i, ae ua tuai.

Ua talosagaina ni isi aufaigaluega i le falema’i ona o le to’atele ua a’afia i lenei fa’ama’i talu mai le masina o Tesema.

TETE’E LE VAEGA A O’NEILL I LE FA’AI’UGA A FA’AMASINO

Ua i luma nei o le fa’amasinoga ia se tete’e mai i le faigamalo a Peter O’Neill, i totonu o Papua Niu Kini, e fa’asaga i fa’amasino o fa’amasinoga maualuga, lea na faia se fa’ai’uga e le tutusa ma tulaga o le tulafono ia lana faigamalo.

E to’atolu fa’amasino, mai i fa’amasino e to’alima o le Fa’amasinoga Maualuga, na faia se fa’ai’uga i le Aso Gafua e fa’apea na le’i o gatasi le fa’atula’i ese o Sir Michael Somare mai i lona tofiga, e le vaega a O’Neill ia Aokuso o le tausaga ua tuana’i, ma tulaga  le tulafono.

Ae i se finauga mai i le faigamalo a O’Neill, lea ua i luma nei o le fa’amasinoga, ua ta’ua ai le tatau ona le fa’aaogaina le fa’ai’uga a le fa’amasinoga, ona e le’i faia se fa’ai’uga a isi fa’amasino e to’alua.

Source: Radio New Zealand