Tusi Emeli Mai E Ua Maliu

Ua masani i tatou uma i feso’ota’iga tau Emeli i a tatou feso’ota’iga tau Initeneti e aofia ai tatou tuatusi i Upega Tafa’ilagi po o Uepesite ‘ese’ese. Peita’i, afai ua o’o mai le malaga a le Oti, e tatou te le toe maua lea ala feso’ota’i ma tatou aiga ma uo.

O se mea na tupu ia Jack Froese, 32 tausaga le matua, ina ua oti i lona ma’i fatu, ia Iuni 2011, na matua to’atele ana uo ma lona aiga sa fa’anoanoa ona o lea tulaga. Peita’i, o se tasi o ana uo mamae, sa masani i la’ua ona talanoa ma feoa’i solo, ua matua fa’ate’ia ina ua toe maua mai ai sana imeli, ma lona va’ai atu i lana telefoni, e aumaia lana imeli lea ia Jack.

Sa 'ese ona lagona, peita’i, sa ia mana’o e toe ola mai lana uo, o lea sa ia tatalaina lana imeli ma le tele o fa’alagona ese’ese, ae maualuga lava i lona manatu, talosia a’o Jack lea ua toe ola mai. Po o le a lava le tala a tagata e fai mai ia te ia, ae o lona fa’alagona lena sa ia te ia, i le taimi na ia tatalaina ai lana tusi.

O le masina o Novema lea ua maua ai lea tusi, na muamua mai lava lana tala “O lea ou te va’ava’ai atu,  ua e iloa? O lea ou te i lou fale, Tapena lou potu i luga o le taualuga o lou fale!”

O se tala mai a le ali’i lea, o le la’ua talanoaga mulimuli lava lea ma Jack, sa faia a o ola, i luga o lea potu o lona fale [attic] ma sa tele se taimi na ula ai Jack ia te ia, i le tulaga le tapenaina lelei o lea potu o lona fale.

E ui ina umi, ae le o ia ta’ua lava i se tasi lea mea na tupu, ae ua avea ma mea ua to’aga ai lava e tapena lea potu o lona fale, e pei o lo o ia fa’atalia le taimi e toe sau ai lana uo mamae i lona olaga, la te talanoa ma talie fa’atasi.

E le o se mea moni i lau fa’alogo lea ituaiga o tala, peita’i, afai ae lutia lou sa i lau faigamalaga i lenei olaga, ma ua amia ai e le malaga a le maliu ma oti se tasi e pele ia te oe, e te lagona se fa’amafanafanaga tele i lou loto pe a te’i ua e maua ni imeli mai ia te’i latou ae ua o.

Po o le a lava le ituaiga imeli e te maua, po o se tusi fo’i, e matua e nofo mafanafana i lou misia o i latou, ma e te taumafai fo’i e fa’aauau ona faia e tusa o le tusi ua e maua. O le mea lea ua maua nei i lea uo mamae, e ui ina le talitonu o ia o ola pea lana uo mamae lea, ae ua ia iloa, o se mea ua ia toe fa’amanatu mai ia te ia, ia faia i aso uma, ia fa’amama lona lea potu la te talanoa so’o ai.

E le na o lana uo mamae sa ia aumaia i ai lana tusi, sa ia tusia fo’i se tusi i le imeli a lona tausoga, ma o ia lea sa lavea lona tuli, peita’i, o le tuli lea na fa’ato’a lavea ae ua mae’a le oti. O le ali’i lea ua toe o’o ona mafaufauga alofa tele i si ona tausoga, aua o lea ua ia fa’ailoa mai, e ‘aua le fa’atu’utu’u i ai, ae ia taumafai pea, e le o muta ai lona ola i lona lea lavea.

I se molimau a lea ali’i na ia fa’apea ai, “Talofa, o lo o taumafai lava o ia e tausoa mai lo’u lagona fa’anoanoa lea e i ai, ona o lona maliu, ae atili ai, ona ua leaga lo’u tuli, ae ou te fiafia i ta’aloga.”

O le afuaga o lenei tala, aua ua i ai nei se ala e mafai e i tatou uma e fa’aaogaina nei Upegatfa’ilagi po o Uepesite ma Initeneti, ona tatou tu’ua ni fe’au taua mo e pele ia i tatou, ma ia tatou fa’atonuina fo’i le pulega o feso’ota’iga nei i taimi e fa’ao’o ane ai a tatou fe’au mulimuli ua natia mo e pele ia i tatou pe a o’o ina tatou oti. O lea Uepesite e fa’aigoaina o le “Tagitu’i Talatu” [Digital Beyond]

O lona uiga, ua fa’amalosia mai i tatou uma, ina ia tu’ua ai ni au fe’au taua mo lou aiga, aua o ai ea na te iloa se taimi e maliu ai? E lelei pe a ta tigaina i ni ma’i o le tino ma ua tatou iloa ai, o le a tulata i o tatou taimi, ae o i tatou uma e le o mailoa ma e le o fa’ataotolia ni gasegase tuga, ua le mailoa lava le vala’au o le maliu ma le oti ia i ta’ua.

Tatala nei loa lea Uepesite ma e tu’ua ai ou manatu mulimuli mo i latou uma e pele ia te oe, ae maise lau fanau. O le pulega, latou te mautinoa loa ua e maliu, ona latou faia lea o lou fanoga ia to’ai taunu’u ou toe mana’o i lau fanau, lou aiga ma au uo mamae.

Afai e te google le “Digital Beyond” e maua ai lava lou so’otaga i lea uepesite mafaufauina lelei mo i tatou uma e tu’ua ai a tatou fe’au fa’amaise i a tatou pelega i le olaga nei. Ua na’o ni ala nei e fa’afaigofie ai le tiga ma le matuitui o le oti, ae o le oti lava ia, “ua le toe i ai se mafaufau, po o se tiga po o se poto ua i le tu’ugamau lea tatou te aga’i atu uma i ai!”

O le isi uepesite lea ua fa’ailoa mai fo’i o le “Dead Man’s Wish” e te tusia ai au tusi, ma o lea pulega, latou te tu’uina imeli i le pusa tonu lava sa e fa’atonuina e fa’ao’o i ai, i le taimi ua e finagalo ai, pe afai ua mautinoa e lea pulega ua e maliu moni lava!

saunia: Leua Aiono Frost