Ads by Google Ads by Google

TAGA’I I LO TA FAIGA MALO

TAOFI LE TOE TUUINA ATU O PEMITA AVE TAAVALE MO TAGATA MAI FAFO

 

Ua tuuina atu e le Komesina o Leoleo sana poloaiga i le pule o le Ofisa o Taavale Afi a le malo i Tafuna, le susuga Cmdr Lee Vaouli,e taofia ai le toe tuuina atu o pemita ave taavale (Visitor Permits) mo soo se tagata e malaga mai fafo

 

Na fa’aalia e le susuga William E. Haleck i lana poloaiga, e ao ona faamaea gaioiga o lo o faia mo le sailia o se isi auala e sili atu ona lelei ma talafeagai mo le tuuina atu o pemita ave taavale nei i tagata mai fafo.

 

“Talosaga i le mamalu o le atunuu ina ia lava mai lo latou onosa’i faatasi ai ma lo latou malamalama i lenei suiga, e le gata mo le saogalemu o i latou ae faapena foi i le atunuu atoa,” o se vaega lea o le tusi a le komesina ia Cmdr. Vaouli.

 

O lo o faamoemoe le alii komesina na te tuuina atu suiga e pei ona ia fuafuaina i luma o le Fono Faitulafono, pe afai ae toe tauaofia i le masina o Iulai 2013.

 

Ina ua fesiligia e le Samoa News, na taua ai e le alii komesina e faapea, o le masina o Iulai lea o lo o ia faamoemoe e tuuina atu ai se pili taufaaofi i luma o le fono e faatatau i le mataupu lenei.

 

O ni isi o tulaga o lo o finagalo le alii komesina e faamanino e aofia ai le tatau ona faamanino i le tulafono po o ai e gafa ma le faaleleia o meatotino a tagata mai fafo e maua le avanoa e feoa’i i luga o alatele a le malo, pe afai ae faaletonu a latou taavale i omoomo o le alatele poo isi foi tulaga e ono tutupu mai ao i ai i latou i le atunuu.

 

ULUA’I TAIMI UA FAALAUILOA AI TEUGA TUPE A LE MALO I FAFO

 

O se ulua’i taimi lenei ua mafai ai ona manino le malo i le tulaga o lo o i ai ni isi o ana teugatupe i faletupe i fafo atu o le atunuu, ina ua tuuina atu e le Teutupe a le malo sana ripoti i le kovana.

 

Na taua e le alii kovana ia Lolo Matalasi Moliga e faapea, na te faafetaia le galuega fita o lo o gafa ma le teutupe a le malo, ua mafai ai ona manino tulaga o tuegatupe a le malo i faletupe i fafo ma totonu o le atunuu i le taimi nei.

 

Ua faatonuina nei e le alii kovana le teutupe a le malo ia Falema’o ‘Phil’ Pili ina ia tatalaina se teugatupe faapitoa e tuu i ai le tupe o lo o totoe mai le nonogatupe e $20miliona a le malo, e faaagaga mo ni faalavelave e tutupu faafuase’i mai i se taimi o i luma.

 

“O lo o i ai manaoga e masani ona fetaiai ma le malo i le itu tau tupe e pei o le falema’i ma aoga, ae lelei le tulai mai o nei manaoga ae o lo o i ai se teugatupe e tua i ai le malo mo taimi faigata faapenei,” o le saunoaga lea a le alii kovana.

 

O le agaga o le alii kovana e pei ona ia faailoa i luma o lana kapeneta, o le agaga maualuga o le malo ia mafai ona tali atu i manaoga o lo o tulai mai i vaega eseese o le malo ina ia mautinoa, o lo o faamalieina vaega uma mo le faatinoina o le latou tautua i le atunuu.

 

SAUNI MALO E TUU ATU LANA ULUAI PAKETI I LE FONO

 

Ua sauni le faigamalo mo le tuuina atu o lana uluai paketi (preliminary budget) i luma o le fono e pei ona folafola e le alii kovana sili i lana ulua’i sanoaga faataitai i le tatala aloaiaina o le tauaofiaga lona 33 a le Fono Faitulafono i le masina o Ianuari 2013.

 

Na taua e le tofa Lolo Matalasi Moliga i le fonotaga ma tusitala i le vaiaso na te’a nei e faapea, o lo o ave le faamuamua i le uluai paketi i tulaga o tupe mai fafo o lo o tuuina mai e fausia ai galuega tetele i le atunuu (Capital Improvement Project - CIP), ina ia maua i ai se silafia a le fono i le aofai o tupe o lo o mafai ona maua e le malo i tausaga tupe taitasi.

 

I tulaga o tupe lotoifale na taua ai e Lolo e faapea, o tupe lotoifale e faigofie lava ona latou faasoa ai ma le fono i soo se taimi ma faamanino le tulaga o lo o i ai, ae o le agaga maualuga ia ave le faamuamua i le faamaninoina o tupe mai fafo, ona o iina lea o lo o faamoemoe i ai ni isi o atina’e tetele a le malo.