Ads by Google Ads by Google

TAGA’I I LA TATOU FAIGA MALO

SILIA $2 MILIONA MAUA E LE MALO MAI LE ‘FIBER OPTIC’

 

E silia ma le $2 miliona le tupe na taua e kovana Lolo Matalasi Moliga e ono maua e le malo i se taimi o le tausaga nei poo le amataga foi o le tausaga fou, mai le maliliega na sainia ma le kamupani mai Hawaii (American Samoa Hawaii Cable - ASHC) mo le tosoina mai o le uaea o fesootaiga i lalo o le sami (fiber optic) lea o lo o faaaoga e le kamupani telefoni a le Blue Sky ma le ASTCA mo fesootaiga i le atunuu i le taimi nei.

 

Na saunoa Lolo e faapea, pe a ma le $50,000 le ulua’i tupe (dividend) na maua e le malo mai le maliliega sa faia, ma o lea tupe na faia i ai le faaiuga a le kovana tuai e toe faafoi i totonu o teugatupe e inivesi ai.

 

Na faamanino e Lolo e faapea, i le latou fonotaga ma sui o le Blue Sky i le vaiaso na tea nei e faatatau i le mataupu lenei, ua manino ai o le 33% o meatotino a le kamupani a le ASH-Cable e pulea e le malo.

 

E le o mautu mai i le taimi nei po o a fuafuaga a le malo e faaaoga i ai le tupe ua faamoemoe e maua mai i le maliliega lea.

 

E pei ona silafia, e $9 miliona le tupe a le malo na inivesi i totonu o le kamupani o le ASH-Cable mo le tosoina mai o le uaea i Amerika Samoa, ina ia siitia ma faaleleia ai tulaga o fesootaiga i le teritori.

 

OVA $10 MILIONA UA MAEA ONA TUFATUFA I TAGATA FAILA LAFOGA

 

Na taua e le Teutupe a le malo ia Falema’o ‘Phil’ Pili i le vaiaso na te’a nei e faapea, e silia laititi lava ma le $10 miliona le tupe lea ua maea ona tufatufa atu e lona Ofisa i tagata faila lafoga a le atunuu, talu ona amata faila mai lafoga i le masina o Ianuari seia oo mai i le masina o Mati.

 

“O le itu lelei o le tupe lea ua faataape atu i le atunuu, e le gata o le a fesoasoani ai i pisinisi, maua tupe fou e salalau i totonu o le tamaoaiga, ae toe fesoasoani ai foi i aiga taitasi o le atunuu,” o le saunoaga lea a Falema’o na lagolagoina foi e le alii kovana i le fono a faatonusili i le vaiaso na tea nei.

 

Na taua e Lolo e faapea, o le taua o lafoga o lo o faila e maua ai le fesoasoani mo le malo ma aiga.

 

Na faaiu lana saunoaga i lona fautuaina lea o faatonusili uma lava ina ia mautinoa e faila a latou lafoga. E oo foi i le alii kovana, e le’i failaina foi lana lafoga. Saunoa Lolo, ua maea ona faila lana talosaga mo le toe faaopoopo o le taimi e faila ai lana lafoga.

 

O le masina o Oketopa lea ua faatulaga e faamuta aloaia ai loa le failaina o lafoga mo le tausaga lenei 2013.

 

O le aso Tofi na te’a nei na maua ai foi siaki mo lafoga a i latou na faila i le aso 8 Mati. O le vaega lona 10 lea o siaki ua tufatufaina mai e le Ofisa o Tupe mo le au faila lafoga, ma le faamoemoe e tufatufaina mai le vaega lona 11 o siaki i se taimi o le vaiaso nei.

 

AOFIA FANUA A LE MALO I TONGA MA SAMOA I LE FONO A TAITAI SA FAIA

 

O se tasi o mataupu na talanoaina i le fonotaga a Ta’ita’i o le atunuu i le vaiaso na te’a nei, o le mataupu e faatatau i fanua a le malo o Amerika Samoa o lo o i ai i Tonga ma Samoa.

 

Na taua e Lolo Matalasi Moliga e faapea, e ui e lei mautu ni fuafuaga a ta’ita’i o le atunuu i auala e faaaoga i ai fanua nei, pau le tulaga taua ua mafai ona aofia i a latou talanoaga sa faia.

 

O le fanua a le malo o lo o i ai i Tonga na faafesuia’i ma le fanua i Tafuna lea ua tuuina atu mo le malo o Tonga, e faapena foi i le fanua i Samoa, lea sa faafesuia’i e le kovana sa i ai ia Togiola Tulafono ma le alii palemia ia Tuilaepa Lupesoliai Sailele Malielegaoi i le tausaga na te’a nei.

 

O le fanua a Amerika Samoa e pei ona taua e le palemia i lana saunoaga i le fono a taitai i le tausaga na te’a nei, o lo o i ai i Afiamalu, le nofoaga maualuga toe malulu, ae o le fanua a Samoa o lo o i ai i Tafuna.

 

O le i ai o se fanua o Amerika Samoa i isi atunuu e pei o Samoa e pei ona faailoa e Tuilaepa ia Togiola, o le a mafai ai ona fausia e Amerika Samoa sona lava ofisa e fesoasoani i mataupu faavaomalo o lo o manaomia ai e ona tagatanuu se fesoasoani, e pei foi ona Samoa latou ia, ua i ai ona fanua ma Ofisa i isi atunuu o le lalolagi e pei o Saina, Ausetalia ma Niu Sila.